ໃນວັນທີ 04 ມີນາ 2021, ທີ່ ສະຖາບັນການຕ່າງປະເທດ, ໄດ້ຈັດກອງປະຊຸມສຳມະນາພາຍໃຕ້ຫົວຂໍ້: “ການຖອນຕົວອອກຈາກສະຫະພາບເອີຣົບຂອງອັງກິດ: ກາລະໂອກາດ ແລະ ສິ່ງທ້າທາຍຂອງ ສປປ ລາວ” ໃຫ້ກຽດເຂົ້າຮ່ວມບັນຍາຍໂດຍ ທ່ານ John PEARSON, ເອກອັກຄະລັດຖະທູດອັງກິດ ປະຈຳ ສປປ ລາວ, ທ່ານທູດ ໄຊຍະການ ສີສຸວົງ, ປະທານສະມາຄົມມິດຕະພາບ ລາວ-ອັງກິດ ແລະ ທ່ານ ທະນົງສິນ ກັນລະຍາ, ຮອງປະທານສະພາການຄ້າ ແລະ ອຸດສະຫະກຳແຫ່ງຊາດລາວ.
ກອງປະຊຸມສຳມະນາຄັ້ງນີ້ ເປັນກອງປະຊຸມເປີດກວ້າງໃຫ້ທັງພາກລັດຖະບານ ແລະ ພາກທຸລະກິດ ໄດ້ມີໂອກາດພົບປະໂອ້ລົມ ແລະ ສົນທະນາ ກ່ຽວກັບ ສະພາບການໃນປັດຈຸບັນ ທີ່ມີທັງກາລະໂອກາດ ແລະ ສິ່ງທ້າທາຍ. ພ້ອມດຽວກັນນັ້ນ, ກໍແລກປ່ຽນຄຳຄິດຄຳເຫັນໃນການດຶງດູດ ແລະ ຍາດແຍ່ງການພົວພັນຮ່ວມມືທາງດ້ານການຄ້າ ແລະ ການລົງທຶນ ກັບອັງກິດໃນຕໍ່ໜ້າ, ທັງເພື່ອເປັນການຮັດແໜ້ນ ແລະ ເສີມຂະຫຍາຍສາຍພົວພັນອັນດີງາມ ລະຫວ່າງສອງປະເທດ ລາວ ແລະ ອັງກິດ. ໃນກອງປະຊຸມ, ນອກຈາກຜູ່ເຂົ້າຮ່ວມໄດ້ຮັບຟັງສະພາບການທາງດ້ານການຄ້າ ແລະ ການລົງທຶນ ລວມທັງທັດສະນະແລະນະໂຍບາຍການຕ່າງປະເທດຂອງອັງກິດ ຕໍ່ ສປປ ລາວ, ສະພາບການພົວພັນຮ່ວມມື ລາວ-ອັງກິດ ໃນໄລຍະທີ່ຜ່ານມາ ກໍຄືແຜນການຮ່ວມມືໃນອະນາຄົດແລ້ວ, ຍັງໄດ້ຮັບຟັງທັດສະນະ ແລະ ແຜນການຮ່ວມມືໃນຕໍ່ໜ້າຂອງພາກທຸລະກິດ.
ສະຫະຣາຊະອານາຈັກອັງກິດ ໄດ້ປະກາດຖອນຕົວອອກຈາກສະຫະພາບເອີຣົບ ຢ່າງເປັນທາງການ ໃນວັນທີ 31 ມັງກອນ 2020 ເພື່ອສີ້ນສຸດການເປັນສະມາຊິກທີ່ມີໄລຍະຍາວນານເຖິງ 48 ປີ, ເຖິງແມ່ນວ່າການຖອນຕົວຈະມີຂຶ້ນຢ່າງເປັນທາງການ ແຕ່ກໍຍັງມີຄວາມຈຳເປັນທີ່ຈະຕ້ອງໄດ້ເຈລະຈາ ເພື່ອບັນລຸຂໍ້ຕົກລົງຕ່າງໆ ເຊິ່ງໄລຍະເວລາການດຳເນີນການປ່ຽນຜ່ານດັ່ງກ່າວ ໄດ້ເຮັດສຳເລັດໃນວັນທີ 31 ທັນວາ 2020. ການເຈລະຈາບັນລຸຂໍ້ຕົກລົງ ໄດ້ກວມເອົາຫລາຍບັນຫາເຊັ່ນ: ເສລີພາບໃນການເດີນທາງເຂົ້າ-ອອກປະເທດ, ການເກັບພາສີອາກອນ, ບັນຫາດ້ານຄວາມໝັ້ນຄົງພາຍໃນພາກພື້ນ, ຂໍ້ຕົກລົງການຄ້າ-ການລົງທຶນ ແລະ ທິດທາງນະໂຍບາຍການຕ່າງປະເທດໃນຕໍ່ໜ້າ ເຊິ່ງມີຜົນບັງຄັບໃຊ້ນັບແຕ່ວັນທີ 01 ມັງກອນ 2021 ເປັນຕົ້ນມາ. ການຖອນຕົວອອກຈາກສະຫະພາບເອີຣົບຂອງອັງກິດ ແລະ ຂໍ້ຕົກລົງທີ່ກຳລັງມີຜົນບັງຄັບໃຊ້ ໄດ້ສ້າງປະກົດການໃໝ່ໃນເວທີການເມືອງ, ການຄ້າ-ການລົງທຶນ ແລະ ກຳລັງເປັນທີ່ຈັບຕາຂອງພາກພື້ນ ແລະ ສາກົນ ທີ່ວ່າການຫັນປ່ຽນດັ່ງກ່າວຈະເປັນໄປໃນທິດທາງໃດໃນອະນາຄົດ ແລະ ພ້ອມດຽວກັນ, ບັນດາປະເທດທີ່ເຄີຍເປັນຄູ່ຄ້າກັບ ສະຫະພາບເອີຣົບ ກໍ່ຕ້ອງໄດ້ມີການເຈລະຈາປຶກສາຫາລືກັບປະເທດອັງກິດ ເພື່ອສ້າງຂໍ້ຕົກລົງການຄ້າ-ການລົງທຶນສອງຝ່າຍນຳກັນໃໝ່ ເພື່ອຕອບສະໜອງສະຖານະພາບການເປັນເອກະລາດ ຈາກສະຫະພາບເອີຣົບຂອງອັງກິດ.