ວັນ​ທີ 22 ​ເມສາ 2023,  ທີ່ ບ້ານ​ທ້າຍ​ເຊີນ, ຕາ​ແສງ​ເຊີນ​ລາຍ, ​ເມືອງ​ຍໍ​ກວນ ແຂວງນິງບິ່ງ ​ໄດ້​ຈັດ​ງານ​ວັດທະນະທຳ​ເພື່ອ​ລະນຶກ​ເຖີ່ງຄຸນງາມຄວາມດີ​ຂອງ​ລາຊະ​ທິດາ ​ໂຍ່ຍ​ຮວາ ​(ລາຊະ​ທິດາ ລາວ) ທີ່​ໄດ້ຊ່ວຍ​ເຫຼືອ​ຫວຽດນາມ​ໃນ​ປາງ​ສົ່ງ​ຄາມສະໄໝ​ດ້າຍ​ຫວຽດ ໃນການຕ້ານສັດຕູ​ຜູ້ຮຸກຮານ.

    ໂດຍ​ການ​ເຂົ້າ​ຮ່ວມ​ຂອງ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ, ມີຫົວໜ້າ​ພະ​ແນ​ກທ່ອງ​ທ່ຽວ, ​ຕາງໜ້າ​ພະ​ແນ​ກວັດທະນະທຳ ​ແລະ ກິລາ ມີ​ເຈົ້າ​ເມືອງ​ຍໍ​ກວານ​ ກໍຄື​ອຳນາດ​ການ​ປົກຄອງ​ບ້ານຖາຍເຊີນ, ຕາ​ແສງເສີນລາຍ ​ແລະ ​ເມືອງຍໍກວານ ​ພ້ອມ​ດ້ວຍ​ພໍ່​ແມ່​ປະຊາຊົນ​ເຂົ້າຮ່ວມ​ຢ່າງພ້ອມພຽງ. ນອກ​ນັ້ນ​ຍັງ​ມີ​ອຳນວຍ​ການ ​ແລະ ນັກ​ສຶກສາລາ​ວຈາກ​ມະຫາວິທະຍາ​ໄລ​ຮວາ​ລື, ແຂວງນິງບີ່ງ ຮ່ວມ​ຢ່າງ​ເປັນ​ຂະ​ບວນຟົດ​ຟື້ນ ​ແລະ ມ່ວນ​ຊື່ນ.

​      ໃນ​ງານ​ດັ່ງກ່າວ​​ໄດ້​ມີ​ພິທີ​​ໄຫວ້​ທູບ​ທຽນ, ມີ​ການສະ​ແດງ​ສີ​ລະ​ປະລະຫວ່າງ​ປະຊາຊົນ​ພາຍ​ໃນ​ບ້ານ ​ແລະ ນັກ​ສຶກສາລາ​ວທີ່​ກຳລັງ​ສຶກສາ​ຢູ່​ມະຫາວິທະຍາ​ໄລ​ຮວາ​ລື ​ແຂວງ​ນິງບິ່ງ. ພິ​ເສດ​ໄດ້​ມີ​ການ​ຟ້ອນ​ດ​ວງຈຳປາ ​ຟ້ອນ​ໂດຍ​ສະຫະພັນ​ແມ່ຍິງ​ບ້ານ​ທ້າຍ​ເຊີນ​ທີ່​ໄດ້​ສືບ​ທອດ​ກັນ​ມາ​ແຕ່​ປູ່ຍ່າ​ຕາ​ຍາຍ.

      ຕາມ​ປະຫວັດສາດ​ໃນ​ສັດຕະວັດ​ທີ XV, ​ໄລຍະ​ກະສັດ​ ເລ ​ແທ່ງ ຕົງ ​ໄດ້​ມີ​ເຈົ້າ​ຫຍິ່ງ​ລາວ ​ໄດ້​ນຳ​ຂະ​ບວນຊ້າງ 100 ​ໂຕ ​ໄປ​ຊ່ວຍ​ຫວຽດນາມ ​ໃນ​ຂະນະ​ທີ່​ນຳ​ຊ້າງ​ມາ​ນີ້​​ເຈົ້າ​ຫຍິ່ງ​ຍັງ​ໄດ້​ຝຶກ​ຊ້າງ​ເພື່ອ​ສູ້​ຮົບ​​ໃຫ້​ກັບ​ດ້າຍ​ຫວຽດ​ເພື່ອ​ສູ້​ຮົບ​ກັບ​ສັດ​ຕູ ​ແຕ່​ພາຍຫຼັງ​ຝຶກ​ຊ້າງ​ໃຫ້​ກັບ​ດ້າຍ​ຫວຽດ​ແລ້ວ​ໂຊກ​ບໍ່​ດີ​ໃນ​ໄລຍະ​ເດີນທາງ​ກັບປະ​ເທດ​ເຈົ້າ​ຫຍິ່ງ​ລາວ​ເປັນ​ໄຂ້​ໜັກ​​ແລະ​ໄດ້​ເສຍ​ຊີວິດ​ໃນ​ເວລາ​ມາ​ເຖີ່​ງຈຸດ​ດັ່ງກ່າວ, ​ເຈົ້າ​ຊີວິດ ​ເລ ​ແທ່ງ ຕົງ ຈຶ່ງ​ສັ່ງ​ໃຫ້​ທະຫານ​ຂອງ​ຕົນ​ສ້າງ​ສຸສານ​ເພື່ອ​ຝັ່ງ​ສົບ​ເຈົ້າ​ຫຍິ່ງ ​ແລະ ສັ່ງ​ໃຫ້​ສ້າງ​ຫໍ​ໄຫວ້​ເພື່ອ​ລະນຶກ​ຄຸນງາມຄວາມ​ດີ​ຂອງ​ເພີ່ນ.

    ຕາມ​ການ​ບອກ​ເລົ່າ​ຂອງ​ປະຊາຊົນ ບ້ານ​ດັ່ງກ່າວ​ໃນ​ແຕ່ລະ​ປີ ຮອດ 3 ຄ່ຳ ​ເດືອນ 3 ຕາມ​ປະຕິທິນ​ຫວຽດນາມ ປະຊາຊົນ ບ້ານ​ດັ່ງກ່າວ​ຈະ​ໄດ້​ຈັດ​ພິທີ​ເພື່ອພ້ອມ​ກັນ​ລະນຶກ​​ຄຸນງາມຄວາມດີ​ໂດຍ​ມີ​ການ​ສືບ​ທອດ​ກັນ​ມາ​ແຕ່​ດືກດຳ​ບັນ. ພ້ອມ​ດຽວ​ກັນ​ນັ້ນ ​ຍັງ​ຢືນຢັນ​ວ່າ​ນີ້​ກໍ​ເປັນ​ເຫດການ​ໜຶ່ງ​ທີ່​ເປັນ​ຈຸດ​ລິ​ເລີ່​ມການ​ພົວພັນ​ຊ່ວຍເຫຼືອ​​​ເຊິ່ງກັນ ​ແລະ ກັນ​ລະຫວ່າງ​ລາວ-​ຫວຽດນາ​ມ.

      ໂອກາດ​ຮ່ວມ​ພິທີ​ດັ່ງກ່າວ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ​ໄດ້ກ່າວ​ປາ​ໄສ່ພ້ອມ​ທັງ​ສະ​ແດງ​ຄວາມ​ປິ​ຕິ​ຊົມ​ຊື່ນ​ທີ່​ໄດ້​ເຫັນ​ປະຊາຊົນ​ບ້ານ​ທ້າຍ​ເຊີນ, ຕາ​ແສງ​ເຊີນ​ລາຍ, ​ເມືອງ​ຍໍ​ກວນ​ແຂວງ​ນິງບີ່​ງ​ໄດ້​ຮັກສາ​ ແລະ ສືບ​ທອນ​ວັດທະນະທຳ​ດັ່ງກ່າວ​ໄວ້​ໄດ້​ຍາວ​ນານ​ຈົນ​ສືບ​ທອດ​ມາ​ຈົນ​ເຖີ່​ງຍຸກ​ປະຈຸ​ບັນ, ພ້ອມ​ນັ້ນ​ສະຫາຍ​ເອກ​ອັກຄະ​ລັດຖະທູດ​ຍັງ​ໄດ້​ຍົກ​ໃຫ້​ເຫັນ​ຄວາມ​ສຳພັນ​ສູ້​ຮົບ​ລາວ​ຫວຽດນາມ ​ແລະ ສາຍ​ພົວພັນ​ການ​ຊ່ວຍ​ເຫຼືອ​ເຊີ່ງ​ກັນ ​ແລະ ກັນ​ແມ່ນ​ມີ​ມາ​ແຕ່​ຍາວ​ນານ​ເຊັ່ນ: ການ​ກໍ່​ຕັ້ງ​ພັກ​ຄອມ​ມູນິດ​ອິນດູຈີນ​ເພື່ອ​ນຳພາ​ການ​ປະຕິວັດ​ຕໍ່ສູ້​ປົດ​ປ່ອຍ​ຊາດ 3 ຊາດ​ອິນດູຈີນ​ການ​ປະສານ​ສົມທົບ​ກອງທັບ​ອາສາ​ສະໝັກ​ຫວຽດນາມ​ກັບ​ກອງທັບ​ລາວ​ອິດສະຫຼະ​ປົດ​ປ່ອຍ​ພາກ​ເໜືອ​ຂອງ​ລາວ(ຊຳ​ເໜືອ, ສ່ວນ​ໜຶ່ງ​ຊຽງ​ຂວາງ ​ແລະ ຫຼວງພະ​ບາງ)​ໃນ​ປີ1953, ໄຊຊະນະ​ພາກ​ເໜືອ​ຂອງ​ລາວ​ປີ 1953 ເປັນການ ຕັດກຳລັງສົມທົບເບື້ອງຫຼັງຂອງສັດຕູຈາກດິນລາວ ​ໄປ​ຍັງ​ດຽນບຽນແລະ ເປັນປັດໄຈໜຶ່ງທີ່ຊ່ວຍໃຫ້ຫວຽດນາມສາມາດປົດປ່ອຍບຽນດຽນຟູໃນປີ 1954 ແລະ ບັງຄັບໃຫ້ລ່າເມືອງຂຶ້ນຝຣັ່ງຍອມເຊັນສັນຍາເຊີແນວໃນການຮັບຮູ້​ເອກະລາດແຫຼມອິນດູຈີນ.​

​     ເປັນ​ທະຫານ​ຮ່ວມ​ສຳພັນ​ສູ້​ຮົບລາວ-ຫວຽດນາມ ຕ້ານ​ຈັກກະພັດ​ຜູ້​ຮຸກ​ຮານ​ໄດ້​ກາຍ​ເປັນ​ກອງ​ກຳລັງ​ອັນ​ແໜ້ນ​ແກ່ນ​ສາມາດ​ຍາດ​ໄດ້​ໄຊຊະນະ​ນີ້​ໄປ​ສູ່​ໄຊຊະນະ​ໃໝ່, ​ໃນ​ທີ່​ສຸດ​ກໍ​ສາມາດ ​ປົດ​ປ່ອຍ​ພາກ​​ໃຕ້​ທ້ອນ​ໂຮມ​ປະ​ເທດ​ຊາດຫວຽດນາມ​ເປັນ​ເອກ​ພາບ​ໃນ​ປີ 1975 ​ແລະ ປະກາດ​ສາງ​ຕັ້ງ ສປປ ລາວ​ໃນ​ວັນ​ທີ 02 ທັນວາ ປີ 1975. ​ ​ໃນ​ສັດຕະວັດ​ທີ່ XV. ​ເຫດການລາຊະທິດາລາວ​ໄດ້​​ເອົາ​ຊ້າງ​ 100ໂຕ​ໄປຊ່ວຍຫວຽດນາມ ​ແລະ ຍັງ​ໄດ້​ຝຶກ​ຊ້າງ​ໃຫ້​ປະ​ເທດ​ຫວຽດນາມ​ໃນ​ການ​ຕໍ່ສູ້​ຕ້ານ​ສັດຕູ​ຜູ້​ຮຸກ​ຮານ​ໃນ​ເວລາ​ນັ້ນ​ອີກ​ດ້ວຍ,​ເຫດ​ການ​ໃນສັດຕະວັດ​ທີ XV, XX ​ແລະ XXI ​ໄດ້​ສອງ​ແສງ​ໃຫ້​ເຫັນ​ວ່າ​ສອງ​ປະ​ເທດ​ຂອງ​ພວກ​ເຮົາ​​ໄດ້ມີ​ຄວາມ​ຜູກ​ພັນກັນ​ມາ​ຊຶ່ງ​ບັນພະ​ບູລຸດ ​ແລະ ບັນດາ​ການ​ນຳ​ຫຼາຍ​ຮຸ້ນ​ຄົນ​ໄດ້ສ້າງ​ມາ​ເຊີ່ງ​ພວກ​ເຮົາ​ຄົນ​ຮຸ້ນ​ໜຸ່ມ​ຕ້ອງ​ໄດ້​ພ້ອມ​ກັນຮຽນ​ຮູ້​ປົກ​ປັກ​ຮັກສາ, ຖະນຸຖະໜອມ, ​ເພີ່ມ​ພູນ​ຄູນ​ສ້າງສາ​ຍພົວພັນ​ອັນ​ຍິ່ງ​ໃຫຍ່​ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ລະຫວ່າງ​ສອງ​ພັກ-​ສອງ​ລັດ, ສອງກອງທັບ ​ແລະ ປະຊາຊົນ​ສອງ​ຊາດ​ລາວ​-ຫວຽດນາມ​-ລາວໃຫ້​ນັບ​ມື້​ ຂຽວ​ສົດ​ງົດ​ງາມ​ຕະຫຼອດ​ໄປ.