ໃນລະຫວ່າງວັນທີ 15-18 ທັນວາ 2022 ນີ້ ທີ່ນະຄອນຫລວງພະບາງ, ແຂວງຫລວງພະບາງ ໄດ້ມີກອງປະຊຸມຄະນະອະນຸກຳມະການເຕັກນິກຊາຍແດນຮ່ວມລາວ-ໄທ ຄັ້ງທີ່ 15, ຫົວໜ້າຄະນະຝ່າຍລາວນຳໂດຍ ທ່ານ ອານຸສິນ ຂັດຕິຍະລາດ, ຫົວໜ້າຫ້ອງການຄະນະກໍາມະການຊາຍແດນແຫ່ງຊາດ ກະຊວງການຕ່າງປະເທດ, ປະທານຄະນະອະນຸກໍາມະການເຕັກນິກຊາຍແດນຮ່ວມ ລາວ-ໄທ ແລະ ຫົວໜ້າຄະນະຝ່າຍໄທ ນຳໂດຍ ທ່ານ ພົນໂທ ໄຊຍະສິດ ປຣິນຍານຸພາບ, ເຈົ້າກົມແຜນທີ່ທະຫານ ກອງບັນຊາການກອງທັບໄທ, ປະທານຄະນະອະນຸກໍາມະການເຕັກນິກຊາຍແດນຮ່ວມໄທ-ລາວ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງເຂົ້າຮ່ວມ.

ກອງປະຊຸມຄັ້ງນີ້ ໄດ້ທົບທວນຄືນການຈັດຕັ້ງປະຕິບັດບົດບັນທຶກກອງປະຊຸມຄະນະອະນຸກຳມະການເຕັກຮ່ວມລາວ-ໄທ ຄັ້ງທີ 14 ກ່ຽວກັບ ວຽກງານການສຳຫລວດ ແລະ ປັກຫຼັກໝາຍຊາຍແດນ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ຣາຊະອານາຈັກໄທ ໂດຍໄດ້ຮັບຮອງເອົາບົດບັນທຶກກອງປະຊຸມຄະນະຜູ້ອໍານວຍການໂຄງການຊາຍແດນຮ່ວມ ລາວ-ໄທ ຄັ້ງທີ 16, ສະບັບລົງວັນທີ 10 ກັນຍາ 2022 ທີ່ ນະຄອນປາກເຊ ກ່ຽວກັບຜົນການສຳຫລວດ ແລະ ປັກຫລັກໝາຍຊາຍແດນຮ່ວມ ລະຫວ່າງ ລາວ-ໄທ  ແລະ ການແກ້ໄຂບັນຫາຫລັກໝາຍຊາຍແດນທີ່ຄົງຄ້າງຕັ້ງແຕ່ວັນທີ 01 ສິງຫາ 1997 ເຖິງວັນທີ 30 ສິງຫາ 2022, ຊຶ່ງສອງຝ່າຍໄດ້ຮ່ວມກັນເດີນສໍາຫລວດກວດກາສັນປັນນໍ້າທີ່ຕໍ່ເນຶ່ອງທີ່ເປັນທິດເນັ່ງຂອງເສັ້ນຊາຍແດນ ແລະ ກໍ່ສ້າງຫລັກໝາຍຊາຍແດນເພີ່ມເຕີມຈຳນວນນຶ່ງ. ພ້ອມກັນນັ້ນ, ສອງຝ່າຍກໍໄດ້ຮ່ວມກັນວາງແຜນການດໍາເນີນວຽກງານທາງດ້ານເຕັກນິກບໍລິເວນຊາຍແດນທີ່ຍັງບໍ່ທັນສຳເລັດການປັກຫຼັກຫຼັກໝາຍຊາຍແດນລະຫວ່າງສອງປະເທດ ເພື່ອນໍາສະເໜີຕໍ່ກອງປະຊຸມຄະນະເຈົ້າໜ້າທີ່ອະວຸໂສພາຍໃຕ້ຄະນະກຳມາທິການຊາຍແດນຮ່ວມລາວ-ໄທ ພິຈາລະນາວິທີການແກ້ໄຂໃນຂັ້ນຕໍ່ໄປ.

ກອງປະຊຸມໄດ້ດໍາເນີນໄປດ້ວຍບັນຍາກາດໄມຕີຈິດມິດຕະພາບ ຖານບ້ານໃກ້ເຮືອນຄຽງທີ່ດີ ທີ່ເປັນບາດກ້າວໜຶ່ງຂອງການຮ່ວມມືໃນລະດັບຂັ້ນອະນຸກໍຳມະການເຕັກນິກຊາຍແດນຂອງສອງປະເທດ ເພື່ອປຶກສາຫາລືສະເໜີຕໍ່ຂັ້ນເທິງຂອງຕົນພິຈາລະນາວິທີການໃນການແກ້ໄຂບໍລະເວນເສັ້ນຊາຍແດນຄົງຄ້າງລະຫວ່າງສອງປະເທດຮ່ວມກັນ.