ທ່ານ ​ພົງ​ສະຫວັນ ສີ​ສຸລາ​ດ, ຫົວໜ້າ​ກົມ​ອາ​ຊຽນ, ກະຊວງ​ການ​ຕ່າງ​ປະ​ເທດ ​ຂອງ ສ​ປ​ປ ລາວ ໄດ້​ນຳ​ພາ​ຄະ​ນະ​ຜູ້​ແທນ​ລາວ​ ເຂົ້າ​ຮ່ວມກອງ​ປະ​ຊຸມ​​ເວທີປຶ​ກສາ​ຫາລື ອາ​ຊຽນ-ນິວຊີ​ແລນ ຄັ້ງ​ທີ 25, ​ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 10-11 ເມ​ສາ 2018 ທີ່ຈາ​ກາກ​ຕາ, ອິນ​​ໂດ​ເນ​ເຊຍພາຍ​ໃຕ້​ການ​ເປັນ​ປະ​ທານ​ຮ່ວມຂອງທ່ານ Jose Tavares, ຫ​ົວໜ້າ​ກົມ​ອາ​ຊຽນທັງເປັນເຈົ້າໜ້າທີ່ອາວຸໂສອາຊຽນຂອງອິນ​​ໂດ​ເນ​ເຊຍ ແລະ ທ່ານ Ben King, Deputy Secretary of the Americas and Asia Group, ​ກະຊວງ​ການ​ຕ່າງປະ​ເທດ ແລະ ການຄ້ານິວຊີ​​ແລນ.

    ກອງ​ປະ​ຊຸມ ​ໄດ້​ທົບ​ທວນ​ຄືນ ​ແລະ ສະ​ແດງ​ຄວາມ​ເພິ່ງ​ພໍ​ໃຈ​ຕໍ່ຄວາມ​ຄືບ​ໜ້າ​ຂອງ​ການ​ຮ່ວມ​ມື​ ອາ​ຊຽນ-ນິວຊີ​ແລນ ໃນ​ຂົງ​ເຂດ​ຕ່າງໆ​ພາຍ​ໃຕ້​ແຜນປະຕິບັດງານ​ ເພື່ອຈັດ​ຕັ້ງປະຕິບັດ​ຖ​ະ​ແຫລ​ງການ​ຮ່ວມ​ວ່າດ້ວຍ​​ຄູ່​ຮ່ວມ​ຍຸດ​ທະ​ສາດ ​ອາ​ຊຽນ-ນິວຊີ​ແລ​ນ 2016-2020 ​ເຊັ່ນ: ການຮ່ວມມືເພື່ອຕ້ານອາຊະຍາກຳຂ້າມຊາດ, ການ​ຄ້າ ແລະ ການ​ລົງ​ທຶນ, ການ​ເຊື່ອມ​ຈອດ, ການສຶກສາ, ການ​ຄຸ້ມ​ຄອງ​ໄພພິບັດ, ການປ່ຽນແປງຂອງດິນຟ້າອາກາດ, ການຮັບແຄບຄວາມແຕກໂຕນດ້ານການພັດທະນາ ແລະ ການ​ໄປ​ມາ​ຫາ​ສູ່​ລະ​ຫວ່າງ​ປະ​ຊາ​ຊົນ. ນອກນີ້, ກອງ​ປະຊຸມ​ຍັງໄດ້​​ກະ​ກຽມ​ໃຫ້​ແກ່ກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ​ ອາ​ຊຽນ-ນິວຊີແລນ ​ເຊິ່ງຈະ​ຈັດ​ຂຶ້ນ​ໃນ​​ເດືອ​ນສິງຫາ 2018 ທີ່ສິງກະ​ໂປ. ໃນ​ໂອກາດ​ນີ້, ກອງ​ປະຊຸມ​ກໍໄດ້ແລກ​ປ່ຽນ​ຄວາມ​ຄິດ​ເຫັນກ່ຽວ​ກັບ​ບັນ​ຫາ​ພາ​ກ​ພື້ນ ແລະ ສາ​ກົນທີ່ມີຄວາມ​ສົນ​ໃຈ​ຮ່ວມກັນ​.