ໃນວັນທີ 26 ກໍລະກົດ 2021, ຢູ່ທີ່ສໍານັກງານໃຫຍ່ ອົງການການຄ້າໂລກ (WTO) ທີ່ ເຊີແນວ, ປະເທດສະວິດເຊີແລນ, ທ່ານ ລັດສະໝີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ ທ່ານ ນາງ ເອັນໂງຊີ ໂອກົນໂຈ ອີວຽນລາ (Ngozi Okonjo-Iweala), ຜູ້ອຳນວຍການໃຫຍ່ ອົງການການຄ້າໂລກ ເພື່ອດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການການຄ້າໂລກ.

ພາຍຫລັງການຍື່ນສານຕາຕັ້ງ ກໍໄດ້ມີການພົບປະຢ່າງເປັນທາງການ, ເຊິ່ງທ່ານຜູ້ອໍານວຍການໃຫຍ່ ໄດ້ສະແດງຄວາມຊົມເຊີຍຕໍ່ການມາຮັບໜ້າທີ່ໃຫມ່ ແລະ ຢືນຢັນຈະໃຫ້ການຮ່ວມມືຢ່າງໃກ້ຊິດ ເພື່ອເສີມຂະຫຍາຍການພົວພັນຮ່ວມມືສອງຝ່າຍ ສປປ ລາວ ແລະ ອົງການການຄ້າໂລກ ດ້ານເສດຖະກິດ-ການຄ້າ ໃຫ້ນັບມື້ນັບຮັດແໜ້ນຍິ່ງຂຶ້ນ.

ໃນໂອກາດນີ້, ທ່ານ ລັດສະໝີ ແກ້ວມະນີ ກໍໄດ້ສົ່ງຄວາມຢື້ຢາມຖາມຂ່າວ ແລະ ຄໍາຊົມເຊີຍຢ່າງສຸດໃຈ ຈາກລັດຖະບານ ແຫ່ງ ສປປ ລາວ ຕໍ່ການໄດ້ຮັບການແຕ່ງຕັ້ງເປັນ ຜູ້ອໍານວຍການໃຫຍ່ອົງການການຄ້າໂລກຂອງ ທ່ານ ນາງ ໂອກົນໂຈ ອີວຽນລາ, ເຊິ່ງເປັນຜູ້ຍິງຄົນທໍາອິດຈາກທະວີບອາຟຣິກກາ ແລະ ຢືນຢັນຈະເຮັດວຽກຢ່າງໃກ້ຊິດກັບ ທ່ານຜູ້ອໍານວຍການໃຫຍ່ ເພື່ອປະກອບສ່ວນເຂົ້າໃນການສ້າງສັນຕິພາບ, ຄວາມວັດທະນະຖາວອນ ແລະ ການຮ່ວມມື ເພື່ອການພັດທະນາ ຢູ່ບັນດາພາກພື້ນ ແລະໃນໂລກ.

ພ້ອມນີ້, ທ່ານເອກອັກຄະລັດຖະທູດ ວິສາມັນຜູ້ມີອໍານາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ, ຍັງໄດ້ຢືນຢັນເຖິງນະໂຍບາຍອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສປປ ລາວ ໃນການສະໜັບສະໜູນກົນໄກດ້ານເສດຖະກິດ-ການຄ້າ ແບບຫລາຍຝ່າຍ ແລະ ໄດ້ສະແດງຄວາມຊົມເຊີຍ ຕໍ່ບົດບາດອັນສໍາຄັນຍິ່ງຂອງອົງການການຄ້າໂລກ ໃນໄລຍະຜ່ານມາ, ພິເສດແມ່ນ ການປະກອບສ່ວນເຂົ້າໃນການແກ້ໄຂຜົນກະທົບອັນໜັກໜ່ວງ ຈາກການແຜ່ລະບາດຂອງພະຍາດໂຄວິດ-19 ຕໍ່ຊີວິດຂອງມວນມະນຸດ ກໍຄື ເສດຖະກິດ, ລວມທັງການຮັບປະກັນເຮັດແນວໃດ ເຮັດໃຫ້ການເຂົ້າເຖິງວັກແຊ້ງຕ້ານໂຄວິດ-19 ແບບເທົ່າທຽມກັນ ແລະ ມີລາຄາທີ່ສົມເຫດສົມຜົນ ສໍາລັບປະເທດກໍາລັງພັດທະນາ ແລະ ດ້ອຍພັດທະນາ ລວມທັງ ສປປ ລາວ ເຮົາ.

ໃນຕອນທ້າຍ, ທ່ານເອກອັກຄະລັດຖະທູດ ວິສາມັນຜູ້ມີອໍານາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ຍັງໄດ້ຢໍ້າຄືນເຖິງຄວາມກຽມພ້ອມຂອງລັດຖະບານ ແຫ່ງ ສປປ ລາວ ກໍຄື ສໍານັກງານຜູ້ຕາງໜ້າຖາວອນທີ່ເຊີແນວ ທີ່ຈະໃຫ້ການຮ່ວມມືຢ່າງໃກ້ຊິດກັບ ອົງການການຄ້າໂລກ ແລະ ບັນດາປະເທດສະມາຊິກ ເພື່ອຮັດແໜ້ນບົດບາດຂອງອົງການການຄ້າໂລກ ໃຫ້ນັບມື້ນັບເພີ່ມທະວີ ແລະ ໄດ້ສະເໜີໃຫ້ອົງການການຄ້າໂລກສະໜັບສະໜູນ 2 ຂໍ້ລິເລີ່ມ ຂອງ ສປປ ລາວ ຄື: ການຄໍ້າປະກັນສະບຽງອາຫານ ພາຍໃຕ້ຂະແໜງການກະສິກໍາ (Food Security under Agriculture sector) ແລະ ການອໍານວຍຄວາມສະດວກດ້ານການລົງທຶນ ເພື່ອການຮ່ວມມືເພື່ອການພັດທະນາ (Investment Facilitation for Development) ເພື່ອກອງປະຊຸມລະດັບລັດຖະມົນຕີ ອົງການການຄ້າໂລກ ຄັ້ງທີ 12 (12^th Ministerial Conference (MC 12)) ທີ່ຈະມີຂຶ້ນໃນຕົ້ນເດືອນ ທັນວາ 2021 ພິຈາລະນາຮັບຮອງເອົາ.