ໃນ​ຕອນ​ເຊົ້າ​ຂອງ​ວັນ​ທີ 17 ພຶດ​ສະ​ພາ 2019, ທີ່ ກະ​ຊວງ​ການ​ຕ່າງ​ປະ​ເທດໄດ້​ຈັດກອງ​ປະ​ຊຸມທົບ​ທວນ​ກາງ​​ສະ​ໄໝ​ຜົນ​ຂ​ອງການ​ຮ່ວມ​ມື ລາວ - ອຽກ​ລັງ ​ໃນໄລຍະ​​ແຕ່ປີ 2017-2020 ໂດຍ​ການ​ເປັນ​ປະ​ທານຮ່ວມ ລະຫວ່າງ​ ທ່ານ ພົມມາ ຄໍາມະນີຈັນ, ຫົວ​ໜ້າ​ກົມ​ເອີ​ຣົບ ແລະ ອາ​ເມ​ຣິ​ກາ​​ແລະ ທ່ານ Ruairi de Burca, ຫົວ​ໜ້າກົມ​ການ​ຊ່ວຍ​ເຫຼືອ​ ອຽກ​ລັງ.

ໃນກອງປະຊຸມຄັ້ງ​ນີ້ທັງສອງຝ່າຍໄດ້ຕີລາຄາໝາກຜົນການຮ່ວມມືໃນໄລຍະຜ່ານມາ ແລະ ປຶກສາຫາລືກ່ຽວກັບແຜນການ ແລະ ທິດທາງການຮ່ວມມືໃນຕໍ່​ໜ້າ​ເຊັ່ນ: ຂະແໜງການສຶກສາ, ສາທາລະນະສຸກ ແລະ ການສ້າງຄວາມອາດສາມາດໃຫ້ແກ່ພະນັກງານລັດເພື່ອການນໍາໃຊ້ພາສາອັງກິດໃຫ້ຄ່ອງແຄ້ວ ແລະ ອື່ນໆ. ຫຼັງຈາກນັ້ນ, ກໍ່ໄດ້ຈັດ ພິທີ​ມອບໃບ​ຢັ້ງ​ຢືນ​ໃຫ້​ແກ່​ພະ​ນັກ​ງານ ​ກະ​ຊວງ​ການ​ຕ່າງ​ປະ​ເທດ ຈຳ​ນວນ 19 ທ່ານ​ ທີ່​ສຳ​ເລັດ​ການ​ຝຶກ​ອົບ​ຮົມ​ພາ​ສາ​ອັງ​ກິດ ໃນ​ເດືອນ ກັນ​ຍາ 2018 - ມີ​ນາ 2019 ຊຶ່ງ​ເປັນກຽດມອບໂດຍ ທ່ານ ຫົວໜ້າກົມການຊ່ວຍເຫຼືອຂອງອຽກລັງ, ກະ​ຊວງ​ການ​ຕ່າງ​ປະ​ເທດ ແລະ ການຄ້າ ແຫ່ງ ສາ​ທາ​ລະ​ນະ​ລັດ ອຽກ​ລັງ.

ໃນໂອກາດການຢ້ຽມຢາມ ສປປ ລາວ ໃນຄັ້ງນີ້, ຫົວ​ໜ້າກົມ​ການ​ຊ່ວຍ​ເຫຼືອ​ອຽກ​ລັງ, ກະ​ຊວງ​ການ​ຕ່າງ​ປະ​ເທດ ແລະ ການຄ້າ ອຽກ​ລັງ ​ເຂົ້າ​ຢ້ຽມ​ຂ່ຳ​ນັບ ທ່ານ ກິ​ແກ້ວ ຈັນ​ທະ​ບູ​ລີ, ຮອງ​ລັດ​ຖະ​ມົນ​ຕີ​ກະ​ຊວງ​ແຜນ​ການ ແລະ ການ​ລົງ​ທຶນ, ພົບ​ປະ​ກັບ​ຜູ້​ຕາງ​ໜ້າ​ອົງ​ການ​ສະ​ຫະ​ປະ​ຊາ​ຊາດ ​ປະ​ຈໍາລາວ ແລະ ຢ້ຽມ​ຢ້ຽມ ໂຄງ​ການ​ຮ່ວມ​ມື​ດ້ານ​ການ​ຜະ​ລິດ​ອົງ​ຄະ​ທຽມແລະເຄື່ອງ​ຄ້ຳ​ຊູ (ອົງ​ຄະ​ທຽມ) ທີ່   ນະ​ຄອນຫຼວງວຽງ​ຈັນ ເພື່ອປຶກສາຫາລື ກ່ຽວກັບ ທິດທາງໃຫ້ການຊ່ວຍເຫຼືອແກ່ໂຄງການເກັບກູ້ລະເບີດບໍ່ທັນແຕກ ແລະ ການຊ່ວຍເຫຼືອຕ່າງໆທີ່ມີຄວາມຈຳເປັນ, ຊຶ່ງເປັນໂຄງການທີ່ ອຽກ​ລັງ ໃຫ້ການຊ່ວຍເຫຼືອໃນປັດຈຸບັນ.