ໃນຕອນເຊົ້າຂອງວັນທີ 28 ພຶດສະພາ 2020 ຜ່ານມາ, ທີ່ ຫ້ອງປະຊຸມພັກ, ກະຊວງການຕ່າງປະເທດ, ກອງປະຊຸມໃຫຍ່ ຄັ້ງທີ II ຂອງໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ໄດ້ໄຂຂຶ້ນຢ່າງເປັນທາງການ, ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ, ມີສະຫາຍເລຂາໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ, ບັນດາສະຫາຍເລຂາ, ຮອງເລຂາ, ສະມາຊິກພັກສົມບູນ, ສະມາຊິກພັກສຳຮອງ, ສາມອົງການຈັດຕັ້ງມະຫາຊົນຂອງ ກົມພົວພັນຄົນເຊື້ອຊາດລາວຢູ່ຕ່າງປະເທດ ແລະ ແຂກຖືກເຊີນ ທີ່ຕາງໜ້າໜ່ວຍພັກອ້ອມຂ້າງກະຊວງການຕ່າງປະເທດ ເຂົ້າຮ່ວມລວມທັງໝົດ 31 ສະຫາຍ.
ໃນກອງປະຊຸມ, ສະຫາຍ ໄພລາມ ອຸດົມຄຳ, ເລຂາໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ ໄດ້ຜ່ານບົດລາຍງານການເມືອງ ແລະ ບົດສະຫຼຸບສຳຫຼວດການຊີ້ນຳ-ນຳພາລວມຂອງຄະນະໜ່ວຍພັກຊຸດເກົ່າໃນໄລຍະ 5 ປີຜ່ານມາ, ເຊິ່ງໄດ້ສັງເກດຕີລາຄາຜົນສຳເລັດ, ຂໍ້ຫຍຸ້ງຍາກ ແລະ ບາງບົດຮຽນທີ່ຖອດຖອນໄດ້ໃນການຊີ້ນຳ ນຳພາຂອງຄະນະໜ່ວຍພັກ. ພ້ອມດຽວກັນນີ້, ກໍໄດ້ກຳນົດທິດທາງແຜນການ ແລະ ໜ້າທີ່ຈຸດສຸມ ສຳລັບປີ 2020-2025 ໂດຍອີງຕາມເນື້ອໃນບົດລາຍງານການເມືອງຂອງກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ, ວິໄສທັດ ຮອດປີ 2030, ພ້ອມທັງກໍານົດວິທີການຈັດຕັ້ງປະຕິບັດ ທິດທາງແຜນການທີ່ໄດ້ກໍານົດໄວ້ ໃຫ້ປະກົດຜົນເປັນຈິງ.
ໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ ມີສະມາຊິກພັກທັງໝົດ 25 ສະຫາຍ, ຍິງ 7 ສະຫາຍ, ສຳຮອງ 3 ສະຫາຍ, ອາວຸໂສບຳນານ 4 ສະຫາຍ, ເຜົ່າລາວ 22 ສະຫາຍ, ເຜົ່າມົ້ງ 2 ສະຫາຍ ແລະ ເຜົ່າກຶມມຸ 1 ສະຫາຍ. ໃນໄລຍະ 5 ປີ ຜ່ານມາ, ໜ່ວຍພັກ ໄດ້ເສີມຂະຫຍາຍບົດບາດການຊີ້ນຳ-ນຳພາຂອງຕົນ, ສາມາດຍາດໄດ້ຜົນງານທີ່ພົ້ນເດັ່ນຫຼາຍດ້ານ, ເປັນຕົ້ນແມ່ນການກໍ່ສ້າງ ແລະ ຂະຫຍາຍພັກໄດ້ດຳເນີນຢ່າງຕໍ່ເນື່ອງ ໂດຍຖືເອົາຄຸນະພາບເປັນກົກ ແລະ ຕິດພັນກັບຂະບວນການເຄື່ອນໄຫວຂອງອົງການຈັດຕັ້ງມະຫາຊົນ, ເຊິ່ງສາມາດກໍ່ສ້າງມະຫາຊົນກ້າວໜ້າ ເພື່ອຂະຫຍາຍເຂົ້າໃນຖັນແຖວຂອງພັກໄດ້ທັງໝົດ 11 ສະຫາຍ, ໄດ້ເປັນເສນາທິການໃຫ້ແກ່ຂັ້ນເທິງ ໃນການປະຕິບັດໜ້າທີ່ວິຊາສະເພາະໄດ້ເປັນຢ່າງດີ, ເປັນຕົ້ນດ້ານການສະຫຼຸບລາຍງານສະພາບການສາກົນ ແລະ ສະພາບຄົນເຊື້ອຊາດລາວຢູ່ຕ່າງປະເທດ, ການຄົ້ນຄວ້າສ້າງນະໂຍບາຍ ແລະ ນິຕິກຳຕ່າງໆສະເພາະ ຕໍ່ຄົນເຊື້ອຊາດລາວຢູ່ຕ່າງປະເທດ, ການພົວພັນປະສານງານ ລະຫວ່າງກະຊວງ ກັບຄະນະຜູ້ແທນຄົນເຊື້ອຊາດລາວຢູ່ຕ່າງປະເທດ, ການເກັບກຳຂໍ້ມູນສະຖິຕິຄົນເຊື້ອຊາດລາວຢູ່ຕ່າງປະເທດ, ການໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລັດຖະບານ ແຫ່ງ ສປປ ລາວ ທີ່ມີສະເພາະຕໍ່ຄົນເຊື້ອຊາດຢູ່ຕ່າງປະເທດຜ່ານສື່ຕ່າງໆ. ຈາກຜົນງານທັງໝົດເຫຼົ່ານີ້, ເຮັດໃຫ້ໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ ໄດ້ຮັບການຍ້ອງຍໍບຸກຄົນ ແລະ ກົມກອງລວມໝູ່ ຈາກລັດຖະບານປະເທດເພື່ອນມິດ 1 ຄັ້ງ ແລະ ຍັງໄດ້ຮັບນາມມະຍົດເປັນໜ່ວຍພັກແຂງ ຮູ້ນຳພາຮອບດ້ານ 1 ຄັ້ງ ແລະ ກະກຽມຮັບການຕົກລົງເຫັນດີຈາກຄະນະພັກຂັ້ນເທິງ ໃຫ້ເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ເປັນຄັ້ງທີ 2 ຕິດຕໍ່ກັນ.
ສໍາລັບທິດທາງແຜນການຈຸດສູມຂອງໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ ໃນໄລຍະ ປີ 2020-2025 ແມ່ນຈະໄດ້ສຸມໃສ່ວຽກງານກໍ່ສ້າງພັກ-ພະນັກງານ, ຂະຫຍາຍພັກຢ່າງມີຈຸດສຸມ ແລະ ມີຄຸນນະພາບ, ເອົາໃຈໃສ່ສຶກສາອົບຮົມທາງດ້ານການເມືອງແນວຄິດ ໃຫ້ສະມາຊິກພັກ-ພະນັກງານ, ຍົກສູງຄຸນນະພາບໃນການເປັນເສນາທິການ ໃຫ້ຄະນະພັກ, ຄະນະນໍາກະຊວງ, ເພີ່ມທະວີຄວາມເອົາໃຈໃສ່ຍົກບົດບາດຂອງ 3 ອົງການຈັດຕັ້ງມະຫາຊົນ ເພື່ອກໍ່ສ້າງ ແລະ ນຳພາມະຫາຊົນ ໃຫ້ກາຍເປັນສະມາຊິກທີ່ກ້າວໜ້າ ແລະ ຮັບປະກັນໃຫ້ມີຄຸນນະພາບ ແນ່ໃສ່ສ້າງໃຫ້ເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃຫ້ໝັ້ນຄົງຍາວນານຕະຫຼອດໄປ.
ຜູ້ແທນກອງປະຊຸມ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ຈຳນວນ 3 ສະຫາຍ ແລະ ໃນກອງປະຊຸມຄັ້ງປະຖົມມະເລີກ ຂອງຄະນະໜ່ວຍພັກຊຸດໃໝ່ ໄດ້ເປັນເອກະພາບເລືອກເອົາ ສະຫາຍ ໄພລາມ ອຸດົມຄຳ ເປັນເລຂາໜ່ວຍພັກ; ສະຫາຍ ສົມໄຊ ລໍຈືເລຍ ເປັນຮອງເລຂາ; ສະຫາຍ ສົມສັກ ວິໄລທອນ ເປັນກໍາມະການໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ.
ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ, ເຊິ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກ ກົມພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ໃນໄລຍະຜ່ານມາ ແລະ ໄດ້ໃຫ້ທິດຊີ້ນຳ ໃຫ້ໜ່ວຍພັກສືບຕໍ່ເສີມຂະຫຍາຍມູນເຊື້ອຂອງຕົນ, ໃຫ້ຖືວຽກງານກໍ່ສ້າງພັກ-ພະນັກງານ ເປັນບຸລິມະສິດຕົ້ນຕໍ, ເພີ່ມທະວີການນຳພາດ້ານການເມືອງ-ແນວຄິດ ຕໍ່ສະມາຊິກພັກ-ພະນັກງານ ກົມພົວພັນຄົນເຊື້ອຊາດລາວຢູ່ຕ່າງປະເທດ, ເພີ່ມທະວີຄວາມສາມັກຄີພາຍໃນໜ່ວຍພັກ, ຍົກສູງຫຼັກການລວມສູນປະຊາທິປະໄຕ, ກໍ່ສ້າງຂະຫຍາຍສະມາຊິກພັກໃຫ້ໄດ້ຄຸນນະພາບ, ການກໍ່ສ້າງບໍາລຸງພະນັກງານດ້ານພາສາຕ່າງປະເທດ ຄຽງຄູ່ກັບຄວາມຮູ້ດ້ານວິຊາສະເພາະ, ສືບຕໍ່ຊີ້້ນຳ-ນຳພາຢ່າງໃກ້ຊິດຕໍ່ 3 ອົງການຈັດຕັ້ງມະຫາຊົນ, ເພີ່ມທະວີວຽກງານກວດກາໃຫ້ເຂັ້ມແຂງ ແລະ ຍົກສູງປະສິດທິພາບ ປະສິດທິຜົນ ໃນການປະຕິບັດໜ້າທີ່ວິຊາສະເພາະໃນດ້ານຕ່າງໆ, ພ້ອມກັນສູ້ຊົນບຸກບືນ ແລະ ເຊີດຊູຄວາມເປັນເຈົ້າການ ແລະ ຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ສາມາດຍາດໄດ້ຜົນສຳເລັດອັນໃໝ່ໃຫຍ່ຫຼວງກວ່າເກົ່າ, ສືບຕໍ່ຮັກສາໄດ້ນາມມະຍົດໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ເປັນສະໄໝທີສາມຕາມແຜນການ.
ໃນຕອນທ້າຍກອງປະຊຸມ, ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ ໄດ້ໃຫ້ກຽດຖ່າຍຮູບຮ່ວມກັບບັນດາແຂກຖືກເຊີນ ແລະ ບັນດາຜູ້ແທນກອງປະຊຸມ ເພື່ອເປັນທີ່ລະນຶກ.
ກອງປະຊຸມໄດ້ສໍາເລັດລົງ ໃນຕອນເຊົ້າຂອງວັນດຽວກັນ.