ວັນທີ 05 ມີນາ 2020, ທີ່ ສຳນັກງານສູນກາງພັກກອມມູນິດຫວຽດນາມ, ສະຫາຍ ຫວໍວັນເທື່ອງ, ກຳມະການກົມການເມືອງສູນກາງພັກ, ເລຂາທິການສູນກາງພັກ ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ໃຫ້ການຕ້ອນຮັບ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ ລາວ ເນື່ອງໃນໂອກາດມາຮັບໜ້າທີ່ໃໝ່ຢູ່ ສສ ຫວຽດນາມ.
ໂອກາດນີ້ ສະຫາຍ ແສງເພັດ ຮຸ່ງບຸນຍວງ ໄດ້ລາຍງານສະພາບລວມໃນໄລຍະ 4 ເດືອນທີ່ມາດຳລົງຕຳແໜ່ງຢູ່ ສສ ຫວຽດນາມ ແລະ ຕີລາຄາສູງຕໍ່ຜົນສຳເລັດການພົວພັນຮ່ວມມື ລະຫວ່າງ ສອງພັກ ແລະ ສອງລັດຖະບານ ລາວ-ຫວຽດນາມ ໂດຍສະເພາະແມ່ນການພົບປະປະຈຳປີ 2020 ຂອງສອງກົມການເມືອງລາວ-ຫວຽດນາມ ແລະ ກອງປະຊຸມຄະນະກໍາມະການຮ່ວມມື ລາວ-ຫວຽດນາມ ຄັ້ງທີ 42 ທີ່ຜ່ານມາ.
ໃນການຕ້ອນຮັບ ສະຫາຍ ຫວໍວັນເທື່ອງ, ກຳມະການກົມການເມືອງສູນກາງພັກ ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ສະແດງຄວາມຊົມເຊີຍທີ່ ສະຫາຍ ແສງເພັດ ຮຸ່ງບຸນຍວງ ໄດ້ມາດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ ພ້ອມທັງສະແດງຄວາມເຊື່ອໝັ້ນວ່າ ສະຫາຍຈະປະສົບຜົນສຳເລັດຢ່າງຈົບງາມໃນການເພີ່ມພູນຄູນສ້າງ, ສາຍພົວພັນອັນພິເສດ ແລະ ການຮ່ວມມືຮອບດ້ານລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ-ລາວ ໃຫ້ນັບມື້ແໜ້ນແຟ້ນຍິ່ງຂື້ນ.
ພ້ອມດຽວກັນນັ້ນ, ສະຫາຍ ຫວໍວັນເທື່ອງ ໄດ້ຝາກຄວາມຢື້ຢາມຖາມຂ່າວຜ່ານ ສະຫາຍ ແສງເພັດ ຮຸ່ງບຸນຍວງ ໄປຍັງ ສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ ແລະ ຍັງໄດ້ເນັ້ນຕື່ມວ່າ ຈະໃຫ້ການຮ່ວມມືຢ່າງສະໜິດແໜ້ນໃນທຸກວຽກງານ ເປັນຕົ້ນແມ່ນການຮ່ວມມືລະຫວ່າງສອງຄະນະໂຄສະນາ ຫວຽດນາມ-ລາວ, ໃນປີ2020 ນີ້ ຫວຽດນາມ ຈະມີຫຼາຍເຫດການທີ່ສຳຄັນ ເຊັ່ນ ເປັນປະທານ ອາຊຽນ ແລະ ເປັນສະມາຊິກບໍ່ຖາວອນສະພາຄວາມໝັ້ນຄົງ ຂອງສະຫະປະຊາຊາດ ປີ 2020-2021. ເຖິງແມ່ນວ່າ ຈະພົບອຸປະສັກທີ່ກຳລັງເກີດຂື້ນກັບທົ່ວໂລກທີ່ເຮົາກຳລັງປະເຊີນປະຈຸບັນ ກໍຄື ພະຍາດອັກເສບປອດ Covid-19 ແຕ່ລັດຖະບານຫວຽດນາມ ກໍ່ໄດ້ເອົາໃຈໃສຢ່າງຕັ້ງໜ້າໃນການປ້ອງກັນ ແລະ ຄວບຄຸມພະຍາດດັ່ງກ່າວໄດ້ເປັນຢ່າງດີ.
ໃນໂອກາດດັ່ງກ່າວ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ, ຈະນຳເອົາຄຳຢື້ຢາມຖາມຂ່າວຂອງ ສະຫາຍ ຫວໍວັນເທື່ອງ ກຳມະການກົມການເມືອງສູນກາງພັກ, ເລຂາທິການສູນກາງພັກ ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ໄປຍັງ ສະຫາຍ ຄຳພັນພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ ແລະ ສະແດງຄວາມຊົມເຊີຍຕໍ່ລັດຖະບານຫວຽດນາມທີ່ໄດ້ມີວິທີປ້ອງກັນ ແລະ ຄວບຄຸມພະຍາດ Covid-19 ໄດ້ເປັນຢ່າງດີ ແລະ ໄດ້ສະແດງຄວາມຂອບອົກຂອບໃຈມາຍັງລັດຖະບານຫວຽດນາມ ທີ່ໄດ້ສົ່ງອອກຜ້າອັດປາກຈຳນວນ 2 ລ້ານອັນ ໄປລາວຕາມການສະເໜີຂອງລັດຖະບານລາວສະແດງອອກໃນຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດຂອງພວກເຮົາ.
ນອກຈາກນັ້ນ, ສະຫາຍ ແສງເພັດ ຮຸ່ງບຸນຍວງ ໄດ້ລາຍງານ ກ່ຽວກັບ ສູນກາງພັກປະຊາຊົນປະຕິວັດລາວ ໄດ້ຈັດຕັ້ງເຜີຍແຜ່ຜົນຂອງກອງປະຊຸມພົບປະສອງກົມການເມືອງ ໃຫ້ການນຳທຸກຂັ້ນຂອງລາວແຕ່ສູນກາງຮອດທ້ອງຖີ່ນແລະ ຂໍຢືນຢັນວ່າ ຈະເຮັດສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການເພີ່ມທະວີ ແລະ ຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນ ແລະ ຈະເລີນຫງອກງາມຂື້ນເລື້ອຍໆໄປ.