ໃນວັນທີ 28 ເມສາ 2023, ສະຖາບັນການຕ່າງປະເທດ, ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດແຫ່ງ ສ. ເກົາຫຼີ ປະຈຳ ສປປ ລາວ ໄດ້ຈັດກອງປະຊຸມສຳມະນາ ພາຍໃຕ້ຫົວຂໍ້: “ ຍຸດທະສາດອິນໂດປາຊີຟິກ ຂອງ ສ. ເກົາຫຼີ ແລະ ຂໍ້ລິເລີ່ມຄວາມສາມັກຄີ ລະຫວ່າງ ສ. ເກົາຫຼີ - ອາຊຽນ ’’ (Korea’s Indo-Pacific Strategy and Korea-ASEAN Solidarity Initiative) ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ໂດຍການເປັນປະທານຮ່ວມຂອງ ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດແລະ ທ່ານ Jung Yung Soo , ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ. ເກົາຫຼີ ປະຈຳ ສປປ ລາວ ພ້ອມທັງ ມີຜູ້ເຂົ້າຮ່ວມຈາກບັນດາກົມພາຍໃນ ກະຊວງການຕ່າງປະເທດ, ບັນດາກະຊວງຂະແໜງການອ້ອມຂ້າງສູນກາງ, ຄູ-ອາຈານ ແລະ ນັກສຶກສາຈາກ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ລວມທັງພະນັກງານສະຖານທູດ ສ. ເກົາຫຼີ ປະຈຳ ສປປ ລາວ ທັງໝົດຈຳນວນ 150 ທ່ານ.
ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນ ເພື່ອຮັບຟັງ ແລະ ມີຄວາມເຂົ້າໃຈຢ່າງເລິກເຊິ່ງ ກ່ຽວກັບ ນະໂຍບາຍການຕ່າງປະເທດຂອງ ສ. ເກົາຫຼີ ໃນການສົ່ງເສີມການຮ່ວມມືສອງຝ່າຍ ລະຫວ່າງ ສປປ ລາວ ແລະ ສ. ເກົາຫຼີ. ພ້ອມກັນນັ້ນ, ກໍຍັງໄດ້ຮັບຟັງຍຸດທະສາດອິນໂດປາຊີຟິກຂອງ ສ. ເກົາຫຼີ ແລະ ຂໍ້ລິເລີ່ມຄວາມສາມັກຄີ ລະຫວ່າງ ສ. ເກົາຫຼີ ແລະ ອາຊຽນ.
ໃນພິທີກ່າວເປີດກອງປະຊຸມ, ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ, ປະທານຮ່ວມກອງປະຊຸມ ໄດ້ເນັ້ນໃຫ້ເຫັນເຖິງການພົວພັນຮ່ວມມືທີ່ດີ ແລະ ການສະໜັບສະໜູນເຊິ່ງກັນ ແລະ ກັນ ລະຫວ່າງ ສປປ ລາວ ແລະ ສ. ເກົາຫຼີ ໃນພາກພື້ນ ແລະ ສາກົນ ຕະຫຼອດໄລຍະຜ່ານມາ. ເພື່ອສົ່ງເສີມຄວາມເຂົ້າໃຈຢ່າງເລິກເຊິ່ງ ກ່ຽວກັບ ນະໂຍບາຍການຕ່າງປະເທດ ຂອງ ສ. ເກົາຫຼີ, ກຳໄດ້ຍຸດທະສາດ ແລະ ແຜນບຸລິມະສິດ ຂອງ ສ. ເກົາຫຼີ ໃນການຮ່ວມມື ລະຫວ່າງ ສ. ເກົາຫຼີ ກັບ ບັນດາປະເທດອາຊຽນ ເວົ້າລວມ, ເວົ້າສະເພາະ ກັບ ສປປ ລາວເຮົາ ລວມທັງ ຍຸດທະສາດອິນໂດ-ປາຊີຟິກ ຂອງ ສ. ເກົາຫຼີ ແລະ ຂໍ້ລິເລີ່ມການຮັດແຫນ້ນຄວາມເປັນໜຶ່ງດຽວ ລະຫວ່າງ ສ. ເກົາຫຼີ - ອາຊຽນ ທີ່ຜູ້ນໍາ ສ. ເກົາຫຼີ ປະກາດໃນກອງປະຊຸມສຸດຍອດອາຊຽນ - ສ. ເກົາຫຼີ ຄັ້ງຜ່ານມາ ທີ່ ພະນົມເປັນ, ກຳປູເຈຍ.
ກອງປະຊຸມ ໄດ້ດຳເນີນເປັນເວລາເຄິ່ງວັນໂດຍໄດ້ຮັບຟັງການນໍາສະເໜີບົດໂດຍນັກວິທະຍາກອນ ຈາກຝ່າຍ ສ. ເກົາຫຼີ ໂດຍສະເພາະ ທ່ານ Lee Hyuk, ຜູ້ຕາງໜ້າພິເສດ ຂອງ ລັດຖະມົນຕີການຕ່າງປະເທດ ສ. ເກົາຫຼີ ກໍຄື ທ່ານ ນ. Chung Kyung Hwa, ຫົວໜ້າພະແນກອາຊີຕາເວັນອອກສຽງໃຕ້ຂອງສຳນັກງານອາຊຽນ, ກະຊວງການຕ່າງປະເທດ ສ.ເກົາຫຼີ, ເຊິ່ງໄດ້ຜັດປ່ຽນກັນນໍາສະເໜີບົດຕາມແຕ່ລະວາລະຄື: ວາລະທີ 01: ຍຸດທະສາດອິນໂດປາຊີຟິກ ຂອງ ສ. ເກົາຫຼີ (Korea’s Indo-Pacific Strategy) ແລະ ວາລະທີ 02: ຂໍ້ລິເລີ່ມຄວາມສາມັກຄີ ລະຫວ່າງ ສ. ເກົາຫຼີ - ອາຊຽນ (Korea-ASEAN Solidarity Initiative). ຫຼັງຈາກນັ້ນ, ບັນດາຜູ້ເຂົ້າຮ່ວມ ກໍໄດ້ມີການຕັ້ງຄໍາຖາມເພື່ອແລກປ່ຽນທັດສະນະ ແລະ ຄໍາຄິດຄໍາເຫັນທີ່ຕິດພັນກັບຫົວຂໍ້ດັ່ງກ່າວຢ່າງກົງໄປກົງມາ.
ກອງປະຊຸມ ໄດ້ປິດລົງດ້ວຍຜົນສຳເລັດອັນຈົບງາມ, ໃນຕອນທ້າຍຂອງພິທີ, ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ, ຜູ້ນຳພາກອງປະຊຸມ ໄດ້ສະແດງຄວາມຊົມເຊີຍຕໍ່ບັນດາວິທະຍາກອນ ແລະ ຜູ້ເຂົ້າຮ່ວມ ທີ່ໄດ້ພ້ອມກັນແລກປ່ຽນທັດສະນະ, ປຶກສາຫາລືຮ່ວມກັນ ໂດຍສະເພາະຂໍ້ລິເລີ່ມໃໝ່ ແລະ ຍຸດທະສາດຂອງ ສ. ເກົາຫຼີ ຕໍ່ກັບພາກພື້ນ ແລະ ສາກົນ ກໍຄື ບັນຫາທີ່ຕິດພັນກັບການສົ່ງເສີມຮັດແໜ້ນການພົວພັນຮ່ວມມືສອງຝ່າຍ ລາວ - ສ. ເກົາຫຼີ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.