ໃນລະຫວ່າງວັນທີ 20-21 ພະຈິກ 2018, ສປປ ລາວ ​ໄດ້​ເປັນເຈົ້າພາບຈັດກອງ​ປະຊຸມ​ເຈົ້າໜ້າທີ່ ອາວຸໂສ​ເວທີ​ການ​ຮ່ວມ​ມື ລະຫວ່າງ ​ພາກ​ພື້ນອາຊີ​ຕາ​ເວັນ​ອອກ ​ແລະ ອາ​ເມ​ລິ​ກາ​ລາ​ຕິນ (Forum for East Asia and Latin America Cooperation ຫຼື FEALAC) ຄັ້ງທີ 19 ຂຶ້ນທີ່ ໂຮງແຮມ ແລນມາກ, ນະຄອນຫຼວງວຽງຈັນ, ຊຶ່ງເປັນຄັ້ງທຳອິດ ທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງ ປະຊຸມໃນລະດັບເຈົ້າຫນ້າທີ່ອາວຸໂສໃນຂອບການຮ່ວມມືດັ່ງກ່າວ. ກອງ​ປະຊຸມ​ໄດ້​ດຳ​ເນີນ​ໄປ ພາຍ​ໃຕ້​ການ​ເປັນ​ປະທານ​ຮ່ວມ ຂອງ ​ທ່ານ ສົງ​ການ ຫຼວງ​ມູ​ນິນ​ທອນ, ຫົວ​ໜ້າ​ກົມ​ເສດ​ຖະ​ກິດ, ກະ​ຊວງ​ການ​ຕ່າງ​ປະ​ເທດ ລາວ (ຕາງໜ້າພາກ​ພື້ນອາຊີ) ແລະ ທ່ານ Jairo DAVID ESTRADA BARRIOS, ​ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ກົວເຕມາລາ (ຕາງໜ້າພາກ​ພື້ນ​ອາເມລິກາລາຕິນ). ເຂົ້າຮ່ວມກອງປະ ຊຸມຄັ້ງນີ້​ ມີບັນດາ​ເຈົ້າໜ້າທີ່ອາວຸໂສ ແລະ ຜູ້ຕາງໜ້າຈາກປະເທດ ສະມາຊິກຟີ​ແລກ (FEALAC 36 ປະ​ເທດ), ບັນດາຜູ້ຕາງໜ້າຈາກພາກສ່ວນຕ່າງໆ ເປັນຕົ້ນກອງເລຂາ ອິນເຕີເນັດ ຟີແລັກ, ຄະນະ​ກຳມາ​ທິການ​ວຽກ​ເສດຖະກິດ ​ແລະ ສັງຄົມ ສໍາລັບ​ພາກ​ພື້ນ ອາຊີ-ປາຊີ​ຟິກ ຂອງ ສປຊ, ແລະ ຄະນະ​ກຳມາ​ທິການ​ເສດຖະກິດ ​ແລະ ສັງຄົມ ສໍາລັບ​ພາກ​ພື້ນ​ອາ​ເມ​ລິ​ກາ​ລາ​ຕິນ ​ແລະ ຄາ​ລິ​ບຽນ ຂອງ ສປຊ, ລວມທັງ ບັນດາຜູ້ຕາງໜ້າຈາກບັນດາກະຊວງ ແລະ ຂະແໜງການກ່ຽວຂ້ອງຕ່າງໆ ຂອງ ສປປ ລາວ ເຂົ້າຮ່ວມ ປະມານ 200 ທ່ານ.

ກອງ​ປະຊຸມ​​ເຈົ້າໜ້າທີ່ອາວຸໂສ ຟີ​ແລກ ຄັ້ງ​ທີ 19 ​ໄດ້​ທົບ​ທວນຄືນຄວາມ​ຄືບ​ໜ້າຂອງການຈັດຕັ້ງ ປະຕິບັດບັນດາໂຄງການ ແລະ ກິດຈະກໍາຕ່າງໆໃນໄລຍະຜ່ານ ໂດຍສະເພາະ ​ການຈັດຕັ້ງປະຕິບັດຖະ ແຫຼງການປູຊານ ແລະ ແຜນປະຕິບັດງານໃໝ່ ຟີແລັກ ທີ່ໄດ້ຮັບຮອງເອົາໃນກອງປະຊຸມລັດຖະມົນຕີ ຕ່າງປະເທດ ຟີແລັກ ຄັ້ງທີ 8 ທີ່ ບູຊານ, ປະເທດ ສ.ເກົາຫລີ ໃນປີຜ່ານມາ. ພ້ອມດຽວກັນນີ້, ກອງປະຊຸມ ຍັງໄດ້ປຶກສາຫາລື ແລກປ່ຽນທັດສະນະຮ່ວມກັນ ກ່ຽວ​ກັບການກໍານົດແຜນວຽກ ແລະ ກິດຈະກໍາຕ່າງໆ ລວມ​ທັງການປັບປຸງກົນ​ໄກ​ຮ່ວມ​ມືລະຫວ່າງສອງ​ພາກ​ພື້ນ ເພື່ອໃຫ້ແທດເຫມາະກັບລະດັບການພັດທະນາ ແລະ ສອດຄ່ອງກັບຄວາມຕ້ອງການຕົວຈິງຂອງປະເທດສະມາຊິກໃນ​ຕໍ່ໜ້າ.

ຄຽງຄູ່ກັບກອງ​ປະຊຸມ​ເຈົ້າໜ້າທີ່ອາວຸໂສຟີ​ແລກຄັ້ງນີ້, ສປປ ລາວ ຍັງໄດ້ຈັດກອງປະຊຸມໜ່ວຍງານ ວິຊາການ ​ແລະ ກອງ​ປະຊຸມສໍາຄັນອື່ນໆທີ່ປິ່ນອ້ອມຄື: ກອງປະຊຸມຄະນະກໍາມະການກອງທຶນຟີແລກ ຄັ້ງ ທີ 2; ກອງປະຊຸມໜ່ວຍງານການຮ່ວມມືດ້ານສັງຄົມ-ການ​ເມືອງ ​ແລະ ການພັດທະນາແບບຍືນຍົງ; ກອງປະຊຸມໜ່ວຍ​ງານດ້ານ​ການຄ້າ, ການລົງທຶນ, ການທ່ອງທ່ຽວ ​ແລະ ​ວິສາຫະກິດມະຫາພາກຂະໜາດ ນ້ອຍ ແລະ ຂະໜາດກາງ; ກອງປະຊຸມໜ່ວຍ​ງານດ້ານ​ວັດທະນະທໍາ, ຊາວໜຸ່ມ, ເພດຍິງ-ຊາຍ ແລະ ກິລາ; ກອງປະຊຸມໜ່ວຍ​ງານດ້ານວິທະຍາສາດ, ເຕັກໂນໂລຊີ, ນະວັດຕະກໍາ ແລະ ການສຶກສາ ແລະ ອື່ນໆ.

​​ກອງ​ປະຊຸມໄດ້ຕີລາຄາສູງ ແລະ ​ຊົມ​ເຊີຍ ສປປ ລາວ ໃນຖານະປະເທດປະທານຮ່ວມ ກໍ່ຄື ປະເທດເຈົ້າພາບ ທີ່ໄດ້ປະກອບສ່ວນອັນສຳຄັນ ເຮັດໃຫ້ກອງປະຊຸມເຈົ້າຫນ້າທີ່ອາວຸໂສ ຄັ້ງທີ່ 19 ປະສົບຜົນ ສຳເລັດຢ່າງຈົບງາມ ຊຶ່ງຈະເປັນພື້ນຖານສຳຄັນ ໃຫ້ແກ່ ກອງປະຊຸມເຈົ້າຫນ້າທີ່ອາວຸໂສຄັ້ງຕໍ່ໄປ ທີ່ຈະຈັດຂຶ້ນ ຄ່ຽງຄູ່ກັບ ກອງປະຊຸມລະດັບລັດຖະມົນຕີ ຢູ່ ພາກພື້ນອາເມລິກາ-ລາຕິນ ໃນປີ 2019.

ຂອບການຮ່ວມມື FEALAC ເປັນເວທີປຶກສາຫາລືເພື່ອການຮ່ວມມືລະຫວ່າງພາກພື້ນອາຊີຕາ ເວັນອອກ ແລະ ພາກພື້ນອາເມລິການ-ລາຕິນ, ຖືກສ້າງຕັ້ງຂຶ້ນໃນປີ 1999 ຊຶ່ງ ສປປ ລາວ ເປັນຫນຶຶ່ງ ໃນປະເທດສະມາຊິກກໍ່ຕັ້ງ. ປະຈຸບັນ FEALAC ມີສະມາຊິກທັງຫມົດ 36 ປະເທດ, ໃນນັ້ນ ຈາກພາກ ພື້ນອາຊີຕາເວັນອອກມີື 16 ປະເທດ ແລະ ຈາກພາກພື້ນອາເມລິການ-ລາຕິນ ມີ 20 ປະເທດ.