ໃນວັນທີ 28 ພະຈິກ 2017, ກົມສົນທິສັນຍາ ແລະ ກົດໝາຍ ໄດ້ຈັດກອງປະຊຸມເຜີຍແຜ່ ຢູ່ທີ່ຫ້ອງປະຊຸມຊັ້ນ 03 ຂອງກະຊວງການຕ່າງປະເທດ ໃຫ້ແກ່ພະນັກງານວິຊາການກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ.
ຈຸດປະສົງຕົ້ນຕໍຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມຮັບຮູ້, ຄວາມເຂົ້າໃຈ ແລະ ຄວາມເປັນເອກະພາບຂອງພະນັກງານກະຊວງ ຕປທ ແລະ ຄຕພ ໃນການຈັດຕັ້ງປະຕິບັດກົດໝາຍສະບັບນີ້ໃຫ້ຖືກຕ້ອງ.
ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ມີຜົນສັກສິດນັບແຕ່ວັນທີ 18 ພະຈິກ ເປັນຕົ້ນມາ. ການຮັບຮອງເອົາກົດໝາຍສະບັບທຳອິດຂອງຂະແໜງການການຕ່າງປະເທດ ສະບັບນີ້ ແມ່ນຜົນສຳເລັດ ແລະ ບາດກ້າວອັນສຳຄັນຂອງຂະແໜງການຕ່າງປະເທດໃນການພັດທະນາລະບົບນິຕິກຳຂອງຕົນ ເພື່ອກ້າວໄປສູ່ການຄຸ້ມຄອງລັດດ້ວຍກົດໝາຍເທື່ອລະກ້າວ. ການປະຕິບັດກົດໝາຍສະບັບນີ້ຈະຊ່ວຍເຮັດໃຫ້ການຄຸ້ມຄອງວຽກງານສົນທິສັນຍາ ແລະ ສັນຍາສາກົນລວມສູນ ແລະ ເປັນເອກະພາບໃນຂອບເຂດທົ່ວປະເທດ ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ຜ່ານການເຜີຍແຜ່ກົດໝາຍດັ່ງກ່າວ, ສັງເກດເຫັນວ່າຜູ້ເຂົ້າຮ່ວມສາມາດຮັບຮູ້ ແລະ ເຂົ້າໃຈກ່ຽວກັບວຽກງານການສ້າງ ແລະ ປະຕິບັດສົນທິສັນຍາ ແລະ ສັນຍາສາກົນໄດ້ເປັນຢ່າງດີ ຊຶ່ງສະແດງອອກໃນເວລາທີ່ມີການ ຖາມ-ຕອບ ແລະ ແລກປ່ຽນຄຳຄິດເຫັນ ລະຫວ່າງ ວິທະຍາກອນ ແລະ ຜູ້ເຂົ້າຮ່ວມກອງປະຊຸມ ເນື່ອງຈາກກົດໝາຍສະບັບດັ່ງກ່າວ ເປັນກົດໝາຍທີ່ມີລັກສະນະທີ່ເຂົ້າໃຈຍາກ ແລະ ກະຊວງການຕ່າງປະເທດ ກໍມີຄວາມຮັບຜິດຊອບໃນການຄຸ້ມຄອງວຽກງານການສ້າງ ແລະ ປະຕິບັດສົນທິສັນຍາ ແລະ ສັນຍາສາກົນຕ່າງໆ. ທ່ານ ປະທານ ກອງປະຊຸມຈຶ່ງໄດ້ເນັ້ນເຖິງຄວາມຈຳເປັນສຳລັບພະນັກງານກະຊວງການຕ່າງປະເທດ ຕ້ອງໄດ້ສືບຕໍ່ສຶກສາກົດໝາຍດັ່ງກ່າວຢ່າງລະອຽດເລີກເຊິ່ງ ເພື່ອຈັດຕັ້ງປະຕິບັດໄດ້ຢ່າງຖືກຕ້ອງ.