ໃນຕອນບ່າຍວັນທີ 7 ກໍລະກົດ 2018, ເວລາ 14:00 ໂມງ, ທີ່ພະລາດຊະວັງ ອິສະຕານານູຣູນອີມານ (Istana Nurul Iman), ທ່ານ ພອນທະວີ ບຸດດາລາ ໄດ້ດຳເນີນການຍື່ນສານຕາຕັ້ງຕໍ່ ອົງສົມເດັດ ຊຸນຕານ ຮາຈິ ຮາຊານານ ໂບນເກຍ ແຫ່ງ ບຣູໄນ ດາຣູຊາລາມ (His Majesty Sultan Haji Hassanal Bolkiah, the Sultan and Yang Di-Pertuan of Brunei Darussalam) ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ປະເທດ ບຣູໄນ ດາຣູຊາລາມ ທີ່ມີສຳນັກງານສະຖານທູດຕັ້ງຢູ່ ນະຄອນຫຼວງບັນດາເສຣິເບກາວັນ, ປະເທດ ບຣູໄນ ດາຣູຊາລາມ.
ພາຍຫລັງສຳເລັດການຍື່ນສານແລ້ວ, ໃນເວລາ 14:30 ໂມງ, ເອກອັກຄະລັດຖະທູດ ແລະ ພະນັກງານນັກການທູດລາວ ກໍໄດ້ເຂົ້າຢ້ຽມຂ່ຳນັບ ອົງສົມເດັດ ຊຸນຕານ ຮາຈິ ຮາຊານານ ໂບນເກຍ ທີ່ພະລາດຊະວັງອິດສະຕານາ. ໃນການຢ້ຽມຂ່ຳນັບ, ອົງສົມເດັດ ຊຸນຕານ ໄດ້ຊົມເຊີຍ ແລະ ຍິນດີຕ້ອນຮັບເອກອັກຄະລັດຖະທູດລາວ ໃນການດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ບຣູໄນ ດາຣູຊາລາມ, ສະແດງຄວາມເພິ່ງພໍໃຈຕໍ່ສາຍພົວພັນ ແລະ ການຮ່ວມມືທີ່ດີລະຫວ່າງສອງປະເທດບຣູໄນ ແລະ ລາວ. ອົງສົມເດັດຊຸນຕານ ໄດ້ກ່າວເຖິງສາຍພົວພັນອັນດີທີ່ມີຕໍ່ກັບການນຳລາວ, ກັບປະເທດລາວ, ໄດ້ກ່າວເຖິງການໄປຢ້ຽມຢາມລາວ, ໂດຍສະເພາະການຢ້ຽມຢາມທາງການໃນຫລາຍປີກ່ອນ ແລະ ການໄປເຂົ້າຮ່ວມກອງປະຊຸມສຳຄັນທີ່ ສປປ ລາວ ເປັນເຈົ້າພາບຈັດເຊັ່ນ: ກອງປະຊຸມສຸດຍອດອາຊຽນ, ກອງປະຊຸມສຸດຍອດອາເຊັມໃນປີ 2012 ແລະ ກອງປະຊຸມສຸດຍອດອາຊຽນຄັ້ງທີ 28 ແລະ 29 ໃນປີ 2016. ການເດີນທາງໄປຢ້ຽມຢາມ ສປປ ລາວ ຫລາຍຄັ້ງຂອງອົງສົມເດັດຊຸນຕານ ແລະ ການນຳຂອງບຣູໄນແມ່ນໄດ້ຮັບການຕ້ອນຮັບອັນອົບອຸ່ນຈາກການນຳລາວ ແລະ ປະຊາຊົນລາວ, ສອງຝ່າຍໄດ້ເສີມສ້າງສາຍພົວພັນອັນດີນຳກັນຕະຫລອດມາ.
ເອກອັກຄະລັດຖະທູດ ພອນທະວີ ບຸດດາລາ ໄດ້ສະແດງຄວາມຂອບໃຈຕໍ່ ອົງສົມເດັດຊຸນຕານ ທີ່ເຫັນດີໃນການແຕ່ງຕັ້ງມາເປັນເອກອັກຄະລັດຖະທູດ ສປປ ລາວ ປະຈຳ ບຣູໄນ ດາຣູຊາລາມ ແລະ ຮູ້ສຶກເປັນກຽດຢ່າງສູງທີ່ໄດ້ຖືກແຕ່ງຕັ້ງຈາກປະທານປະເທດລາວ ມາດຳລົງຕຳແໜ່ງນີ້, ທັງສະແດງຄວາມຂອບໃຈຢ່າງຈິງໃຈທີ່ໄດ້ຮັບການຕ້ອນຮັບອັນອົບອຸ່ນ, ສົມກຽດ ແລະ ຈະສຸມທຸກຄວາມພະຍາຍາມເພື່ອສືບຕໍ່ປະກອບສ່ວນເສີມຂະຫຍາຍການພົວພັນ ລະຫວ່າງສອງປະເທດທີ່ດີຢູ່ແລ້ວນັ້ນ ໃຫ້ນັບມື້ນັບດີຂຶ້ນ ແລະ ມີໝາກຜົນຕົວຈິງໃນການຮ່ວມມືກັນ ໂດຍພາຍໃຕ້ການຊີ້ນຳຂອງການນຳຂອງທັງສອງປະເທດ. ພ້ອມກັນນີ້, ເອກອັກຄະລັດຖະທູດກໍໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄຳອວຍພອນໄຊອັນປະເສີດຈາກ ພະນະທ່ານ ບຸນຍັງ ວໍລະຈິດ, ປະເທດປະເທດ ແຫ່ງ ສປປ ລາວ ພ້ອມພັນລະຍາ ແລະ ລັດຖະບານແຫ່ງ ສປປ ລາວ ທີ່ສົ່ງມາຍັງ ອົງສົມເດັດ ຊຸນຕານ ຮາຈິ ຮາຊານານ ໂບນເກຍ, ລາຊີນີ, ບໍລົມມະວົງສານຸວົງທຸກພະອົງ ແລະ ປະຊາຊົນບຣູໄນ, ໂດຍສະເພາະຄຳອວຍພອນອັນປະເສີດເນື່ອງໃນໂອກາດ ຄົບຮອບ 72 ປີ ວັນເກີດຂອງອົງສົມເດັດຊຸນຕານ ທີ່ຈະມາເຖິງໃນມໍ່ໆນີ້. ເອກອັກຄະລັດຖະທູດໄດ້ຕາງໜ້າໃຫ້ ສປປ ລາວ ສະແດງຄວາມຂອບໃຈຕໍ່ອົງສົມເດັດຊຸນຕານກໍຄືລັດຖະບານ ແລະ ປະຊາຊົນບຣູໄນ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນດ້ານຕ່າງໆໃນໄລຍະຜ່ານມາ.
ສອງຝ່າຍຍັງໄດ້ກ່າວເຖິງບາງດ້ານສຳຄັນຕື່ມ ເປັນຕົ້ນແມ່ນປີ 2018 ນີ້ເປັນປີຄົບຮອບ 25 ປີແຫ່ງການສ້າງຕັ້ງສາຍພົວພັນທາງການທູດ ລະຫວ່າງ ລາວ ແລະ ບຣູໄນ, ເຊິ່ງສອງຝ່າຍເຫັນດີຈະມີການເຄື່ອນໄຫວສະເຫຼີມສະຫຼອງທີ່ສຳຄັນນຳກັນຈຳນວນນຶ່ງເຊັ່ນ ການແລກປ່ຽນຢ້ຽມຢາມຂອງຄະນະຜູ້ແທນຂັ້ນສູງນຳກັນ ແລະ ການແລກປ່ຽນສານອວຍພອນ ເຊິ່ງກັນໃນໂອກາດດັ່ງກ່າວ.
ອົງສົມເດັດຊຸນຕານໄດ້ຝາກຄວາມຢ້ຽມຢາມຖາມຂ່າວ ແລະ ຄຳອວຍພອນໄຊອັນປະເສີດມາຍັງ ພະນະທ່ານ ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ, ລັດຖະບານ ແລະ ປະຊາຊົນລາວ, ເຊິ່ງເອກອັກຄະລັດຖະທູດກໍໄດ້ຮັບເອົາ ແລະ ເພື່ອສົ່ງຕໍ່ຄຳອວຍພອນດັ່ງກ່າວໃຫ້ການນຳ ສປປ ລາວ.