ໃນວັນທີ 21 ເມສາ 2017 ຄະນະປະຈຳສະພາແຫ່ງຊາດ ໄດ້ພິຈາລະນາ ແລະ ຕົກລົງໃຫ້ສັດຕະຍາບັນສົນທິສັນຍາອາຊຽນ ວ່າດ້ວຍ ການຕ້ານການຄ້າມະນຸດ, ໂດຍສະເພາະແມ່ຍິງ ແລະ ເດັກນ້ອຍ (ASEAN Convention Against Trafficking in Persons, Especially Women and Children). ສົນທິສັນຍາສະບັບນີ້ ໄດ້ຮັບການລົງນາມໂດຍຜູ້ນຳອາຊຽນ ໃນໂອກາດກອງປະຊຸມສຸດຍອດອາຊຽນ ຄັ້ງທີ 27 ເດືອນພະຈິກ 2015 ທີ່ ກົວລາລຳເປີ, ປະເທດມາເລເຊຍ. ປະຈຸບັນ ມີ 7 ປະເທດສະມາຊິກອາຊຽນໄດ້ໃຫ້ສັດຕະຍາບັນສົນທິສັນຍາສະບັບນີ້ ລວມທັງ ສປປ ລາວ.
ສົນທິສັນຍາ ມີຈຸດປະສົງແມ່ນເພື່ອເພີ່ມທະວີການຮ່ວມມືລະຫວ່າງປະເທດອາຊຽນ ໃນການຕ້ານ ແລະ ສະກັດກັ້ນການຄ້າມະນຸດ ໂດຍສະເພາະແມ່ຍິງ ແລະ ເດັກນ້ອຍ ໃຫ້ມີປະສິດທິຜົນ, ຮັບປະກັນການລົງໂທດຕໍ່ຜູ້ກະທໍາຜິດຖານການຄ້າມະນຸດ, ປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ ໂດຍຄຳນຶງເຖິງສິດທິມະນຸດຂອງພວກເຂົາເຈົ້າ, ສົ່ງເສີມການຮ່ວມມືລະຫວ່າງປະເທດສະມາຊິກອາຊຽນໃນການຊ່ວຍເຫຼືອກັນທາງດ້ານຍຸຕິທຳ, ການສົ່ງຜູ້ຮ້າຍຂ້າມແດນ, ການດຳເນີນຄະດີຕໍ່ການຄ້າມະນຸດ ໂດຍຜ່ານການຈັດຕັ້ງປະຕິບັດພັນທະພາຍໃຕ້ສົນທິສັນຍາ ແລະແຜນປະຕິບັດງານອາຊຽນ ວ່າດ້ວຍ ການຕ້ານການຄ້າມະນຸດ, ໂດຍສະເພາະແມ່ຍິງ ແລະ ເດັກນ້ອຍ (ASEAN Plan of Action against Trafficking in Persons, Especially Women and Children ຫຼື APA).
ສປປ ລາວ ໄດ້ເຄື່ອນໄຫວຢ່າງຕັ້ງໜ້າໃນວຽກງານການຕ້ານ ແລະ ສະກັດກັ້ນການຄ້າມະນຸດ ເປັນຕົ້ນແມ່ນການສ້າງຕັ້ງຄະນະກຳມະການຕ້ານການຄ້າມະນຸດລະດັບຊາດ ເຊິ່ງມີກອງເລຂາຢູ່ກະຊວງປ້ອງກັນຄວາມສະຫງົບ, ມີສັນຍາຮ່ວມມືໃນລະດັບສອງຝ່າຍກັບ ສສ ຫວຽດນາມ, ສປ ຈີນ ແລະ ໄທ, ມີການຮ່ວມມືໃນລະດັບອະນຸພາກພື້ນລຸ່ມແມ່ນໍ້າຂອງ, ຮ່ວມມືໃນລະດັບອາຊຽນ, ພາກພື້ນ ແລະ ສາກົນ. ສປປ ລາວ ມີນິຕິກຳພາຍໃນ ໃນການຈັດຕັ້ງປະຕິບັດສົນທິສັນຍາດັ່ງກ່າວ ເປັນຕົ້ນແມ່ນ ກົດໝາຍວ່າດ້ວຍການຕ້ານການຄ້າມະນຸດ, ກົດໝາຍອາຍາ, ກົດໝາຍວ່າດ້ວຍການດຳເນີນຄະດີອາຍາ, ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ກົດໝາຍວ່າດ້ວຍການຕ້ານ ແລະ ສະກັດກັ້ນຄວາມຮຸນແຮງຕໍ່ແມ່ຍິງ ແລະ ເດັກ, ກົດໝາຍວ່າດ້ວຍການຕ້ານການສໍ້ລາດບັງຫຼວງ, ກົດໝາຍວ່າດ້ວຍການຕ້ານການຟອກເງິນ, ການສະໜອງເງິນທຶນໃຫ້ແກ່ການກໍ່ການຮ້າຍ. ລັດຖະບານລາວ ໄດ້ຮັບຮອງເອົາແຜນງານແຫ່ງຊາດ ວ່າດ້ວຍ ການສະກັດກັ້ນ ແລະ ຕ້ານການຄ້າມະນຸດ ແຕ່ປີ 2017-2020 ໃນກາງເດືອນເມສາ ທີ່ຜ່ານມາ.