ໃນຕອນເຊົ້າ ຂອງວັນທີ 13 ພຶດສະພາ 2022, ເວລາ 09:30 ໂມງ ຢູ່ທີ່ຫ້ອງປະຊຸມ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ຣັດເຊຍ ໄດ້ຈັດພິທີ ມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ຂອງໜ່ວຍພັກສະຖານທູດລາວ ປະຈຳ ສ.ຣັດເຊຍ, ໂດຍການເປັນປະທານຂອງ ສະຫາຍ ນາງ ວິລາວັນ ເຍ່ຍປໍເຮີ, ເລຂາຫນ່ວຍພັກ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ.ຣັດເຊຍ. ເຂົ້າຮ່ວມພິທີໃນຄັ້ງນີ້ມີ: ຄະນະຫນ່ວຍພັກ, ສະມາຊິກພັກ, ພະນັກງານຂອງສະຖານທູດ ແລະ ຕາງໜ້າອົງການຈັດຕັ້ງມະຫາຊົນ ລວມທັງໝົດຈຳນວນ 12 ສະຫາຍ ຍິງ 02 ສະຫາຍ.
ໃນພິທີ ສະຫາຍ ສີສະໄຫວ ສິມມະລິວົງ, ຮອງເລຂາຫນ່ວຍພັກ, ທີ່ປຶກສາທູດຝ່າຍປ້ອງກັນຊາດ ປະຈຳສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ.ຣັດເຊຍ ໄດ້ຂື້ນຜ່ານບົດສະຫຼຸບວຽກງານການເຄື່ອນໄຫວຂອງໜ່ວຍພັກໃນໄລຍະ 06 ເດືອນ ຕົ້ນປີ 2022 ແລະ ທິດທາງແຜນການ ປະຈຳ 06 ເດືອນທ້າຍ ປີ 2022, ຊຶ່ງສະຫາຍໄດ້ຍົກໃຫ້ເຫັນເຖິງຄວາມເອົາໃຈໃສ່ ແລະ ຄວາມຮັບຜິດຊອບສູງຂອງໜ່ວຍພັກ ໃນການຈັດຕັ້ງປະຕິບັດແຜນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ມະຕິ ຄຳສັ່ງ ແລະ ກົດລະບຽບພັກ ໄດ້ເປັນຢ່າງດີ ໂດຍສະເພາະແມ່ນ ຄໍາສັ່ງເລກທີ 01/ກມ ສພ, ລົງວັນທີ 03 ມັງກອນ 2018, ແຈ້ງການແນະນຳຂອງ ຄະນະບໍລິຫານງານພັກ ກະຊວງການຕ່າງປະເທດ ສະບັບເລກທີ 288/ຄພ, ລົງວັນທີ 18 ເມສາ 2022 ແລະ ແຜນການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ຮັດເຊຍ ອັນໄດ້ເຮັດໃຫ້ສະມາຊິກພັກ ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ມີຄວາມຈົງຮັກພັກດີຕໍ່ອຸດົມການຂອງພັກ, ຍົກສູງສະຕິ, ມີຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ມີຄວາມເປັນເອກະພາບຕໍ່ແນວທາງປ່ຽນແປງໃໝ່ຂອງພັກ, ເປັນເຈົ້າການປົກປ້ອງແນວທາງ ແລະ ອຸດົມການຂອງພັກ. ພ້ອມກັນນັ້ນ ກໍ່ຍັງໄດ້ຍົກໃຫ້ເຫັນບາງຂໍ້ຄົງຄ້າງທີ່ໜ່ວຍພັກ ຈະຕ້ອງໄດ້ເອົາໃຈໃສ່ ເພື່ອແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນ ເພີ່ມທະວີການສຶກສາ ແລະ ຄົ້ນຄ້ວາ ບັນດາມະຕິ, ຄໍາສັ່ງ ຂອງຄະນະພັກຂັ້ນເທິງ ເພື່ອຈັດຕັ້ງປະຕິບັດໃຫ້ສອດຄ່ອງ ແລະ ຖືກຕ້ອງກັບແນວທາງນະໂຍບາຍຂອງພັກ. ຫຼັງຈາກນັ້ນ, ສະຫາຍກໍ່ໄດ້ເປີດໂອກາດໃຫ້ບັນດາສະຫາຍສະມາຊິກພັກ ປະກອບຄຳຄິດຄຳເຫັນໃນບົດສະຫຼຸບ ເພື່ອເຮັດໃຫ້ບົດສະຫຼຸບຂອງໜ່ວຍພັກມີເນື້ອໃນຄົບຖ້ວນກວ່າເກົ່າ.
ໃນຕອນທ້າຍ, ສະຫາຍ ນາງ ວິລາວັນ ເຍ່ຍປໍເຮີ, ເລຂາໜ່ວຍພັກ ໄດ້ຕາງໜ້າຄະນະບໍລິຫານງານພັກກະຊວງການຕ່າງປະເທດໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021ໃຫ້ແກ່ ໜ່ວຍພັກສະຖານທູດລາວປະຈຳ ສ.ຣັດເຊຍ, ພ້ອມທັງໃຫ້ກຽດໂອ້ລົມຕໍ່ທີ່ປະຊຸມ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງຄະນະໜ່ວຍພັກທີ່ໄດ້ມີຄວາມພະຍາຍາມ ແລະ ເຊີດຊູຄວາມຮັບຜິດຊອບສູງໃນການເອົາໃຈໃສ່ ຊີ້ນຳ-ນຳພາໜ່ວຍພັກ, ສະມາຊິກພັກ-ພະນັກງານ ແລະ ຈຸພັກ ທີ່ຂຶ້ນກັບໜ່ວຍພັກສະຖານທູດລາວ ປະຈຳ ຣັດເຊຍ ທີ່ໄດ້ເອົາໃຈໃສ່ໃນການປະຕິບັດໜ້າທີ່ ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນດ້ວຍຜົນສຳເລັດ ເຊິ່ງໄດ້ຍົກໃຫ້ເຫັນເຖິງຄວາມສໍາຄັນ ຂອງວຽກງານປັບປຸງກໍ່ສ້າງຮາກຖານພັກ ໄດ້ເປັນໜ້າທີ່ ແລະ ຄວາມຮັບຜິດຊອບໂດຍກົງຂອງຄະນະພັກ ແລະ ສະມາຊິກພັກ-ພະນັກງານທຸກຄົນ; ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕ້ອງຮັບປະກັນ 5 ຫລັກການ ທີ່ກົມການເມືອງສູນກາງພັກວາງອອກ ແລະ ພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ.
ໜ່ວຍພັກສະຖານທູດ ກໍ່ໄດ້ໃຫ້ຄຳໝັ້ນສັນຍາວ່າ ຈະພ້ອມກັນສູ້ຊົນສືບຕໍ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ດີ ແລະ ຫລາຍກວ່າເກົ່າ ທັງດ້ານປະລິມານ ແລະ ຄຸນນະພາບໃນຕໍ່ໜ້າ.