ໃນວັນທີ 15 ກໍລະກົດ, ທີ່ ເຊອູນ, ສ.ເກົາຫລີ, ໂດຍການສົມທົບກັນ ລະຫວ່າງ ສະຖານເອກອັກຄະລັດຖະທູດລາວ ແລະ ຫວຽດນາມ ປະຈຳ ສ.ເກົາຫລີ ໄດ້ຈັດຕັ້ງພິທີສະເຫລິມສະຫລອງສອງວັນປະຫວັດສາດ ການພົວພັນ ແລະ ການຮ່ວມມື ລາວ-ຫວຽດນາມ, ຫວຽດນາມ-ລາວ, ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ 40 ປີ (18 ກໍລະກົດ 1977) ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ (05 ກັນຍາ 1962), ໂດຍການເຂົ້າຮ່ວມຂອງ ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດລາວ ພ້ອມດ້ວຍພັນລະຍາ ແລະ ທ່ານ ຫວງຽນ ວູ ຕູ (NGUYEN Vu Tu), ເອກອັກຄະລັດຖະທູດຫວຽດນາມ ພ້ອມດ້ວຍພັນລະຍາ, ມີບັນດາພະນັກງານຂອງສະຖານທູດ, ພະນັກງານການບິນລາວ ປະຈຳ ເຊອູນ ແລະ ນັກສຶກສາລາວ ຈຳນວນໜຶ່ງ ທີ່ ສ.ເກົາຫລີ ເຂົ້າຮ່ວມທັງຫມົດ 50 ກວ່າຄົນ.

ໃນພິທີດັ່ງກ່າວ, ທ່ານເອກອັກຄະລັດຖະທູດລາວ ແລະ ຫວຽດນາມ ໄດ້ຜັດປ່ຽນກັນກ່າວຄຳປາໄສ ເພື່ອລະນຶກເຖິງພາລະກຳ ແລະ ມູນເຊື້ອປະຫວັດສາດແຫ່ງການພົວພັນ, ການຮ່ວມມື ແລະ ການຊ່ວຍເຫລືອເຊິ່ງກັນ ແລະ ກັນ ບໍ່ວ່າຍາມຕໍ່ສູ້ເພື່ອເອກະລາດແຫ່ງຊາດ ກໍຄືໃນຍາມສ້າງສາພັດທະນາປະເທດຊາດ, ຍາມໃດສອງຊາດລາວ-ຫວຽດນາມ ກໍໄດ້ຢືນຄຽງບ່າຄຽງໄຫລ່ ຮ່ວມສຸກຮ່ວມທຸກໃນພາລະກິດປະຕິວັດ ທີ່ບັນພະບູລຸດຂອງທັງສອງປະເທດ ໄດ້ສ້າງໄວ້ໃຫ້ຄົນລຸ້ນໃຫມ່ ໄດ້ສືບທອດຕໍ່ໄປ. ທ່ານທູດທັງສອງ ໄດ້ຢືນຢັນເຖິງການສືບຕໍ່ໃຫ້ການສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນທຸກດ້ານຂອງສະຖານທູດ ກໍຄືປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ. ນອກຈາກນີ້, ເພື່ອເຮັດໃຫ້ການສະເຫລີມສະຫລອງມີບັນຍາກາດ ທັງສອງສະຖານທູດ ຍັງໄດ້ຈັດຕັ້ງແຂ່ງຂັນໂບລິ້ງມິດຕະພາບ ເຊິ່ງບັນຍາກາດແມ່ນເຕັມໄປດ້ວຍຄວາມຄຶກຄື້ນມ່ວນຊື່ນ ແລະ ສະໜິດສະໜົມ.

ນອກຈາກກິດຈະກຳໃນຄັ້ງນີ້ແລ້ວ, ທັງສອງສະຖານທູດ ຍັງຈະໄດ້ຮ່ວມກັນຈັດຕັ້ງກິດຈະກຳຮ່ວມກັນອີກໃນຕໍ່ໜ້າ ເພື່ອເປັນການຮັດແໜ້ນຄວາມສາມັກຄີ, ຄວາມໃກ້ຊິດຕິດແທດ ແລະ ການພົວພັນ ລະຫວ່າງ ພະນັກງານຂອງທັງສອງສະຖານທູດໃຫ້ແໜ້ນແຟ້ນຍິ່ງຂຶ້ນ.