ໃນວັນທີ 23 ກຸມພາ 2017, ທີ່ ວັງເອລີເຊ, ທຳນຽບປະທານນາທິບໍດີຂອງ ສາທາລະນະລັດຝຣັ່ງ (Le Palais d’Elysee), ທ່ານ ຢົງ ຈັນທະລັງສີ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ຝຣັງຊົວ ໂຮລັງ (Francois Hollande),ປະທານາທິບໍດີ ແຫ່ງ ສາທາລະນະລັດຝຣັ່ງ, ເພື່ອດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ປະເທດດັ່ງກ່າວ, ໂດຍຊ້ອງໜ້າ ພະນະທ່ານ ຊັງ ມາກ ເອໂຣ (Jean-Marc Ayrault),ລັດຖະມົນຕີຕ່າງປະເທດ ຂອງ ສ. ຝຣັ່ງ.

ພາຍຫລັງພິທີຍື່ນສານຕາຕັ້ງໄດ້ສຳເລັດລົງ, ພະນະທ່ານ ຝຣັງຊົວ ໂຮລັງ , ປະທານາທິບໍດີ ແຫ່ງ ປະເທດຝຣັ່ງ, ໄດ້ໂອ້ລົມກັບ ທ່ານເອກອັກຄະລັດຖະທູດລາວ ໃນບັນຍາກາດອັດທະຍາໃສໄມຕີຈິດອັນສະໜິດສະໜົມ, ຊຶ່ງ ທ່ານ ຢົງ ຈັນທະລັງສີ ໄດ້ນໍາເອົາຄວາມຢື້ຢາມຖາມຂ່າວຈາກ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ໄດ້ສົ່ງມາຍັງ ທ່ານ ຝຣັງຊົວ ໂຮລັງ ແລະ ຜ່ານພະນະທ່ານ ໄປຍັງປະຊາຊົນຝຣັ່ງ ທຸກຖ້ວນໜ້າ. ໃນໂອກາດດັ່ງກ່າວ, ພະນະທ່ານປະທານາທິບໍດີ ຝຣັງຊົວ ໂຮລັງ ໄດ້ຕີລາຄາສູງຕໍ່ການມາດຳລົງຕໍາແໜ່ງຂອງ ທ່ານເອກອັກຄະລັດຖະທູດລາວ ປະຈຳ ປະເທດຝຣັ່ງ ໃນຄັ້ງນີ້ ແລະ ໄດ້ສະແດງຄວາມເຊື່ອໝັ້ນວ່າ ການພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ຈະນັບມື້ນັບຈະເລີນງອກງາມຍີ່ງໆຂຶ້ນໄປ.

ທ່ານ ຢົງ ຈັນທະລັງສີ ຍັງດຳລົງຕໍາແໜ່ງເປັນ ເອກອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອົງການອູຍແນດສໂກ (UNESCO) ແລະ ເປັນຜູ້ຕາງໜ້າຂອງປະທານປະເທດ ແຫ່ງ ສປປ ລາວ ປະຈຳ ອົງການຈັດຕັ້ງບັນດາປະເທດໄຊ້ພາສາຝຣັ່ງ (Francophonie), ຊຶ່ງມີສຳນັກງານຕັ້ງຢູ່ນະຄອນຫລວງປາຣີ, ປະເທດຝຣັ່ງ.