ໃນວັນທີ 5 ມີນາ 2017, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ, ໄດ້ພົບປະໂອ້ລົມກັບພີີ່ນ້ອງຄົນເຊື້ອຊາດລາວ ແລະ ນັກສຶກສາລາວ ຢູ່ ປະເທດຍີ່ປຸ່ນ, ໃນໂອກາດໄປຢ້ຽມຢາມຍີ່ປຸ່ນຢ່າງເປັນທາງການ ແຕ່ວັນທີ 5-10 ມີນາ 2017, ໂດຍມີຜູ້ເຂົ້າຮ່ວມ ປະມານ 50 ຄົນ; ແລະ ຍັງໄດ້ໃຫ້ກຽດເຂົ້າຮ່ວມງານລ້ຽງອາຫານຄໍ່າ ຈັດເປັນກຽດໂດຍ ທ່ານ ວິໂຣດ ສຸນດາຣາ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ປະເທດຍີ່ປຸ່ນ, ຢູ່ສໍານັກງານສະຖານທູດລາວ ທີ່ ໂຕກຽວ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ແຈ້ງສະພາບການ ແລະ ເຫດການສຳຄັນທີ່ພົ້ນເດັ່ນຢູ່ໃນ ສປປ ລາວ ໃນປີ 2016 ຜ່ານມາ ເປັນຕົ້ນ, ຜົນສໍາເລັດກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ; ຜົນການເລືອກຕັ້ງສະມາຊິກສະພາ ຊຸດທີ VIII; ການຈັດຕັ້ງຄະນະລັດຖະບານລາວ ຊຸດທີ VIII ແລະ ຜົນສໍາເລັດການເປັນປະທານໝູນວຽນອາຊຽນ ຄັ້ງທີ 2 ຂອງ ສປປ ລາວ, ໂດຍສະເພາະໄດ້ຍົກໃຫ້ເຫັນສະພາບການປັບປຸງການບໍລິຫານປະເທດຂອງຄະນະລັດຖະບານຊຸດທີ VIIIເປັນຕົ້ນການແກ້ໄຂບັນຫາສໍ້ລາດບັງຫລວງ, ອອກດຳລັດ 15 ກ່ຽວກັບ ການຫ້າມຕັດໄມ້ ແລະ ສົ່ງໄມ້ທ່ອນອອກນອກປະເທດ, ບັນຫາທີ່ດິນ, ການດັດປັບລາຄາໄຟຟ້າຈາກ 03 ລະດັບມາເປັນ 06 ລະດັບ, ຮັດກຸມການນຳເຂົ້ານໍ້າມັນ ແລະ ການແກ້ໄຂບັນຫາຫຍໍ້ທໍ້ຕ່າງໆໃນສັງຄົມ ຊຶ່ງລັດຖະບານໄດ້ອອກກົດ   ໝາຍຄຸ້ມຄອງສື່ອອນລາຍ ໂດຍຖືໂອກາດນີ້ແຈ້ງເຕືອນພີ່ນ້ອງຄົນເຊື້ອຊາດລາວ ແລະ ນັກສຶກສາລາວ ຢູ່ປະເທດຍີ່ປຸ່ນ ໃຫ້ມີສະຕິລະວັງຕົວເພື່ອຮັບເອົາຂໍ້ມູນຂ່າວສານທີ່ຖືກຕ້ອງ. ປະຈຸບັນ, ລັດຖະບານ ກຳລັງເອົາໃຈໃສ່ໃນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ 8, ເພື່ອນໍາພາປະເທດຊາດໃຫ້ຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020.

ນອກນັ້ນ, ທ່ານຮອງນາຍົກ ຍັງໄດ້ຍົກໃຫ້ເຫັນເຖິງສະພາບການພົວພັນຮ່ວມມືສອງຝ່າຍລາວ-ຍີ່ປຸ່ນ ທີ່ເປັນການພົວພັນທີ່ດີມາກວ່າ 06 ທົດສະວັດ ໂດຍການນຳຂັ້ນສູງ ແລະ ຂະແໜງການຕ່າງໆ ໄດ້ສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ ຢ່າງເປັນປະຈຳ, ພິເສດ ຜູ້ນຳສອງປະເທດໄດ້ຕົກລົງຍົກລະດັບການພົວພັນຮ່ວມມືແບບຮອບດ້ານເປັນຄູ່ຮ່ວມຍຸດທະສາດ, ສອງປະເທດສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 60 ປີ ໃນປີ 2015; ການພົວພັນທາງດ້ານເສດຖະກິດ ລາວ-ຍີ່ປຸ່ນ ກໍ່ໄດ້ມີການຂະຫຍາຍຕົວຂຶ້ນ ໂດຍສະເພາະປະຈຸບັນ ໄດ້ມີນັກທຸລະກິດຍີ່ປຸ່ນ ໃຫ້ຄວາມສົນໃຈເຂົ້າມາລົງທຶນຢູ່ ສປປ ລາວ ຫລາຍຂຶ້ນ ໂດຍນັກລົງທຶນຂອງຍີ່ປຸ່ນ ຢູ່ໃນອັນດັບ 8 ທີ່ມາລົງທຶນຢູ່ ສປປ ລາວ; ແລະ ທີ່ສຳຄັນ ຍີ່ປຸ່ນເປັນປະເທດທີ່ໃຫ້ການຊ່ວຍເຫລືອລ້າ (ODA) ແກ່ ສປປ ລາວ ອັນດັບໜຶ່ງ. ພ້ອມດຽວກັນນັ້ນ, ທ່ານຮອງນາຍົກ ສອນໄຊ ສີພັນດອນ ຍັງໄດ້ຕາງໜ້າໃຫ້ແກ່ ພັກ ແລະ ລັດຖະບານລາວ ສະແດງຄວາມຍ້ອງຍໍຊົມເຊີຍຕໍ່ພີ່ນ້ອງຄົນເຊື້ອຊາດລາວທີ່ອາໄສຢູ່ຍີ່ປຸ່ນ ໃນການປະກອບສ່ວນພັດທະນາເສດຖະກິດ-ສັງຄົມຂອງ ສປປ ລາວ ຕະຫລອດໄລຍະຜ່ານມາ ໂດຍໄດ້ເນັ້ນໜັກເຖິງນະໂຍບາຍຂອງພັກ-ລັດຖະບານ ຍາມໃດກໍຖືສະເໝີວ່າ ພີ່ນ້ອງຄົນເຊື້ອຊາດລາວທີ່ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ສໍາຄັນເຊິ່ງບໍ່ສາມາດຕັດແຍກອອກຈາກວົງຄະນະຍາດແຫ່ງຊາດລາວໄດ້, ເປັນແຫລ່ງກໍາລັງແຮງອັນໜຶ່ງໃນການປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນກ້າວໜ້າ, ເປັນຂົວຕໍ່ໃນການເປີດກວ້າງສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ.

ໃນຕອນທ້າຍ ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈຕໍ່ພີ່ນ້ອງຄົນເຊື້ອຊາດລາວ ຢູ່ປະເທດຍີ່ປຸ່ນ ແລະ ນັກສຶກສາລາວ ທີ່ໄດ້ສະຫລະເວລາເຂົ້າມາຮ່ວມງານພົບປະໂອ້ລົມຄັ້ງນີ້ ແລະ ຂໍໃຫ້ພີ່ນ້ອງຄົນລາວ ສືບຕໍ່ໃຫ້ການສະໜັບສະໜູນ ແລະ ປະກອບສ່ວນຕໍ່ການພັດທະນາປະເທດຊາດ ຕາມທ່າແຮງ ແລະ ຄວາມຮູ້ຄວາມສາມາດຂອງຕົນ, ພ້ອມນັ້ນ ກໍ່ໄດ້ເນັ້ນໜັກໃຫ້ນັກສຶກສາລາວທີ່ກໍາລັງສຶກສາຢູ່ປະເທດຍີ່ປຸ່ນ ຈົ່ງຕັ້ງໜ້າຄົ້ນຄວ້າຮໍ່າຮຽນໃຫ້ສໍາເລັດຕາມໂຄງການສຶກສາຂອງຕົນ ເພື່ອນໍາເອົາຄວາມຮູ້ຄວາມສາມາດ ແລະ ປະສົບການຈາກປະເທດຍີ່ປຸ່ນ ມາໝູນໃຊ້ຢູ່ ສປປ ລາວ ກໍ່ຄືໃນການປະຕິບັດວຽກງານຕົວຈິງ, ໂດຍສະເພາະແມ່ນໃຫ້ເອົາໃຈໃສ່ການເຜີຍແຜ່ຂໍ້ມູນຂ່າວສານກ່ຽວກັບ ສປປ ລາວ ແລະ ການໂຄສະນາເຜີຍແຜ່ວັດທະນະທໍາ ແລະ ຮີດຄອງປະເພນີອັນດີງາມຂອງລາວເຮົາ ຕໍ່ປະຊາຊົນຍີ່ປຸ່ນ ໃຫ້ມີຄວາມເຂົ້າໃຈ ສປປ ລາວ ຫລາຍຂື້ນເລື້ອຍໆ.