ທ່ານ ພົງສະຫວັນ ສີສຸລາດ, ຫົວໜ້າກົມອາຊຽນ, ຕາງໜ້າຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting) ຈັດຂຶ້ນໃນວັນທີ 15 ຕຸລາ 2018 ທີ່ ສິງກະໂປ.
ກອງປະຊຸມເຈົ້າໜ້າທີ່ອາວຸໂສອາຊຽນ ໄດ້ຮັບຟັງຄວາມຄືບໜ້າຂອງການສ້າງປະຊາຄົມອາຊຽນ ແລະ ປຶກສາ ຫາລືບັນດາຂໍ້ລິເລີ່ມການເປັນປະທານອາຊຽນຂອງສິງກະໂປ ທີ່ຈະນຳສະເໜີໃຫ້ຜູ້ນຳອາຊຽນຮັບຊາບ ແລະ ຮອງເອົາໃນ ທ້າຍປີ 2018 ເປັນຕົ້ນແມ່ນ: ເຄືອຂ່າຍຕົວເມືອງທັນສະໄໝອາຊຽນ ແລະ ລາຍຊື່ບັນດາຕົວເມືອງຂອງເຄືອຂ່າຍ ດັ່ງກ່າວຈາກປະເທດສະມາຊິກອາຊຽນ ພ້ອມແຜນປະຕິບັດງານ ແລະ ບັນຊີໂຄງການຮ່ວມມືໃນເບື້ອງຕົ້ນ.
ນອກນັ້ນ, ກອງປະຊຸມຍັງໄດ້ກະກຽມໃຫ້ແກ່ກອງປະຊູມສຸດຍອດອາຊຽນ ຄັ້ງທີ 33 ແລະ ກອງປະຊຸມ ສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນເດືອນພະຈິກ 2018 ທີ່ ສິງກະໂປ ເປັນຕົ້ນແມ່ນໄດ້ຜ່ານແຜນການເຄື່ອນໄຫວ, ຫົວຂໍ້ການປຶກສາຫາລື ແລະ ບັນດາເອກະສານຜົນຂອງກອງປະຊຸມ ລວມທັງກິດຈະກຳປິ່ນອ້ອມຕ່າງໆ ໂດຍສະເພາະ ແມ່ນພິທີມອບລາງວັນອາຊຽນ (ASEAN Prize) ເຊິ່ງແມ່ນໜຶ່ງໃນບັນດາຂໍ້ລິເລີ່ມການເປັນປະທານອາຊຽນຂອງ ສິງກະໂປ ແນ່ໃສ່ສົ່ງເສີມບຸກຄົນ ແລະ ອົງການຈັດຕັ້ງຈາກບັນດາ ປະເທດສະມາຊິກອາຊຽນທີ່ມີຜົນງານໃນການ ປະກອບສ່ວນຕໍ່ຂະບວນການສ້າງປະຊາຄົມອາຊຽນ.
ຄຽງຄູ່ກັນນັ້ນ, ກອງປະຊຸມ ຍັງໄດ້ປຶກສາຫາລືຄວາມຄືບໜ້າຂອງການພົວພັນ ລະຫວ່າງອາຊຽນກັບຄູ່ເຈລະຈາ ແລະ ແລກປ່ຽນຄວາມຄິດເຫັນ ກ່ຽວກັບໂຄງສ້າງຄວາມໝັ້ນຄົງພາກພື້ນ ເປັນຕົ້ນແມ່ນແນວຄວາມຄິດອິນໂດ-ປາຊີຟິກ.