ໃນວັນທີ 08 ເມສາ2021ທີ່ ສະຖາບັນການຕ່າງປະເທດ ໄດ້ຈັດພິທີປິດຊຸດຝຶກອົບຮົມທິດສະດີການເມືອງ ແລະ ການປົກຄອງ ລະບົບ 45 ວັນຊຸດທີ V.ຂອງກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ,ໂດຍໃຫ້ກຽດເຂົ້າຮ່ວມເປັນປະທານຮ່ວມ ຂອງ ທ່ານຕິ່ງ ສຸກສັນ, ຄະນະປະຈຳພັກກະ ຊວງ, ຫົວໜ້າກົມຈັດຕັ້ງ ແລະ ພະນັກງານ, ກະຊວງການຕ່າງປະເທດແລະ​ທ່ານ ປອ ນ. ໄກສອນ ຈັນສີນາ, ຄະ​ນະບໍລິຫານງານພັກ, ຫົວໜ້າກົມຄຸ້ມຄອງການຮຽນ - ການສອນ, ສະຖາບັນການເມືອງ ແລະ ການປົກຄອງແຫ່ງຊາດ,ພ້ອມທັງບັນດາຫົວໜ້າກົມ, ຄະນະກົມ ຂອງກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ຜູ້ເຂົ້າຮ່ວມຊຸດຝຶກອົບຮົມທັງໝົດປະ ມານ 90 ທ່ານ. ຊຸດຝຶກອົບຮົມດັ່ງກ່າວນີ້ແມ່ນໄດ້ດໍາເນີນມາແຕ່ວັນທີ 08ກຸມພາ 2021ເປັນຕົ້ນມາ, ເຊິ່ງມີຜູ້ເຂົ້າຮ່ວມຝຶກອົບຮົມທັງໝົດ50ທ່ານ, ຍິງ 18 ທ່ານ, ທີ່ມາຈາກກະຊວງການຕ່າງປະເທດ 44 ທ່ານ ແລະ ຄະນະພົວພັນຕ່າງປະເທດສູນກາງພັກ 06 ທ່ານ.

ໃນພິທີດັ່ງກ່າວ, ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ, ໄດ້ຂື້ນກ່າວສະຫຼຸບລາຍງານຜົນການຝຶກອົບຮົມຕະຫຼອດໄລຍະ 45ວັນຜ່ານມາ, ຊຶ່ງໄດ້ຕີລາຄາຢ່າງຮອບດ້ານ ກ່ຽວກັບການຮຽນ-ການສອນທີ່ຜູ້ເຂົ້າຮ່ວມໄດ້ຮຽນຮູ້, ເຊິ່ງລວມມີ 5ພາກວິຊາຄື:1)ພາກວິຊາປັດຊະຍາ, 2)ພາກວິຊາເສດຖະສາດການເມືອງ, 3) ພາກວິຊາລັດທິສັງຄົມນິຍົມວິທະຍາສາດ, 4) ພາກວິຊາບໍລິຫານສາດແລະ 5)ພາກວິຊາກໍ່ສ້າງພັກ ແລະ ປະຫວັດສາດພັກ.ແຕ່ລະພາກວິຊາຮຽນຂອງການຝຶກອົບຮົມ ແມ່ນໄດ້ເຊື້ອເຊີນນັກວິທະຍາກອນ ຈາກສະຖາບັນການເມືອງ ແລະ ການປົກຄອງແຫ່ງຊາດມາຂຶ້ນຫ້ອງບັນຍາຍ ຊຶ່ງເຮັດໃຫ້ຜູ້ເຂົ້າຮ່ວມຝຶກອົບຮົມມີຄວາມເຂົ້າໃຈຢ່າງເລິກເຊິ່ງກ່ຽວກັບພື້ນຖານຂອງລັດທິມາກ-ເລນິນ ເພື່ອນຳໄປໝູນໃຊ້ເຂົ້າໃນການປະຕິບັດວຽກງານໃນຕໍ່ໜ້າ. ນອກ ຈາກຄົ້ນຄວ້າຮ່ຳຮຽນທິດສະດີ ແລະ ພຶດຕິກໍາຕົວຈິງແລ້ວ, ຜູ້ເຂົ້າຮ່ວມຝຶກອົບຮົມກໍ່ໄດ້ເຄື່ອນໄຫວກິດຈະກໍານອກຫຼັກສູດເຊັ່ນ: ຢ້ຽມຢາມຫໍພິພິທະພັນ ປະທານ ໄກສອນ ພົມວິຫານ, ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເພື່ອໃຫ້ກຳໄດ້ ກ່ຽວກັບປະຫວັດສາດ, ໂດຍສະເພາະແມ່ນການເຄື່ອນໄຫວໃນພາລະກິດຕໍ່ສູ້ປົດປ່ອຍຊາດ ແລະ ວິລະກຳຂອງ ປະທານ ໄກສອນ ພົມວິຫານ ໃນແຕ່ລະໄລຍະ. ພ້ອມກັນນັ້ນ, ຍັງໄດ້ຢ້ຽມຢາມສະຖາບັນການ ເມືອງ ແລະ ການປົກຄອງແຫ່ງຊາດ ເພື່ອຮັບຟັງກ່ຽວກັບປະຫວັດຄວາມເປັນມາ, ພາລະບົດບາດ ແລະ ໂຄງການຫຼັກສູດຕ່າງໆທີ່ດຳເນີນຢູ່ ສະຖາບັນການເມືອງ ແລະ ການປົກຄອງແຫ່ງຊາດ.

ໃນຕອນທ້າຍຂອງພິທີ, ທ່ານຕິ່ງ ສຸກສັນ, ປະທານພິທີ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳແກ່ຜູ້ເຂົ້າຝຶກອົບຮົມ ຈົ່ງເອົາໃຈໃສ່ ນຳເອົາຄວາມຮູ້ທີ່ໄດ້ຈາກການຝຶກອົບຮົມຄັ້ງນີ້ ໄປປະຕິບັດ ແລະ ຈັດຕັ້ງຜັນຂະຫຍາຍເຂົ້າໃນການເຄື່ອນໄຫວວຽກງານຕົວຈິງຂອງຕົນ ເພື່ອເຮັດໃຫ້ໜ້າທີ່ວຽກງານທີ່ຕົນເອງຮັບຜິດຊອບ ມີຜົນສຳເລັດຢ່າງສູງ, ຮຽກຮ້ອງໃຫ້ຜູ້ເຂົ້າຮ່ວມຝຶກອົບຮົມ ໃນຖານະເປັນພະນັກງານຫຼັກແຫຼ່ງຜູ້ສືບທອດ ຕ້ອງພະຍາຍາມ ແລະ ເອົາໃຈໃສ່ຄົ້ນຄວ້າບັນດາເນື້ອໃນເອກະສານການເມືອງ, ເຊື່ອມຊືມເນື້ອແທ້ທິດສະດີມາກ - ເລນິນ, ກຳແໜ້ນແນວ ທາງນະໂຍບາຍ ແລະ ມະຕິກອງປະຊຸມໃຫ່ຍຄັ້ງທີ XIຂອງພັກປະຊາຊົນປະຕິວັດລາວທີ່ວາງອອກໃຫ້ເລິກເຊິ່ງ.