ໃນຕອນເຊົ້າຂອງວັນທີ 21 ພະຈິກ 2018, ທີ່ ສູນຝຶກອົບຮົມແລະ ຮ່ວມມືສາກົນ (ICTC), ນະຄອນຫຼວງວຽງຈັນ, ສະຖາບັນການຕ່າງປະເທດ, ກະຊວງການຕ່າງປະເທດ, ໄດ້ຈັດກອງປະຊຸມສຳມະນາວິຊາການຂຶ້ນ ພາຍໃຕ້ຫົວຂໍ້ “ໜຶ່ງແລວໜຶ່ງເສັ້ນທາງ: ກາລະໂອກາດ ແລະ ສິ່ງທ້າທາຍ ຕໍ່ ສປປ ລາວ”. ກ່າວເປີດກອງປະຊຸມສຳມະນາໃນຄັ້ງນີ້ແມ່ນ ທ່ານ ນາງ ໄກມະນີ ອໍລະບູນ, ຮອງຫົວໜ້າສະຖາບັນການຕ່າງປະເທດ ແລະ ທ່ານ ຊິນ ເສິນ, ເລຂາເອກ ສະຖານເອກອັກຄະລັດຖະທູດ ສປ ຈີນ, ທີ່ ນະຄອນຫຼວງວຽງຈັນ. ພ້ອມດ້ວຍບັນດາຜູ້ເຂົ້າຮ່ວມທີ່ເປັນນັກຄົ້ນຄວ້າ ແລະ ນັກວິຊາການ ຈາກບັນດາສະຖາບັນ ແລະ ຂະແໜງການຕ່າງໆຂອງພາກລັດ ເຂົ້າຮ່ວມຫຼາຍກວ່າ 40 ທ່ານ.

ຈຸດປະສົງຂອງການຈັດກອງປະຊຸມສຳມະນາໃນຄັ້ງນີ້ ເພື່ອເປັນການເປີດໂອກາດໃຫ້ບັນດາຜູ້ເຂົ້າຮ່ວມໄດ້ສົນທະນາແລກປ່ຽນບົດຮຽນ ແລະ ຂໍ້ມູນຂ່າວສານ, ລວມທັງທັດສະນະ ແລະ ຂໍ້ສະເໜີ ໃນຂອບການພົວພັນຮ່ວມມື ລາວ-ຈີນ, ໂດຍສະເພາະໃນການຈັດຕັ້ງປະຕິບັດບັນດາໂຄງການທີ່ນອນໃນຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນ ຫຼື BRI (Belt and Road Initiative). ກອງປະຊຸມໄດ້ສົນທະນາ 03 ເນື້ອໃນສຳຄັນ: 1) ຍຸດທະສາດຂອງລາວ ແລະ ພາກພື້ນ ຕໍ່ກັບຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”, 2) ໜຶ່ງແລວໜຶ່ງເສັ້ນທາງ ຢູ່ ສປປ ລາວ ກັບ ເປົ້າໝາຍການພັດທະນາແບບຍືນຍົງ ແລະ 3) ການຮ່ວມມືໃນຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນຂອບຂໍ້ລິເລີ່ມໜຶ່ງແລວໜຶ່ງເສັ້ນທາງ. ຊຶ່ງໃນນັ້ນ, ໄດ້ເນັ້ນໃສ່ການປຶກສາຫາລືທາງດ້ານກາລະໂອກາດ ແລະ ສິ່ງທ້າທາຍຕ່າງໆໃນການຈັດຕັ້ງປະຕິບັດບັນດາໂຄງການ ໃນຂອບການຮ່ວມມືໜຶ່ງແລວໜຶ່ງເສັ້ນທາງ, ໂດຍສະເພາະແມ່ນການປະຕິບັດນະໂຍບາຍ ໃນການຫັນປະເທດທີ່ບໍ່ມີຊາຍແດນຕິດຈອດກັບທະເລ ສູ່ການເປັນປະເທດເຊື່ອມຈອດ ແລະ ເຊື່ອມໂຍງຂອງພາກພື້ນ ໂດຍຜ່ານການຈັດຕັ້ງປະຕິບັດໂຄງການຂອງຂໍ້ລິເລີ່ມໜຶ່ງແລວໜຶ່ງເສັ້ນທາງ, ໂດຍສະເພາະ ໂຄງການເສັນທາງລົດໄຟຄວາມໄວສູງລາວ-ຈີນ ຈາກນະຄອນຄຸນມິງ ຫາ ນະຄອນຫຼວງວຽງຈັນ ທີ່ກຳລັງດຳເນີນການກໍ່ສ້າງ ແລະ ຄາດວ່າຈະໃຫ້ສຳເລັດພາຍໃນປີ 2021, ເຊິ່ງເຫັນວ່າໂຄງການດັ່ງກ່າວ ນອກຈາກຈະອຳນວຍຄວາມສະດວກໃຫ້ແກ່ການເດີນທາງ ແລະ ຂົນສົ່ງສິນຄ້າແລ້ວ; ຍັງຈະເປີດໂອກາດໃຫ້ແກ່ການສ້າງວຽກເຮັດງານທຳ, ການຂົນສົ່ງສິນຄ້າໄດ້ຢ່າງສະດວກ ແລະ ວ່ອງໄວ, ການຕິດຕໍ່ພົວພັນ ລະຫວ່າງ ປະຊາຊົນ ກໍຄື ການແລກປ່ຽນດ້ານການທ່ອງທ່ຽວລະຫວ່າງ ລາວ-ຈີນ ໃຫ້ຫຼາຍຂື້ນ.

ຄ່ຽງຄູ່ກັບກາລະໂອກາດ, ສປປ ລາວ ກໍ່ຍັງມີສິ່ງທ້າທາຍຫລາຍປະການ, ເປັນຕົ້ນແມ່ນ ຄວາມສ່ຽງຕໍ່ການຊຳລະພັນທະກູ້ຢືມໂຄງການ, ບັນຫາດ້ານສິ່ງແວດລ້ອມ ແລະ ບັນຫາອື່ນໆທີ່ກ່ຽວກັບສັງຄົມ ເຊັ່ນ: ການຄ້າມະນຸດ, ສິ່ງເສບຕິດ, ບັນຫາການແຜ່ລະບາດຂອງພະຍາດ ແລະ ອື່ນໆ. ຕໍ່ກັບສິ່ງທ້າທາຍດັ່ງກ່າວ, ບັນດາມາດຕະການອັນສຳຄັນແມ່ນການບັງຄັບໃຊ້ກົດໝາຍຢ່າງເຂັ້ມງວດ, ການສ້າງຂີດຄວາມສາມາດໃຫ້ແກ່ພະນັກງານ ໂດຍສະເພາະພະນັກງານທ້ອງຖິ່ນ, ການກຳນົດຄວາມສ່ຽງຢ່າງລະອຽດຂອງບັນດາໂຄງການ ທີ່ມີການຈັດຕັ້ງປະຕິບັດຂໍ້ລິເລີ່ມໜຶ່ງແລວໜຶ່ງເສັ້ນທາງ ລວມທັງການເຜີຍແຜ່ໃຫ້ປະຊາຊົນຮັບຮູ້ຢ່າງທົ່ວເຖິງ ຕໍ່ກັບການຈັດຕັງປະຕິບັດໂຄງການດັ່ງກ່າວ ຈະສາມາດຊ່ວຍຮັບມືຜົນກະທົບຂອງສິ່ງທ້າທາຍທີ່ໄດ້ກ່າວມາຂ້າງເທິງ.

ປະຈຸບັນ ໂຄງການເຊື່ອມໂຍງພາກພື້ນຕາມຂໍ້ລິເລີ່ມໜຶ່ງແລວໜຶ່ງເສັ້ນທາງ ແມ່ນກວມເອົາຫຼາຍກວ່າ 60 ປະເທດໃນທົ່ວໂລກ ຫຼື ເທົ່າກັບ 1/3 ຂອງຍອດຜະລິດຕະພັນພາຍໃນຂອງໂລກ ແລະ ເກືອບ 2/3 ຂອງປະຊາກອນໂລກ (ທະນາຄານໂລກ, 2018). ອີງຕາມກະຊວງການຄ້າຂອງຈີນ, ສໍາລັບໄຕມາດທຳອິດຂອງປີ 2017, ຈີນສາມາດສ້າງເຂດເສດຖະກິດ 75 ແຫ່ງ ແລະ ຮ່ວມມືການຄ້າກັບ 24 ປະເທດທີ່ມີໂຄງການຂໍ້ລິເລີ່ມໜຶ່ງແລວໜຶ່ງເສດຖະກິດ ນຳມາສູ່ການຈ້າງງານເກືອບ 300.000 ຄົນ (ເຊິນ, 2017).

ກອງປະຊຸມສຳມະນາໃນຄັ້ງນີ້, ນອກຈາກຈະເປັນການເປີດເວທີໃຫ້ບັນດານັກຄົ້ນຄວ້າ ແລະ ນັກວິຊາການ ຈາກຂະແໜງການຕ່າງໆຂອງພາກລັດໄດ້ຮ່ວມກັນປຶກສາຫາລື ແລະ ຖອດຖອນບົດຮຽນແລ້ວ, ຍັງຖືເປັນໂອກາດໃນການສ້າງເຄື່ອຄ່າຍລະຫວ່າງຂະແໜງການຕ່າງໆ ກໍຄື ບັນດາສະຖາບັນຂອງແຕ່ລະກະຊວງທີ່ມີການພົວພັນຮ່ວມມືກັບ ສປຈີນ,ມີຄວາມເຂົ້າໃຈເປັນເອກະພາບກັນດ້ານທັດສະນະ ແລະ ມີການແລກປ່ຽນຂໍ້ມູນຂ່າວສານກັນຢ່າງເປັນປະຈຳ. ທັງໝົດນີ້ກໍເພື່ອຮັບປະກັນຜົນປະໂຫຍດຂອງຊາດ ກໍຄື ການພົວພັນລະຫວ່າງສອງຊາດ ລາວ-ຈີນ ໃຫ້ປະສົບຜົນສຳເລັດໃນທຸກໆດ້ານຢ່າງຈົບງາມ.