ໃນອາທິດຜ່ານມາ ສະຖານເອກອັກຄະລັດຖະທູດລາວ ປະຈຳ ສະຫະພັນ ຣັດເຊຍ ໄດ້ຈັດປາຖະກະຖາ ເພື່ອສະເຫຼີມສະຫຼອງວັນແມ່ຍິງສາກົນ ທີ 8 ມີນາ ຄົບຮອບ 109 ປີ (8/3/1910-8/3/2019) ໂດຍການເຂົ້າຮ່ວມ ຂອງ ສະຫາຍ ສີວຽງເພັດ ເພັດວໍຣະສັກ, ເລຂາໜ່ວຍພັກສະຖານທູດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສະຫະພັນ ຣັດເຊຍ ພ້ອມດ້ວຍຜູ້ຕາງໜ້າອົງການຈັດຕັ້ງມະຫາຊົນປະຈຳສະຖານທູດລາວ ທີ່ ສ.ຣັດເຊຍ, ພະນັກງານສະຖານທູດ, ເອື້ອຍນ້ອງແມ່ຍິງສະຖານທູດ ແລະ ບັນດານັກສຶກສາຍິງທີ່ກຳລັງຮຽນຢູ່ນະຄອນຫຼວງມົດສະກູກໍ່ໄດ້ເຂົ້າຮ່ວມຢ່າງພ້ອມພຽງ.

ໃນພິທີ, ສະຫາຍ ນາງ ສີສຸພັນ ພຸດທະວົງ, ຫົວໜ້າສະຫະພັນແມ່ຍິງສະຖານທູດລາວປະຈຳ ສະຫະພັນ ຣັດເຊຍ ໄດ້ຂື້ນເລົ່າມູນເຊື້ອຄວາມເປັນມາ, ຄວາມໝາຍຄວາມສຳຄັນ ແລະ ການກຳເນີດເກີດຂື້ນຂອງວັນແມ່ຍິງສາກົນ ໂດຍໄດ້ຍົກໃຫ້ເຫັນເຖິງການຕໍ່ສູ້ຂອງຂະບວນການແມ່ຍິງໃນທົ່ວໂລກ ນັບຕັ້ງແຕ່ສະໄໝພວກສັກດີນານາຍທືນເປັນ ຕົ້ນມາ ໄດ້ມີການກົດຂີ່ຂູດຮີດແຮງງານຂອງພວກສັກດີນານາຍທືນ ຕໍ່ຊາວຜູ້ອອກແຮງງານ ໂດຍສະເພາະຕໍ່ຊາວຜູ້ອອກແຮງງານທີ່ເປັນເພດຍິງ, ຊື່ງໃນເວລານັ້ນແມ່ຍິງຖືກດູຖູກໝີ່ນປະໝາດ, ຖືແມ່ຍິງເປັນສິນຄ້າ,ເປັນເຄື່ອງຫລີ້ນສຳລັບເພດຊາຍ, ການເຮັດວຽກບໍ່ມີການຮັບປະກັນຄວາມປອດໄພ ແລະ ບໍ່ມີລະບອບປົກປ້ອງຕໍ່ສຸຂະພາບຂອງແມ່ຍິງ ແລະ ເດັກນ້ອຍ ໂດຍສະເພາະໃນເວລາຖືພາ ໃນເວລາເກີດລູກ ຫລືເຈັບເປັນ ແມ່ຍິງກໍ່ບໍ່ໄດ້ຮັບຄວາມເອົາໃຈໃສ່ເບີ່ງແຍງຫລືການປີ່ນປົວ. ໃນວັນທີ 8 ມີນາ ປີ 1910, ກອງປະຊຸມສາກົນກ່ຽວກັບບັນຫາແມ່ຍິງ ຄັ້ງທຳອິດ ທີ່ໄດ້ຈັດຂຶ້ນ ຢູ່ ນະຄອນໂກເປນຮາກ ເມືອງຫລວງ ຂອງປະເທດ ເດນມາກ ຊື່ງມີ 17 ປະເທດເຂົ້າຮ່ວມ. ກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກປີ ເປັນວັນແມ່ຍິງສາກົນ, ຊື່ງເປັນເຫດການ-ການເມືອງ ທີ່ສຳຄັນ,ເປັນຂີດໝາຍ ແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນຊອບທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັນກັບຜູ້ຊາຍ.

ພັກ-ລັດຖະບານ ແຫ່ງ ສປປ ລາວ ໄດ້ມີແນວທາງນະໂຍບາຍຕໍ່ການພັດທະນາ, ການປົກປ້ອງສິດຜົນປະ ໂຫຍດຂອງແມ່ຍິງ ແລະ ການສົ່ງເສີມຄວາມສະເໝີພາບລະຫວ່າງຍິງ-ຊາຍ ຊຶ່ງໄດ້ກຳນົດແຈ້ງຢູ່ໃນລັດຖະທຳມະນູນ ແລະ ໃນກົດໝາຍຕ່າງໆ ພ້ອມນັ້ນ, ລັດຖະບານ ສປປ ລາວ ຍັງໄດ້ເປັນລັດພາຄີຂອງສົນທິສັນຍາສາກົນຫຼາຍສະບັບ ກ່ຽວກັບການປົກປ້ອງສິດທິຂອງແມ່ຍິງໃນດ້ານຕ່າງໆເວົ້າລວມ, ເວົ້າສະເພາະໃນຂົງເຂດການຕ່າງປະເທດ ໂດຍປະຕິ ບັດຕາມແນວທາງການຕ່າງປະເທດຂອງພັກ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ເຄົາລົບອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ, ບົນເນື້ອໃນຈິດໃຈດັ່ງກ່າວ, ໜ່ວຍສະຫະພັນແມ່ຍິງລາວ ປະຈຳສະຖານທູດ ໄດ້ເອົາໃຈໃສ່ເຄຶ່ອນໄຫວວຽກງານການທູດ ເພື່ອເສີມສ້າງມິດຕະພາບ ແລະ ການຮ່ວມມືກັບປະເທດເຈົ້າພາບກໍ່ຄືເພື່ອນມິດສາກົນໃນຂົງເຂດດັ່ງກ່າວ.

     ໃນໂອກາດດັ່ງກ່າວ ທູດເຮົາໄດ້ໃຫ້ກຽດໂອ້ລົມຕໍ່ເອື້ອຍນ້ອງແມ່ຍິງ ຊື່ງ ສະຫາຍ ໄດ້ສະແດງຄວາມຊົມ

ເຊີຍຕໍ່ຜົນສຳເລັດໃນດ້ານຕ່າງໆທີ່ເອື້ອຍນ້ອງສາມາດຍາດມາໄດ້ໃນໄລຍະຜ່ານມາ ພ້ອມທັງໄດ້ຍົກໃຫ້ເຫັນບົດບາດ, ໜ້າທີ່ອັນສຳຄັນຂອງແມ່ຍິງລາວເຮົາ. ພ້ອມນີ້ ສະຫາຍ ໄດ້ເນັ້ນໜັກຕໍ່ບັນດານັກສຶກສາລາວ ທີ່ກຳລັງສຶກສາຢູ່ ສະຫະ ພັນຣັດເຊຍ ໂດຍສະເພາະນັກສຶກສາເພດຍິງ ໃຫ້ສືບຕໍ່ສົ່ງເສີມມູນເຊື້ອວັດທະນະທຳ ແລະ ຮັກສາຮີດຄອງປະເພນີອັນດີງາມຂອງຊາດລາວເຮົາແລະ ຕັ້ງໜ້າເສີມຂະຫຍາຍຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ, ສືບຕໍ່ເອົາໃຈໃສ່ໃນການຄົ້ນຄວ້າຮ່ຳຮຽນເພື່ອໃຫ້ກາຍເປັນຜູ້ສືບທອດທີ່ດີມີຄຸນສົມບັດສິນທຳປະຕິວັດ, ມີຄວາມຮູ້ຄວາມສາມາດ ແລະ ເປັນກຳລັງແຮງອັນສຳຄັນຂອງປະເທດຊາດສືບຕໍ່ໄປ.