ໃນວັນທີ 03 ມີນາ 2023, ກົມສົນທິສັນຍາ ແລະ ກົດໝາຍ ຮ່ວມກັບ ຄະນະບໍລິຫານງານຊາວໜຸ່ມກະຊວງການຕ່າງປະເທດ ໄດ້ຈັດກອງປະຊຸມສຳມະນາ ກ່ຽວກັບ ການສ້າງສົນທິສັນຍາລະດັບ ລັດ ແລະ ລັດຖະບານ ລະຫວ່າງ ສປປ ລາວ ແລະ ຕ່າງປະເທດ ແລະ ການສ້າງສັນຍາສາກົນ ລະຫວ່າງ ອົງການຂັ້ນສູນກາງ ຫຼື ອົງການຂັ້ນແຂວງ ຂອງ ສປປ ລາວ ແລະ ຕ່າງປະເທດ ທີ່ ຫ້ອງປະຊຸມໃຫຍ່ ຊັ້ນ 3 ກະຊວງການຕ່າງປະເທດ. ພາຍໃຕ້ການເປັນປະທານຮ່ວມຂອງ ທ່ານ ເທບຖາວອນ ແສງມະນີ, ຮັກສາການແທນຫົວໜ້າກົມ ສົນທິສັນຍາ ແລະ ກົດໝາຍແລະ ທ່ານ ນາງ ມຸກດາວັນ ສີສຸລິດ, ເລຂາຄະນະບໍລິຫານງານຊາວໜຸ່ມກະຊວງການຕ່າງປະເທດ, ຮອງຫົວໜ້າກົມ ອົງການຈັດຕັ້ງສາກົນ. ກອງປະຊຸມມີຜູ້ເຂົ້າຮ່ວມທັງໝົດ 105 ທ່ານ (ຍິງ 45 ທ່ານ).
ຈຸດປະສົງຂອງກອງປະຊຸມໃນຄັ້ງນີ, ເພື່ອເປີດໂອກາດໃຫ້ສະມາຊິກຊາວໜຸ່ມຈາກບັນດາກົມພາຍໃນກະຊວງການຕ່າງປະເທດ ໂດຍສະເພາະຜູ້ທີ່ປະຕິບັດວຽກງານຕົວຈິງ ກ່ຽວກັບ ການສ້າງສົນທິສັນຍາ ແລະ ສັນຍາສາກົນ ໄດ້ແລກປ່ຽນຄໍາຄິດເຫັນ, ປະສົບການ ແລະ ບົດຮຽນໃນການປະຕິບັດວຽກງານຕົວຈິງ, ພ້ອມທັງເປັນການພັດທະນາຄວາມຮູ້ຄວາມສາມາດທາງດ້ານວິຊາການ ເນັ້ນໃສ່ການສ້າງຄວາມເຂັ້ມແຂງເຂົ້າໃນວຽກງານ 4 ບຸກ ຂອງຊາວໜຸ່ມ ທີ່ຕິດພັນກັບວຽກງານວິຊາສະເພາະ ໃຫ້ໄດ້ຮັບຜົນສໍາເລັດຢ່າງມີປະສິດທິພາບ ແລະ ປະສິດທິຜົນສູງ ແລະ ເພື່ອເປັນຂໍ້ມູນນໍາສະເໜີຕໍ່ຄະນະນໍາກະຊວງໃນການປັບປຸງກົນໄກການປະຕິບັດວຽກງານການສ້າງສົນທິສັນຍາ ແລະ ສັນຍາສາກົນກັບຕ່າງປະເທດໃນອະນາຄົດ. ນອກຈາກນີ້, ຜູ້ເຂົ້າຮ່ວມກອງປະຊຸມຄັ້ງນີ້ ຍັງໄດ້ມີໂອກາດແລກປ່ຽນຄໍາຄິດເຫັນ ເພື່ອຄວາມເປັນເອກະພາບກັນໃນການຈັດຕັ້ງປະຕິບັດບັນດາຫຼັກການ ແລະ ລະບຽບການພາຍໃນກະຊວງການຕ່າງປະເທດ ເພື່ອໃຫ້ເປັນໄປຕາມຂັ້ນຕອນການສ້າງສົນທິສັນຍາ ແລະ ສັນຍາສາກົນ ຕາມທີ່ໄດ້ກໍານົດໄວ້ໃນກົດ ໝາຍ ວ່າດ້ວຍ ສົນທິສັນຍາ ແລະ ສັນຍາສາກົນ ທີ່ມີຜົນສັກສິດນັບແຕ່ປີ 2017 ເປັນຕົ້ນມາ.