ໃນວັນທີ 13 ກຸມພາ 2018, ທ່ານ ແສງ ສຸຂະທິວົງ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກໄທ ພ້ອມດ້ວຍພະນັກງານສະຖານທູດລາວ ໄດ້ເຂົ້າອວຍພອນ ທ່ານ ຫງວ້ຽນ ຮ່າຍ ບັງ, ເອກອັກຄະລັດຖະທູດ ແຫ່ງ ສສ. ຫວຽດນາມ ປະຈໍາ ລາຊະອານາຈັກໄທ, ເນື່ອງໃນໂອກາດປີ​ໃໝ່​ຂອງ​ປະຊາຊົນ​ຫວຽດນາມ.

ໂອກາດດັ່ງກ່າວ, ທ່ານເອກອັກຄະລັດຖະທູດລາວ ໄດ້ກ່າວຄໍາອວຍພອນປີ​ໃໝ່, ສົ່ງ​ຄໍາ​ອວຍພອນໄຊອັນປະເສີດແດ່ຜູ້ນໍາພັກ-ລັດເວົ້າລວມ, ເວົ້າສະເພາະ ທ່ານເອກອັກຄະລັດຖະທູດຫວຽດນາມ ພ້ອມດ້ວຍພະນັກງານຈົ່ງມີແຕ່ຄວາມສຸກ ໂຊກດີປະສົບຜົນສໍາເລັດໃນໜ້າທີ່ວຽກ​ງານ, ນໍາພາປະເທດຫວຽດນາມ ກ້າວສູ່ຄວາມສໍາເລັດໃນທຸກດ້ານ, ອວຍພອນໃຫ້ສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ຈົ່ງຈະເລີນງອກງາມຍິ່ງໆຂຶ້ນ.

ທ່ານເອກອັກຄະລັດຖະທູດ ຫງວ້ຽນ ຮ່າຍ ບັງ ໄດ້ກ່າວສະແດງຄວາມດີໃຈເປັນຢ່າງຍິ່ງຕໍ່ຄໍາອວຍພອນອັນປະເສີດ ແລະ ຄວາມປາຖະໜາດີຂອງເອກອັກຄະລັດທູດລາວ, ຫວັງເປັນຢ່າງຍິ່ງວ່າສາຍພົວພັນມິດຕະພາບອັນຍິ່ງໃຫຍ່ ຫວຽດນາມ-ລາວ ນັບມື້ຈະໄດ້ຮັບການຖະໜຸບໍາລຸງໃຫ້ງອກງາມຍິ່ງໆ​ຂຶ້ນ​ໄປ.

ສອງສະຖານເອກອັກຄະລັດຖະທູດ ລາວ-ຫວຽດນາມ ທີ່​ບາງກອກປະ​ເທດ​ໄທ ມີ​ການ​ພົວພັນ​ກັນ​ສະໜິດແໜ້ນ​ຕະຫລອດ​ມາ ເຊິ່ງ​ໃນ​ປີຜ່ານມາ,​ ສອງ​ສະຖານທູດ ​ກໍ່​ໄດ້​ຮ່ວມ​ກັນ​ຈັດ​ກິດຈະ​ກໍາຫຼາຍຢ່າງ ລວມທັງແຂ່ງຂັນກິລາມິດຕະພາບ ເພື່ອຮັດແໜ້ນຄວາມສາມັກຄີ ແລະ ເສີມຂະຫຍາຍສາຍພົວພັນທີ່ເປັນມູນເຊື້ອໃຫ້ແໜ້ນແຟ້ນຫຍິ່ງໆຂຶ້ນ.