ໃນໄລຍະວັນທີ 16-17 ພະຈິກ 2017, ກະຊວງການຕ່າງປະເທດ ແຫ່ງ ສປປ ລາວ ຮ່ວມກັບ ສະຫະລັດອາເມລິກາ ໄດ້ເປັນເຈົ້າພາບຮ່ວມຈັດກອງປະຊຸມໜ່ວຍງານວິຊາການລະດັບພາກພື້ນແມ່ນ້ຳຂອງຕອນລຸ່ມ-ສະຫະລັດອາເມລິກາ ຄັ້ງທີ 10 ແລະ ເພື່ອນແມ່ນ້ຳຂອງຕອນລຸ່ມ ຂື້ນ ທີ່ ນະຄອນຫຼວງວຽງຈັນ, ເປັນກຽດກ່າວເປີດກອງປະຊຸມຄັ້ງນີ້ ໂດຍທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ແລະ ທ່ານ ນາງ ຣິນາ ບິດເຕີ, ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ພ້ອມດ້ວຍຄະນະຜູ້ແທນຈາກແຕ່ລະປະເທດສະມາຊິກ. ກອງປະຊຸມດັ່ງກ່າວ ປະກອບມີຜູ້ເຂົ້າຮ່ວມຈາກບັນດາພາກລັດ ແລະ ເອກະຊົນ ຂອງປະເທດສະມາຊິກແມ່ນ້ຳຂອງ ແລະ ສະຫະລັດອາເມລິກາ (ກໍາປູເຈຍ, ສປປ ລາວ, ມຽນມາ, ໄທ, ຫວຽດນາມ, ແລະ ສະຫະລັດອາເມລິກາ) ແລະ ບັນດາເພື່ອນແມ່ນ້ຳຂອງຕອນລຸ່ມ (ສາທາລະນະລັດເກົາຫຼີ, ຍີ່ປຸ່ນ, ອົດສະຕາລີ, ນິວຊີແລນ, ທະນາຄານພັດທະນາອາຊີ, ທະນາຄານໂລກ, ແລະ ກອງເລຂາອາຊຽນ) ລວມມີປະມານ 150 ທ່ານ.
ຈຸດປະສົງຂອງກອງປະຊຸມຄັ້ງນີ້ ແນ່ໃສ່ເພື່ອທົບທວນຄືນການຈັດຕັ້ງຜັນຂະຫຍາຍແຜນປະຕິບັດງານປີ 2016-2020 ກໍຄື ການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆຂອງແຕ່ລະ 6 ເສົາຄ້ຳບູລິມະສິດ: ຄວາມໝັ້ນຄົງດ້ານສະບຽງອາຫານ ແລະ ກະສິກຳ, ການເຊື່ອມຈອດ, ການສຶກສາ, ຄວາມໝັ້ນຄົງດ້ານພະລັງງານ, ສິ່ງແວດລ້ອມ ແລະ ນ້ຳ, ແລະ ສາທາລະນະສຸກ ໃນໄລຍະຜ່ານມາ, ພ້ອມທັງປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ ໂດຍສະເພາະການຈັດຕັ້ງຜັນຂະຫຍາຍຂໍ້ຕົກລົງຕ່າງໆ ທີ່ໄດ້ຮັບຮອງເອົາໃນກອງປະຊຸມລັດຖະມົນຕີຕ່າງປະເທດ ເພື່ອໃຫ້ໄດ້ຮັບຜົນຢ່າງເປັນຮູບປະທຳຂຶ້ນເທື່ອລະກ້າວ. ນອກຈາກນີ້, ກອງປະຊຸມ ຍັງຈະໄດ້ປຶກສາຫາລື ກ່ຽວກັບ ການປັບປຸງເສົາຄໍ້າບູລິມະສິດ ເພື່ອເຮັດໃຫ້ຂອບການຮ່ວມມືດັ່ງກ່າວມີປະສິດທິພາບຫຼາຍຂຶ້ນ.
ຄຽງຄູ່ກັບກອງປະຊຸມຄັ້ງນີ້, ໃນຕອນບ່າຍຂອງວັນທີ 16 ພະຈິກ 2017, ຄະນະຜູ້ແທນຍັງໄດ້ເຂົ້າຮ່ວມພິທີເປີດສູນຜູ່ປະກອບການແມ່ຍິງ “Women’s Entrepreneurial Centre (WEC)” ທີ່ຖືກສ້າງຕັ້ງຂຶ້ນໂດຍການສະໜັບສະໜູນຈາກອົງການສຶກສາໂລກ ທີ່ແນ່ໃສ່ໃຫ້ຜູ່ປະກອບການແມ່ຍິງ ສາມາດເຂົ້າເຖິງການຊ່ວຍເຫຼືອ ແລະ ການເຂົ້າເຖິງແຫຼ່ງທຶນໃນການເຮັດທຸລະກິດ ແລະ ສ້າງໃຫ້ທຸລະກິດມີຄວາມຍຶນຍົງ ແລະ ທັນສະໄໝ, ຊຶ່ງເປັນໜຶ່ງໃນໂຄງການທີ່ສຳເລັດເປັນຮູບປະທຳ ຂອງຂອບການຮ່ວມມືດັ່ງກ່າວ.
ກອງປະຊຸມຄັ້ງນີ້ ແມ່ນ ເທື່ອທີ 2 ທີ່ ສປປ ລາວ ໄດ້ຮັບກຽດເປັນເຈົ້າພາບຮ່ວມກັບ ສະຫະລັດອາເມລິກາ ນັບແຕ່ໄດ້ມີການສ້າງຕັ້ງຂອບການຮ່ວມມືດັ່ງກ່າວຂຶ້ນໃນປີ 2009, ໂດຍອີງຕາມຮອບວຽນການພັດປ່ຽນ ຂອງສະມາຊິກການຮ່ວມມືແມ່ນ້ຳຂອງຕອນລຸ່ມ-ສະຫະລັດອາເມລິກາ, ຊຶ່ງຄັ້ງທຳອິດ ທີ່ ສປປ ລາວ ເປັນເຈົ້າພາບຮ່ວມ ແມ່ນໃນປີ 2014.