ໃນວັນທີ 12 ພະຈິກ 2018 ທີ່ ສິງກະໂປ, ທ່ານ ລັດສະໝີ ແກ້ວມະນີ, ທູດປະຈຳກະຊວງການຕ່າງປະເທດ, ຕາງໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ, ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ. ຈຸດປະສົງຂອງກອງປະຊຸມຄັ້ງນີ້ ເພື່ອເປັນການກະກຽມໃຫ້ແກ່ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 18, ກອງປະຊຸມສະພາປະສານງານອາຊຽນ ຄັ້ງທີ 22, ກອງປະຊຸມສຸດຍອດອາຊຽນ ຄັ້ງທີ 33 ແລະ ບັນດາກອງປະຊຸມສຸດຍອດອື່ນທີ່ກ່ຽວຂ້ອງທີ່ຈະຈັດຂຶ້ນໃນລະຫວ່າງວັນທີ 13-15 ພະຈິກ 2018 ນີ້.

ກອງປະຊຸມ ໄດ້ປຶກສາຫາລື ກ່ຽວກັບ ການສະໝັກເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ຂອງ ບັນດາປະເທດນອກພາກພື້ນອາຊຽນທີ່ມີຄວາມສົນໃຈ ບົນພື້ນຖານລະບຽບການ ແລະ ມາດຕະຖານທີ່ກຳນົດໄວ້ໃນສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້. ພ້ອມກັນນັ້ນ, ກໍ່ໄດ້ປຶກສາຫາລືກ່ຽວກັບການພົວພັນຮ່ວມມື ລະ​ຫວ່າງ​ອາ​ຊຽນກັບຄູ່​ຮ່ວມ​ເຈ​ລະ​ຈາ ໂດຍສະເພາະກໍ່ແມ່ນການເສີມຂະຫຍາຍການຮ່ວມມືໃນ​ດ້ານ​ຕ່າງໆ ລະຫວ່າງ ອາຊຽນ-ລັດເຊຍ ແລະ ອາຊຽນ-ອີຢູ. ກອງປະຊຸມຍັງໄດ້ປຶກສາຫາລື ບັນ​ດາ​ກິດ​ຈະ​ກຳເພື່ອສະເຫລີມ ສະຫລອງ​ການພົວພັນຮ່ວມມື ລະຫວ່າງ ອາຊຽນ-ສ.ເກົາຫລີ ຄົບຮອບ 30 ປີ ໃນປີ 2019, ລວມທັງ ການຈັດກອງປະຊຸມສຸດຍອດສະເຫຼີມສະຫຼອງການຮ່ວມມືດັ່ງກ່າວ. ສປປ ລາວ ໃນນາມເປັນປະເທດປະສານງານ ອາຊຽນ-ສະຫະລັດອາເມລິກາ ກໍ່ໄດ້ສະເໜີຕໍ່ກອງຊຸມເພື່ອປຶກສາຫາລືກ່ຽວກັບການຮັດແໜ້ນການຮ່ວມມືອາຊຽນ-ສະຫະລັດ, ລວມທັງ ຂໍ້ສະເໜີຂອງສະຫະລັດກ່ຽວກັບເອກະສານແນວຄວາມຄິດ ວ່າດ້ວຍ ການສ້າງກົນໄກການຮ່ວມມື ອາຊຽນ-ສະຫະລັດ ດ້ານເມືອງອັດສະລິິຍະ.

ນອກ​ຈາກນີ້, ກອງປະຊຸມຍັງໄດ້ປຶກສາຫາລືບັນ​ຫາ​ສຳ​ຄັນ​ຕ່າງໆ ເປັນ​ຕົ້ນ​ແມ່ນ ບັນ​ດາ​ຂໍ້​ລິ​ເລີ່ມ​ຕ່າງໆ​ໃນ​ພາກ​ພື້ນ, ລວມ​ທັງແນວຄວາມຄິດ ອິນໂດ-ປາຊີຟິກ ໂດຍຍຶດໝັ້ນໃນຫລັກການເປີດກວ້າງ, ໂປ່ງໃສ, ກວມລວມ ແລະ ສົ່ງເສີມຄວາມເປັນແກນກາງຂອງອາຊຽນ ແລະ ນຳໃຊ້ບັນດາກົນໄກທີ່ອາຊຽນມີຢູ່ແລ້ວກໍ່ໃຫ້ເກີດຜົນປະໂຫຍດຮ່ວມກັນຢ່າງຮອບດ້ານຫລາຍຂຶ້ນ.