ພິທີໂຮມຊຸມນຸມ ເພື່ອສະເຫຼີມສະຫຼອງສອງວັນປະຫວັດສາດຄື: ວັນສ້າງຕັ້ງສາຍພົວພັນການທູດຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ລາວ-ຫວຽດນາມ ຄົບຮອບ 40 ປີ ໄດ້ຈັດຂຶ້ນໃນວັນທີ 18 ກໍລະກົດ 2017, ທີ່ນະຄອນດານັງ;
ຝ່າຍຫວຽດນາມ ມີ ສະຫາຍ ຫງວຽນ ຊວນ ແອງ, ກໍາມະການສູນກາງພັກ, ເລຂາຄະນະພັກ, ປະທານສະພາປະຊາຊົນນະຄອນດານັງ, ສະຫາຍ ຮີ່ນ ດຶກ ເທີ, ປະທານຄະນະກໍາມະການປະຊາຊົນນະຄອນດານັງ; ສະຫາຍ ດັ່ງ ທິ ກິມ ລຽນ, ປະທານແນວໂຮມແຫ່ງຊາດຫວຽດນາມນະຄອນດານັງ, ອາດີດທະຫານອາສາສະໝັກຫວຽດນາມ ແລະ ການນໍາຂອງຂະແໜງການຕ່າງໆ. ຝ່າຍລາວ ມີ ສະຫາຍ ຄໍາແສນ ພົມມະແສງ, ກົງສຸນໃຫຍ່ລາວ ທີ່ ນະຄອນດານັງ ພ້ອມດ້ວຍພະນັກງານ ແລະ ນັກສຶກສາລາວ; ນອກຈາກນັ້ນຍັງມີ ກົງສຸນໃຫຍ່ ສະຫະພັນ ຮັດເຊຍ, ສປ ຈີນ, ກົງສຸນກິຕິມະສັກ ແອັດສະປາຍ ທີ່ ນະຄອນດານັງ ລວມທັງໝົດຫຼາຍກວ່າ 500 ຄົນ. ໃນພິທີ ສະຫາຍ ຫງວຽນ ຊວນ ແອງ ແລະ ສະຫາຍ ຄໍາແສນ ພົມມະແສງ ແລະ ສະຫາຍ ຟຸ່ງ ເຕິນ ຫວຽດ, ປະທານສະມາຄົມມິດຕະພາບ ຫວຽດນາມ-ລາວ ໄດ້ຜັດປ່ຽນກັນຂຶ້ນກ່າວຄໍາປາໄສ ໂດຍໄດ້ຍົກໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງ ລາວ-ຫວຽດນາມ ເວົ້າລວມ, ເວົ້າສະເພາະ ການພົວພັນຮ່ວມມືຂອງນະຄອນດານັງ ກັບບັນດາແຂວງພາກກາງ, ພາກໃຕ້ຂອງລາວ; ພ້ອມກັນນັ້ນ ຢືນຢັນຈະສືບຕໍ່ປົກປັກຮັກສາ, ເສີມຂະຫຍາຍ ແລະ ສຶກສາອົບຮົບ ເຜີຍແຜ່ໃຫ້ພະນັກງານ, ນົກຮົບ, ປະຊາຊົນ ໂດຍສະເພາະແມ່ນຄົນລຸ້ນໜຸ່ມ ໃຫ້ມີຄວາມຮັບຮູ້ຢ່າງເລິກເຊິ່ງ ແລະ ເຂົ້າໃຈຖືກຕ້ອງຕໍ່ສາຍພົວພັນດັ່ງກ່າວ. ໃນພິທີ ຕາງໜ້າຊາວໜຸ່ມນັກສຶກສາລາວ ແລະ ຕາງໜ້າຊາວໜຸ່ມນັກສຶກສາຫວຽດນາມ ຂຶ້ນກ່າວສະແດງຄວາມຮູ້ບຸນຄຸນຕໍ່ພັກ ແລະ ລັດຖະບານ ສອງປະເທດ ລາວ-ຫວຽດນາມ ແລະ ໃຫ້ຄໍາໝັ້ນສັນຍາຈະສືບຕໍ່ເພີ່ມພູນຄູນສ້າງ ທະນຸທະນອມ ສາຍພົວພັນພິເສດ ລາວ-ຫວຽດນາມ ແລະ ອອກແຮງສຶກສາຮໍ່າຮຽນ, ໃຫ້ສົມດັ່ງຄວາມມຸ້ງມາດປາຖະນາຂອງສອງພັກ, ສອງລັດ ແລະ ປະຊົນສອງຊາດ. ພິທີໂຮມຊຸມນຸມ ໄດ້ຈັດຂຶ້ນ ແລະ ດໍາເນີນຢ່າງຍິ່ງໃຫຍ່ ມີເນື້ອໃນຄວາມໝາຍອັນເລິກເຊິ່ງ ມີບັນຍາກາດອັນຄຶກຄື້ນເຕັມໄປດ້ວຍຄວາມສາມັກຄີເບີກບານ ແລະ ສຳເລັດຜົນຢ່າງຈົບງາມ. ພ້ອມກັນນັ້ນ, ຕາມຖະໜົນ, ສະຖານທີ່ສໍາຄັນຕ່າງໆຂອງນະຄອນດານັງ ກໍໄດ້ຕິດປ້າຍຄໍາຂວັນໂຄສະນາເຜີຍແຜ່ ປີສາມັກຄີມິດຕະພາບ ລາວ-ຫວຽດນາມ 2017 ຢ່າງກວ້າງຂວາງ.
ນອກຈາກນັ້ນ, ສະຖານກົງສຸນໃຫຍ່ ພ້ອມພະນັກງານ ໄດ້ຕ້ອນຮັບການມາອວຍພອນຂອງຄະນະພັກ, ອໍານາດການປົກຄອງ ແລະ ຂະແໜງການຕ່າງໆ ນະຄອນດານັງ; ໃນວັນດຽວກັນ, ທ່ານກົງສຸນໃຫຍ່ ກໍໄດ້ໃຫ້ສໍາພາດຕໍ່ນັກຂ່າວວິທະຍຸ-ໂທລະພາບດານັງ ກ່ຽວກັບ ຄວາມໝາຍສໍາຂອງສອງວັນປະຫວັດສາດ ລາວ-ຫວຽດນາມ. ໃນໂອກາດດັ່ງກ່າວ ກໍໄດ້ຈັດງານລ້ຽງພົບສ້າງສັນ ເພື່ອຂໍ່ານັບຮັບຕ້ອນປີສາມັກຄີມິດຕະພາບ ລາວ-ຫວຽດນາມ ໂດຍການເປັນກຽດເຂົ້າຮ່ວມຂອງ ສະຫາຍ ໂຮ່ ກີ ມິນ, ຮອງປະທານຄະນະກໍາມະການປະຊາຊົນດານັງ; ສະຫາຍ ຟຸ່ງ ເຕີນ ຫວຽດ ປະທານສະມາຄົມມິດຕະພາບ ຫວຽດນາມ-ລາວ ນະຄອນດານັງ, ທະຫານ, ຕໍາຫຼວດ, ພະແນກການຕ່າງປະເທດແຂວງອ້ອມຂ້າງຈໍານວນໜຶ່ງ ແລະ ນັກສຶກສາລາວ ລວມທັງໝົດ 100 ຄົນ.