ໃນລະຫວ່າງວັນທີ 05-11ກໍລະກົດ2020, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບ ສະຫາຍ ຫງວຽນແທງຟອງ ກຳມະການສູນກາງພັກ ປະທານຄະນະກຳມະການປະຊາຊົນ ນະຄອນໂຮ່ຈິມິນ, ສະຫາຍ ເຈີ່ນວັນນາມ ກຳມະການສູນກາງພັກ, ເລຂາພັກແຂວງບິ່ງເຍືອງ, ສະຫາຍ ຫງວຽນຫົງຫຼິ່ງ, ກຳມະການສູນກາງພັກ, ເລຂາພັກແຂວງບ່າເລຍວຸ້ງເຕົ່າ ແລະ ເຂົ້າຢ້ຽມຂ່ຳນັບສະຫາຍ ເຈີນກວາງຈຸງ, ກຳມະການສູນກາງພັກເລຂາພັກນະຄອນເກິນເທີ ເນື່ອງໃນໂອກາດດຳລົງຕໍາແໜ່ງເປັນເອກະອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.
ໃນການເຂົ້າຢ້ຽມຂໍ່ານັບພົບປະໃນຄັ້ງນີ້ : ການນຳແຕ່ລະແຂວງສະແດງຄວາມຍິນດີຕ້ອນຮັບ ແລະ ພ້ອມທີ່ຈະສ້າງທຸກເງື່ອນໄຂ ແລະ ອຳນວຍຄວາມສະດວກໃຫ້ສະຫາຍ ເອກອັກຄະລັດຖະທູດ ແຫ່ງ ສປປ ລາວ ໃນໄລຍະທີ່ສະຫາຍມາດຳລົງຕໍ່າແໜ່ງ ແລະ ປະຕິບັດໜ້າທີ່ຢູ່ ສສ ຫວຽດນາມ, ເພື່ອເປັນຂົວຕໍ່ໃຫ້ແກ່ການພົວພັນມິດຕະພາບຄວາມສາມັກຄີພິເສດ ແລະ ໃນການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດຫວຽດນາມ-ລາວ, ລາວ-ຫວຽດນາມ ໂດຍສະເພາະແມ່ນບັນດາແຂວງພາກໃຕ້ ແລະ ແຂວງແຮກສ່ຽວຂອງ ສປປ ລາວໃຫ້ນັບມື້ແຕກດອກອອກຜົນ.
ສະຫາຍ ເອກອັກຄະລັດຖະທູດ ແຫ່ງ ສປປ ລາວ ກໍ່ໄດ້ກ່າວສະແດງຄວາມຂອບໃຈ ມາຍັງບັນດາການນຳ 04ແຂວງພາກໃຕ້ຫວຽດນາມ ທີ່ໄດ້ຕ້ອນຮັບຢ່າງອົບອຸ່ນ ແລະ ໄດ້ຢືນຢັນຈະພະຍາຍາມສຸດຄວາມສາມາດຂອງຕົນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ພ້ອມແລ້ວທີ່ຈະສືບຕໍ່ຊຸກຍູ້ປະຕິບັດບັນດາເນຶ້ອໃນຈິດໃຈທີ່ສອງລັດຖະບານຂອງສອງປະເທດຕົກລົງ ໃຫ້ປະກົດຜົນເປັນຈິງ ໂດຍສະເພາະແມ່ນ ໄດ້ຊຸກຍູ້ຜັນຂະຫຍາຍການພົບປະປະຈຳປີຂອງສອງກົມການເມືອງລາວ-ຫວຽດນາມ ປະຈຳປີ 2020, ກອງປະຊຸມສອງຄະນະກຳມະການຮ່ວມມື ລະຫວ່າງ ລັດຖະບານຂອງສອງປະເທດ ລາວ-ຫວຽດນາມ ແລະ ຫວຽດນາມ-ລາວ ຄັ້ງທີ 42, ພ້ອມກັນນັ້ນ ກໍໄດ້ສະແດງຄວາມຊົມເຊີຍນຳຜົນສຳເລັດໃນການປ້ອງກັນ ແລະ ຄວບຄຸມການລະບາດພະຍາດໂຄວິດ-19 ຂອງສອງປະເທດຍາດມາໄດ້ ທີ່ຍັງບໍ່ທັນມີປະເທດໃດເຮັດໄດ້ໃນໂລກ.
ການນຳແຕ່ລະແຂວງ ກໍ່ໄດ້ລາຍງານສະພາບເສດຖະກິດ-ສັງຄົມຂອງແຕ່ລະແຂວງ ແລະ ຍັງໄດ້ສະເໜີໃຫ້ນັກສຶກສາລາວມາສຶກສາທີ່ພາກໃຕ້ ໂດຍສະພາະແມ່ນ ຂະແໜ່ງກະສິກຳ ແລະ ຂະແໜ່ງສາທາລະນະສຸກ ພ້ອມທັງສະເໜີ ຈັດກິດຈະກຳຮ່ວມກັນ ເພື່ອສົ່ງເສີມວັດທະນະທຳຂອງສອງປະເທດ ເຮັດໃຫ້ຄົນຮຸ່ນໜຸ່ມໄດ້ສຶບທອດມູນເຊື້ອສາຍພົວພັນມິດຕະພາບ ຫວຽດນາມ-ລາວ-ຫວຽດນາມ ແລະ ຈະເອົາໃຈໃສ່ຊຸກຍູ້ການພົວພັນຮ່ວມມືຂອງຄະນະຜູ້ແທນການນໍາຂັ້ນສູງຂອງພັກ-ລັດຂອງ 2 ປະເທດພວກເຮົາ ໃຫ້ມີການແລກປ່ຽນການຢ້ຽມຢາມ ແລະ ທັດສະນະສຶກສາບັນດາແຂວງພາກໃຕ້ຂອງຫວຽດນາມ.
ໂອກາດນີ້ ສະຫາຍແສງເພັດ ຮຸ່ງບຸນຍວງ ສະແດງຄວາມຊົມເຊີຍ ຕໍ່ຜົນສຳເລັດອັນໃຫຍ່ຫຼວງຮອບດ້ານບັນດາແຂວງພາກໃຕ້ຂອງຫວຽດນາມ ທັງໄດ້ສະແດງຄວາມຂອບອົກຂອບໃຈຢ່າງຈິງໃຈ ແລະ ສະແດງຄວາມຮູ້ບຸນຄຸນເປັນຢ່າງສູງຕໍ່ ພັກ-ລັດ, ບັນດາແຂວງພາກໃຕ້ຫວຽດນາມ ກໍຄືຂອງປະຊາຊົນຫວຽດນາມ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນໃຫຍ່ຫຼວງໃຫ້ແກ່ ພັກ-ລັດຖະບານ ແລະ ປະຊາຊົນລາວ ຕະຫຼອດມາ.