ວັນທີ 21 ກັນຍາ 2018, ໜ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາປະເທດຍີ່ປຸ່ນ ກໍ່ຄືຄະນະນໍາສະຖານທູດ ໄດ້ຈັດຕັ້ງພິທີເຜີຍແຜ່ເຊື່ອມຊືມ ມະຕິ, ຄໍາສັ່ງ ແລະ ຮໍ່າຮຽນເອກະສານການເມືອງຂອງກົມການເມືອງສູນກາງພັກ ທີ່ສໍານັກງານສະຖານທູດ ໂດຍການເປັນປະທານ ແລະ ໃຫ້ກຽດຂຶ້ນເຜີຍແຜ່ເອກະສານ ໂດຍ ສະຫາຍ ວິໂຣດ ສຸນດາຣາ, ເລຂາໜ່ວຍພັກ, ເອກອັກຄະ ລັດຖະທູດ ແຫ່ງ ສປປ ລາວ ປະຈໍາປະເທດຍີ່ປຸ່ນ ທີ່ມີການເຂົ້າຮ່ວມຂອງສະມາຊິກພັກພະນັກງານສະຖານທູດ ແລະ ບັນດາສະມາຊິກພັກນັກສຶກສາທີ່ກໍາລັງຮໍ່າຮຽນຢູ່ປະເທດຍີ່ປຸ່ນ ເຂົ້າຮ່ວມທັງໝົດ 40 ກວ່າຄົນ.

ໃນພິທີດັ່ງກ່າວ, ສະຫາຍເລຂາໜ່ວຍພັກ ໄດ້ແຈ້ງສະພາບໃຫ້ຊາບກ່ຽວກັບຈຸດປະສົງສໍາຄັນ ແລະ ເປົ້າໝາຍຂອງການຮໍ່າຮຽນເອກະສານໃນຄັ້ງນີ້ ເພື່ອເປັນການເຜີຍແຜ່, ຊີ້ແຈງອະທິບາຍ ແລະ ແນະນໍາໃຫ້ແກ່ສະມາຊິກພັກ, ພະນັກງານ ແລະ ນັກສຶກສາລາວ ທີ່ອາໄສຢູ່ປະເທດຍີ່ປຸ່ນ ໄດ້ມີຄວາມຮັບຮູ້, ເຂົ້າໃຈ ແລະ ກໍາໄດ້ເນື້ອໃນຈິດໃຈສໍາຄັນຂອງເອກະສານ.

ເອກະສານທີ່ນຳມາເຜີຍແຜ່ຄັ້ງນິ້ໂດມີ ຜົນການຈັດຕັ້ງປະຕິບັດມະຕິກອງປະຊຸມ ຄັ້ງທີ X ຂອງພັກ ກໍ່ຄືຜົນກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 6 ສະໄໝທີ X; ມະຕິວ່າດ້ວຍວຽກງານ ຄຸ້ມຄອງພະນັກງານ; ມະຕິວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ; ມະຕິວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ; ມະຕິ ຂອງ ຄະນະບໍລິຫານງານສຸນກາງພັກປະຊາຊົນປະຕິວັດລາວ ວ່າດ້ວຍ ການຍົກສູງປະສິດທິພາບການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ເອກສານຄຳສັ່ງ ວ່າດ້ວຍການເພີ່ມທະວີການສ້າງໜ່ວຍພັກປອດໄສ, ເຂັ້ມແຂງ, ໜັກແໜ້ນ.

ໃນພິທີເຜີຍແຜ່ເອກະສານຄັ້ງນີ້ ໄດ້ດໍາເນີນໄປເປັນເວລາ 01 ວັນ ແລະ ໃນຕອນທ້າຍຂອງການຄົ້ນຄ້ວາຮໍ່າຮຽນສະຫາຍ ເລຂາໄດ້ໂອກາດຜູ້ເຂົ້າຮ່ວມເຊື່ອມຊືມໄດ້ມີການຕັ້ງຄຳຖາມ ແລະ ສົນທະນາແລກປ່ຽນຄວາມຄິດຄວາມ ເຮັດໃຫ້ມີບັນຍາກາດອັນດີ, ມີຄວາມໝາຍເລິກເຊິ່ງ ແລະ ອຸດົມສົມບູນທາງດ້ານເນື້ອໃນ ໂດຍການເຜີຍແຜ່ເອກະສານ ໄດ້ຮັບ   ໝາກຜົນຕາມຈຸດປະສົງ ແລະ ເປົ້າໝາຍ ແລະ ສໍາເລັດລົງດ້ວຍຜົນສໍາເລັດອັນຈົບງາມ ທີ່ເຮັດໃຫ້ສະມາຊິກພັກ, ພະນັກ ງານສະຖານທູດ ແລະ ນັກສຶກສາຕ່າງໆ ສາມາດຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ບັນດາມະຕິ, ຄໍາສັ່ງ ກໍ່ຄືເອກະສານຕ່າງໆຂອງກົມການເມືອງ ສູນກາງພັກ ໄດ້ວາງອອກ.

ນອກຈາກນັ້ນ, ພາຍຫຼັງສໍາເລັດພິທີທາງການ, ສະມາຊິກພັກ, ພະນັກງານສະຖານທູດ ແລະ ນັກສຶກສາລາວທຸກຄົນ ຍັງໄດ້ເຂົ້າຮ່ວມກິດຈະກໍາແຂ່ງຂັນກິລາສາມັກຄີ ທີ່ເຕັມໄປດ້ວຍຄວາມເບີກບານມ່ວນຊື່ນ ກໍ່ຄືມີການແລກປ່ຽນບົດຮຽນ ແລະ ປະສົບການຕ່າງໆລະຫວ່າງບັນດານັກສຶກສາລາວ ທີ່ອາໄສຢູ່ເຂດຕ່າງໆຂອງຍີ່ປຸ່ນ ໃນໂອກາດມາພົບພໍ້ກັນ ຢູ່ສະຖານທູດ.