ກອງປະຊຸມໃຫຍ່ ຄັ້ງທີ III ຂອງໜ່ວຍພັກສະຖານທູດ ແຫ່ງ ສປປ ລາວ ທີ່ ນະຄອນຫຼວງປາຣີ ໄດ້ຈັດຂຶ້ນໃນຕອນເຊົ້າຂອງວັນທີ 26 ມິຖຸນາ 2020, ມີຜູ້ແທນສົມບູນເຂົ້າຮ່ວມທັງໝົດ 11 ສະຫາຍ, ຍິງ 02 ສະຫາຍ ພາຍໃຕ້ການເປັນປະທານຂອງ ສະຫາຍ ຢົງ ຈັນທະລັງສີ ປະກອບດ້ວຍຄະນະປະທານສອງສະຫາຍຄື: ສະຫາຍ ສາຍສະໝອນ ປຣະສອນໄຊ ແລະ ສະຫາຍ ມໍລະກົດ ວົງໄຊ.
ບັນດາສະຫາຍສະມາຊິກພັກທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ໄດ້ສຸມສະຕິປັນຍາ ຂອງຕົນເຂົ້າໃນການຄົ້ນຄວ້າປະກອບຄຳຄິດຄໍາເຫັນ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ວາງໄວ້. ກອງປະຊຸມໃຫຍ່ ຄັ້ງທີ III ຂອງໜ່ວຍພັກສະຖານທູດ ແຫ່ງ ສປປ ລາວ ທີ່ປາຣີ ໄດ້ຮັບຮອງເອົາ ບົດລາຍງານການເມືອງ ລວມທັງທິດແຜນການໃນຕໍ່ໜ້າຂອງໜ່ວຍພັກສະຖານທູດ ແລະ ບົດສໍາຫລວດການນໍາພາ ຂອງ ຄະນະພັກຊຸດເກົ່າ, ກອງປະຊຸມໄດ້ຕີລາຄາ ດ້ານດີ, ດ້ານອ່ອນ, ຄ້າງຄາ ແລະ ສາຍເຫດ, ບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິຂອງກອງປະຊຸມໃຫຍ່ໃນ 5 ປີ ທີ່ຜ່ານມາ, ພ້ອມນີ້ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ ແລະ ແຜນການ 5 ປີ ນັບແຕ່ 2020 ຮອດປີ 2025, ເຊິ່ງມີເນື້ອໃນຕົ້ນຕໍດັ່ງນີ້: 1). ສ້າງໃຫ້ໜ່ວຍພັກມີຄວາມເຂັ້ມແຂງ, ມີຄວາມປອດໃສຂາວສະອາດ ແລະ ມີການປັບປຸງໃຫ້ສອດຄ່ອງ ແລະ ແທດເໝາະກັບສະພາບການຕົວຈິງ ຂອງການເຄື່ອນໄຫວປະຕິບັດວຽກງານໃນແຕ່ລະໄລຍະ. ມີຄວາມເປັນເອກະພາບໃນໜ່ວຍພັກໃຫ້ມີການນຳພາທີ່ດີ ແລະ ກ້າວໄປເຖິງການສ້າງໜ່ວຍພັກແຂງ-ຮູ້ນຳພາຮອບດ້ານ ໃນປີ 2023; 2). ສ້າງໃຫ້ໜ່ວຍພັກກາຍເປັນໜ່ວຍພັກ ທີ່ນຳພາໃນຂົງເຂດວຽກງານວິຊາສະເພາະ ໂດຍສະເພາະວຽກງານການເຄື່ອນໄຫວວຽກງານການທູດ ແລະ ການຕ່າງປະເທດ ໃຫ້ມີປະສິດທິພາບ ແລະ ປະສິດທິຜົນນັບມື້ນັບສູງຂື້ນເລື້ອຍໆ; 3). ລົງເລິກວຽກງານຂົນຂວາຍຄົນເຊື້ອຊາດລາວໃຫ້ໄດ້ຢ່າງທົ່ວຖິງ ທົ່ວປະເທດຝຣັ່ງ; ແລະ 4). ຕັ້ງໜ້າປະຕິບັດໜ້າທີ່ວຽກງານໃນແຕ່ລະດ້ານ ໃຫ້ສຳເລັດຕາມແຜນການທີ່ວາງໄວ້, ແລະ ກຽມພ້ອມ ປະຕິບັດຄໍາສັ່ງແນະຕາມການຊີ້ນຳຂອງຂັ້ນທຸກເວລາ.
ກອງປະຊຸມໄດ້ຟັງການປະກອບຄໍາຄິດຄໍາເຫັນ ຂອງບັນດາພະແນກຂອງສະຖານທູດ ທັງໝົດແມ່ນໄດ້ສະແດງໃຫ້ເຫັນເຖິງຄວາມເອກະພາບ ຕໍ່ບົດລາຍງານການເມືອງ ແລະ ທິດທາງແຜນການ ທີ່ໄດ້ສະເໜີຕໍ່ກອງປະຊຸມຄັ້ງນີ້, ພ້ອມທັງຈະນໍາເອົາທິດທາງແຜນການດັ່ງກ່າວໄປຜັນຂະຫຍາຍໃນພະແນກຂອງຕົນ ໃຫ້ປະສົບຜົນສໍາເລັດຕາມລະດັບຄາດໝາຍ. ການປະກອບຄໍາຄິດຄໍາເຫັນລ້ວນແລ້ວແຕ່ເປັນການປະກອບໃຫ້ບົດລາຍງານການເມືອງ ແລະ ທິດທາງແຜນການ ມີເນື້ອໃນເລິກເຊິ່ງຂຶ້ນຕື່ມອີກ.
ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນ ບ່ອນບັດເລືອກເອົາ ຄະນະພັກຊຸດໃໝ່. ກອງປະຊຸມຄັ້ງປະຖົມມະເລິກ ຂອງຄະນະໜ່ວຍພັກຊຸດໃໝ່ໄດ້ເຫັນດີເປັນເອກະສັນເລືອກເອົາ ສະຫາຍ ຢົງ ຈັນທະລັງສີ, ເປັນເລຂາໜ່ວຍພັກ, ສະຫາຍ ສາຍສະໝອນ ປຣະສອນໄຊ ເປັນຮອງເລຂາໜ່ວຍພັກ ແລະ ສະຫາຍ ເຄນ ຄັດທະວົງສາ ເປັນຮອງເລຂາໜ່ວຍພັກ.
ກອງປະຊຸມໄດ້ຮັບຟັງການໂອ້ລົມຈາກ ສະຫາຍ ຢົງ ຈັນທະລັງສີ, ທັງເປັນປະທານ ແລະ ເລຂາໜ່ວຍພັກຜູ້ໃໝ່, ເຊິ່ງສະຫາຍໄດ້ເນັ້ນໜັກວ່າ ໃນທີ່ຜ່ານມາໜ່ວຍພັກ ຂອງ ພວກເຮົາໄດ້ເຄື່ອນໄຫວວຽກງານນຳພາດີ ເຮັດໃຫ້ໜ່ວຍພັກກໍ່ຄືສຳນັກງານສະຖານທູດ ບັນລຸຜົນສຳເລັດທີ່ພົ້ນເດັ່ນ ຄື: 1). ພະນັກງານພວກເຮົາ ເຊື່ອໝັ້ນຕໍ່ການນໍາພາຂອງ-ພັກລັດຢ່າງຕາຍໃຈ, ມີຄວາມສາມັກຄີ ຮັກແພງເຊິ່ງ ກັນແລະກັນດີ; 2). ປະຕິບັດວຽກງານສາຍພັກ ແລະ ສາຍລັດ (ວິຊາສະເພາະ) ດີ; 3). ຂົນຂວາຍຄົນເຊື້ອຊາດລາວໄດ້ດີເປັນພິເສດ; ແລະ 4). ປະຕິບັດລະບຽບ ຂອງສະຖານທູດ ແລະ ກົດໝາຍປະເທດເຈົ້າພາບດີ.
ສະຫາຍເລຂາ ໄດ້ເນັ້ນໜັກບໍ່ໃຫ້ພະນັກງານຂອງພວກເຮົາປະໝາດ ຈົ່ງພ້ອມກັນໃຫ້ມິສະຕິລະວັງຕົວຕໍ່ລະບຽບວິໃນ ແລະ ການຈັດຕັ້ງ ຢູ່ສະເໜີ ແລະ ໃຫ້ສືບຕໍ່ຮັກສາມູນເຊື້ອທີ່ມີຜົນງານດີເດັ່ນຄືໃນໄລຍະຜ່ານມາ ແລະ ຮຽກຮ້ອງມາຍັງບັນດາສະມາຊິກພັກ ແລະ ພະນັກງານ ຂອງ ສະຖານທູດທັງໝົດ ຈົ່ງໄດ້ເຊີດຊູສະຕິ ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ແລະ ວິຊາສະເພາະຂອງຕົນ ເພື່ອປະກອບສ່ວນເຮັດໃຫ້ວຽກງານສາຍພັກກໍ່ຄືສາຍລັດ ຂອງສະຖານທູດ ມີການຫັນປ່ຽນໃໝ່ ຢ່າງຕັ້ງໜ້າ, ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຢູ່ສະເໜີ.