ໃນວັນທີ 7 ພຶດສະພາ 2018, ທ່ານ ສີສອນໄຊ ເຫງົ້າວົງສີ ໄດ້ເຂົ້າຍື່ນສານຕາຕັ້ງຕໍ່ ສົມເດັດ ເຊັກ ຊາບາ ອານ-ອາມັດ ອານ-ຈາເບີ ອານ-ຊາບາ (H.H Sheikh Sabah Al-Ahmad Al-Jaber Al-Sabah) ອາເມຍ ແຫ່ງ ລັດກູເວດ, ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ກູເວດ ຢ່າງເປັນທາງການ.

ໃນໂອກາດດັ່ງກ່າວ, ສົມເດັດ ອາເມຍ ແຫ່ງ ລັດກູເວດ ໄດ້ສະແດງຄວາມຊົມເຊີຍ ແລະ ຍິນດີຕໍ່ ທ່ານທູດ ສີສອນໄຊ ເຫງົ້າວົງສີ ທີ່ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນ ເອກອັກຄະລັດຖະທູດ ຄົນໃໝ່ ແຫ່ງ ສປປ ລາວ ປະຈໍາ ກູເວດ. ພ້ອມນັ້ນ, ສົມເດັດ ອາເມຍ ໄດ້ສະແດງຄວາມເຊື່ອໝັ້ນວ່າ ທ່ານທູດ ຈະສາມາດສືບຕໍ່ປະກອບສ່ວນໃນການສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ຂະຫຍາຍຕົວຍິ່ງໆຂຶ້ນ ແລະ ໄດ້ອວຍພອນແກ່ທ່ານທູດ ຈົ່ງປະສົບຜົນສໍາເລັດໃນວຽກງານການທູດຂອງຕົນ. ສຸດທ້າຍ, ສົມເດັດ ອາເມຍ ໄດ້ສົ່ງຄວາມຢື້ຢາມຖາມຂ່າວ ຜ່ານທ່ານທູດໄປຍັງ ພະນະທ່ານ ປະທານປະເທດ ແຫ່ງ ສປປ ລາວ.

ໃນໂອກາດດຽວກັນ, ທັງສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ທີ່ມີມາແລ້ວ ລະຫວ່າງ ລາວ-ກູເວດ ນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນປີ 2008, ຊຶ່ງໄດ້ຮັບການເສີມຂະການເສີມຂະຫຍາຍຢ່າງເປັນປົກກະຕິ.

ທ່ານທູດ ສີສອນໄຊ ເຫງົ້າວົງສີ ໄດ້ສະແດງຄວາມຂອບໃຈ ແລະ ຄວາມປິຕິຍິນດີເປັນຢ່າງຍິ່ງ ຕໍ່ການຕ້ອນຮັບໃນຄັ້ງນີ້ ແລະ ໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຮູ້ບຸນຄຸນຕໍ່ ສົມເດັດ ອາເມຍ ກໍຄື ລັດຖະບານ ແລະ ປະຊາຊົນ ກູເວດ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອອັນລໍ້າຄ່າ ໃນການພັດທະນາເສດຖະກິດ-ສັງຄົມຂອງ ສປປ ລາວ. ພ້ອມນັ້ນ ທ່ານທູດ ຍັງໄດ້ໃຫ້ຄໍາໝັ້ນສັນຍາວ່າ ໃນໄລຍະທີ່ຕົນປະຕິບັດໜ້າທີ່ຢູ່ກູເວດ ຈະປະຕິບັດໜ້າທີ່ການທູດຂອງຕົນຢ່າງສຸດຄວາມສາມາດ ເພື່ອສືບຕໍ່ປະກອບສ່ວນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມ ລະຫວ່າງສອງປະເທດ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ. ພ້ອມກັນນີ້, ທ່ານທູດ ຍັງໄດ້ນໍາເອົາຄໍາອວຍພອນ ແລະ ຄວາມຢື້ຢາມຖາມຂ່າວອັນອົບອຸ່ນຈາກ ພະນະທ່ານ ປະທານປະເທດ ແຫ່ງ ສປປ ລາວ ສົ່ງເຖິງ ສົມເດັດ ອາເມຍ.