ສປປ ລາວ ແລະ ສະຫະພາບເອີຣົບ ໄດ້ຈັດພົບປະສົນທະນາດ້ານສິດທິມະນຸດ ແລະ ການປົກຄອງ ຄັ້ງທີ 9, ໃນວັນທີ 7 ມີນາ 2019 ທີ່ ນະຄອນຫຼວງວຽງຈັນ, ຄະນະຜູ້ແທນລາວ ນໍາໂດຍ ທ່ານ ພູໂຂງ ສີສຸລາດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ, ມີຜູ້ຕາງໜ້າຈາກ ສະພາແຫ່ງຊາດ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ກະຊວງພາຍໃນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ, ສູນກາງແນວລາວສ້າງຊາດ, ສູນກາງສະຫະພັນແມ່ຍິງລາວ ​ແລະ ສານ​ປະຊາຊົນ​ນະຄອນຫຼວງ​ວຽງ​ຈັນ; ຄະ​ນະ​ຜູ້​ແທນສະຫະພາບເອີຣົບ ນໍາໂດຍ ທ່ານ ເດວິດ ດາລີ, ຫົວໜ້າຫ້ອງການ ຮັບຜິດຊອບພາກພື້ນອາຊີຕາເວັນອອກສຽງໃຕ້ ຂອງສໍານັກງານພົວພັນຕ່າງປະເທດສະຫະພາບເອີຣົບ, ​ມີ ທ່ານ ​ລີ​ໂອ ຟາ​​ເບີ, ​ເອກ​ອັກຄະ​ລັດຖະທູດສະຫະພາບ​ເອີ​ຣົບ, ​ເຈົ້າ​ໜ້າ​ທີ່​ທີ່​ມາຈາກ​ສຳນັກງານ​ພົວພັນ​ຕ່າງປະ​ເທດ​ສະຫະພາບ​ເອີຣົບ ທີ່ ບຣຸກ​ແຊນ, ເຈົ້າໜ້າທີ່ສຳນັກງານຕາງໜ້າສະຫະພາບເອີຣົບ ແລະ ປະເທດສະມາຊິກສະຫະພາບເອີຣົບ ທີ່ ​ນະຄອນຫຼວງ​ວຽງ​ຈັນ ເຂົ້າຮ່ວມ.

ບັນດາຫົວຂໍ້ສົນທະນາ ຊຶ່ງສອງຝ່າຍໄດ້​ແລກປ່ຽນກັນໃນ​ກອງ​ປະຊຸມ​ຄັ້ງ​ນີ້ ລວມມີ ຄວາມຄືບໜ້າຂອງວຽກງານສິດທິມະນຸດຢູ່ ສປປ ລາວ ແລະ ຢູ່ສະຫະພາບເອີຣົບ ນັບ​ແຕ່​ກອງ​ປະຊຸມ​ຄັ້ງ​ທີ 8 ຜ່ານ​ມາ​ໃນ​ເດືອນ​ມີນາ 2018; ການປົກຄອງດ້ວຍກົດໝາຍ ​ໃນ​ນັ້ນ​ລວມມີ​ປະ​ມວນ​ກົດໝາຍ​ອາຍາ ​ແລະ ການ​ສຳ​ເລັດ​ຮ່າງ​ກົດໝາຍ​ແພ່ງ​ຂອງ ສປປ ລາວ; ການ​ລົບ​ລ້າງ​ໂທດ​ປະຫານ​ຊີວິດຢູ່​ເອີຣົບ ​ແລະ ຄວາມ​ຈໍາ​ເປັນ​ໃນ​ການ​ຮັກສາໂທດ​ປະຫານ​ຊີວິດ​ຢູ່​ໃນ ສປປ ລາວ; ສິດທິຂອງພົນລະເມືອງ, ສິດທິ​ທາງດ້ານການເມືອງ, ເສດຖະກິດ, ສັງຄົມ ແລະ ວັດທະນະທຳ; ສິດທິແມ່ຍິງ, ເດັກນ້ອຍ, ຄົນ​ພິການ ​ແລະ ບັນດາຊົນ​ເຜົ່າ; ການຮ່ວມມືໃນເວທີຫຼາຍຝ່າຍ ແລະ ການສູ້​ຊົນຫຼຸດພົ້ນຈາກສະຖານະ​ພາບປະເທດດ້ອຍພັດທະນາຂອງ ສປປ ລາວ ​ແລະ ການ​ຮັກສາ​ສິດທິ​ພິ​ເສດ​ດ້ານ​ການ​ຄ້າ (EBA) ຂອງ ສະຫະພາບ​ເອີຣົບ; ​ເສລີພາບ​ໃນ​ການສະ​ແດງ​ອອກ, ສື່​ມວນ​ຊົນ; ​ອົງການ​ຈັດ​ຕັ້ງ​ທາງ​ສັງຄົມຢູ່​ເອີຣົບ ​ແລະ ຢູ່ ສປປ ລາວ; ຂໍ້ສະ​ເໜີ​ແນະ​ພາຍ​ໃຕ້​ກົນ​ໄກ​ການ​ທົບ​ທວນ​ປະຈຳ​ໄລຍະ​ດ້ານ​ສິດທິ​ມະນຸດ (UPR) ຮອບ​ວຽນ​ທີ 2 ​ແລະ ການ​ກະກຽມ​ຂອງ ສປປ ລາວ ​ໃນ​ການ​ເຂົ້າ​ຮ່ວມ​ກົນ​ໄກ​ການ​ທົບ​ທວນ​ປະຈຳ​ໄລຍະ (UPR) ຮອບ​ວຽນ​ທີ​ 3 ​ໃນ​ເດືອນ​ມັງກອນ 2020; ການ​ລົງ​ນາມ ​ແລະ ​ໃຫ້​ສັດຕະຍາບັນ​ສົນທິສັນຍາ​ສາກົນ​ທີ່​ກ່ຽວຂ້ອງ; ການ​ຢ້ຽມຢາມ​ຂອງ​ຜູ້​ລາຍ​ງານ​ພິ​ເສດ ສປຊ ຕາມ​ການ​ເຊື້ອ​ເຊີນ​ຂອງ​ລັດຖະບານ ສປປ ລາວ; ຜົນສໍາ​ເລັດ​ຂອງ​ການ​ສະ​ເໜີບົດ​ລາຍ​ງານ​ພາຍ​ໃຕ້ ​ສົນທິສັນຍາ ວ່າ​ດ້ວຍ ສິດທາ​ງດ້ານ​ການ​ເມືອງ ​ແລະ ສິດ​ຂອງ​ພົນລະ​ເມືອງ (ICCPR), ສົນທິສັນຍາ ວ່າ​ດ້ວຍ ການ​ລົບ​ລ້າງ​ທຸກ​ຮູບ​ການ​ການຈຳ​ແນ​ກຕໍ່​ແມ່ຍິງ (CEDAW), ສົນທິສັນຍາ ວ່າ​ດ້ວຍ ສິດທິ​ເດັກ (CRC) ຂອງ ສປປ ລາວ ​ໃນ​ປີ 2018 ຢູ່ ​ສຳນັກງານ​ອົງການ​ສະຫະ​ປະຊາ​ຊາດ ທີ່ ເຊີ​ແນວ.

ໃນການພົບປະຄັ້ງ​ນີ້, ຝ່າຍສະຫະພາບເອີຣົບ ໄດ້ຕີລາຄາຜົນສໍາເລັດການປະຕິບັດວຽກງານສິດທິມະນຸດ ​ແລະ ການ​ປົກຄອງ ຂອງ ສປປ ລາວ, ຄວາມ​ພະຍາຍາມ​ຂອງ​ລັດຖະບານ​ລາວ​ໃນ​ການສ້າງ​ລັດ​ທີ່ປົກຄອງດ້ວຍກົດໝາຍ ຮອດປີ 2020. ​ສະຫະພາບ​ເອີຣົບ ຢືນຢັນ​ຄືນຈະສືບຕໍ່ໃຫ້ການຮ່ວມມືແກ່ ສປປ ລາວ ​ໃນ​ວຽກ​ງານ​ດັ່ງກ່າວ​ນີ້ ​ໂດຍ​ຜ່ານ​ບັນດາ​ໂຄງການ​ຊ່ວຍ​ເຫຼືອ​ຂອງ​ຕົນ. ຝ່າຍລາວ ກໍໄດ້ຕີລາຄາການປະຕິບັດວຽກງານສິດທິມະນຸດຢູ່ສະຫະພາບເອີຣົບ, ​ຮຽກຮ້ອງ​ໃຫ້ສະຫະພາບເອີຣົບ ຮັບປະກັນສິດທິມະນຸດ ​ແລະ ການ​ບໍ່​ຈຳ​ແນ​ກໃນການແກ້ໄຂບັນຫາການເຄື່ອນຍ້າຍຄົນ​ເຂົ້າ​ເມືອງ ​ແລະ ບັນຫາ​ອົບ​ພະຍົບ, ພ້ອມ​ທັງ​ຊອກ​ຫາ​ສາ​ເຫດ​ຕົ້ນຕໍ​ທີ່​ພາ​ໃຫ້​ເກີດ​ມີ​ບັນຫາ​ດັ່ງກ່າວ ​ເຊິ່ງ​ເປັນ​ສິ່ງ​ທ້າ​ທາຍຫຼາຍຕໍ່​ບັນດາ​ປະ​ເທດ​ເອີຣົບ ​ໃນ​ປະຈຸ​ບັນ. ສອງຝ່າຍໄດ້ສົນທະນາ ກ່ຽວກັບ ບາງກໍລະນີບຸກຄົນທີ່ສະຫະພາບເອີຣົບ ມີຄວາມສົນໃຈຢູ່ ສປປ ລາວ ຊຶ່ງຝ່າຍລາວກໍໄດ້ຊີ້ແຈງອະທິບາຍ ອັນໄດ້ເຮັດໃຫ້ຝ່າຍສະຫະພາບເອີຣົບ ມີຄວາມເຂົ້າໃຈຫຼາຍຂຶ້ນຕື່ມ ກ່ຽວກັບ ນະໂຍບາຍ, ກົດໝາຍ, ມາ​ດຕະການ ແລະ ສະພາບຄວາມເປັນຈິງຢູ່ ສປປ ລາວ.

ການ​ສົນທະນາປະຈຳ​ປີ​ດ້ານ​ສິດທິ​ມະນຸດ ​ແລະ ການປົກຄອງ ລະຫວ່າງ ສປປ ລາວ ​ແລະ ສະຫະພາບ​ເອີຣົບ ​ເປັນ​ກົນ​ໄກ​ປຶກສາ​ຫາລື​ແບບ​ບໍ່​ເປັນ​ທາງ​ການ​ໜຶ່ງຂອງ​ຄະນະ​ກຳມາ​ທິການ​ຮ່ວມ ສປປ ລາວ-ສະຫະພາບ​ເອີຣົບ (JC). ນອກຈາກ​ການ​ສົນທະນາ​ດ້ານ​ສິດທິ​ມະນຸດ ​ແລະ ການ​ປົກຄອງ​ແລ້ວ ຍັງ​ມີ​ກົນ​ໄກ​ການ​ສົນທະນາ​ດ້ານ​ການ​ຄ້າ ​ແລະ ການ​ຮ່ວມ​ມື​ອີກ​ດ້ວຍ ​ໃນ​ຂອບ​ຂອງ​ຄະນະ​ກຳມາ​ທິການ​ຮ່ວມລະຫວ່າງ​ສອງ​ຝ່າຍ.