ໃນຕອນບ່າຍ ຂອງວັນທີ 27 ສິງຫາ 2021, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ເກົາຫຼີ, ທ່ານ ທ່ຽງ ບຸບຜາ, ເອກອັກຄະລັດຖະທູດ ລາວ ປະຈໍາ ສ.ເກົາຫຼີ ໄດ້ຕາງໜ້າໃຫ້ລັດຖະບານ ສປປ ລາວ ໃຫ້ກຽດປະດັບຫຼຽນກາມິດຕະພາບ ແກ່ທ່ານ ຊັງຊູ ໂອ (Sungsoo Oh), ຫົວໜ້າອົງການຮ່ວມມືສາກົນ ສ.ເກົາຫຼີ ແລະ ມອບໃບຍ້ອງຍໍລັດຖະບານໃຫ້ແກ່ທ່ານ ນາງ ວອນຢຸງ ຢໍ (Wongyoung Yeo), ຮອງຫົວໜ້າອົງການຮ່ວມມື ສາກົນ ສ.ເກົາຫຼີ ຫຼື Korea International Cooperation Agency (KOICA) ປະຈໍາ ສປປ ລາວ ທີ່ມີຜົນງານດີເດັ່ນໃນການເຄື່ອນໄຫວປະຕິບັດໜ້າທີ່ວຽກງານ ຢູ່ ສປປ ລາວ ໄລຍະແຕ່ປີ 2017-2020 ແລະ ໄດ້ຮັບຜົນສຳເລັດໃນການປະກອບສ່ວນຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ-ສ.ເກົາຫຼີ.
ໂອກາດນີ້, ທ່ານເອກອັກຄະລັດຖະທູດລາວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວຂອງສອງທ່ານ, ເຊິ່ງຕະຫຼອດໄລຍະການປະຕິບັດໜ້າທີ ຢູ່ ສປປ ລາວ 3 ປີ ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງລາວ ກໍຄື ການຍົກສູງ ແລະ ສົ່ງເສີມການພົວພັນຮ່ວມມືສອງຝ່າຍ ສປປ ລາວ-ສ.ເກົາຫຼີ, ໂດຍສະເພາະໃນດ້ານການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ ແລະ ອື່ນໆ. ໃນຂະນະທີ່, ທ່ານ ຊັງຊູ ໂອ ກໍໄດ້ສະແດງຄວາມຂອບໃຈຕໍ່ລັດຖະບານລາວ ທີ່ໄດ້ເອົາໃຈໃສ່ຍົກສູງບົດບາດຂອງອົງ ການ KOICA ໃນໄລຍະຜ່ານມາ ໂດຍການເຮັດວຽກຮ່ວມກັນຢ່າງໃກ້ຊິດກັບທາງການລາວໃນຂະແໜງການຕ່າງໆ ທີ່ກ່ຽວຂ້ອງ ແລະ ຢືນຢັນວ່າ ສ.ເກົາຫຼີ ຈະສືບຕໍ່ໃຫ້ການຊ່ວຍເຫຼືອ ແລະ ຮ່ວມມືແກ່ ສປປ ລາວ ເພື່ອບັນລຸໝາກຜົນດ້ານຕ່າງໆ ໃນອະນາຄົດຕໍ່ໜ້າ.