ໃນ​ວັນ​ທີ 24 ​ເມສາ​ນີ້ ຢູ່ ນະຄອນຫລວງ​ວຽງ​ຈັນ, ບັນດາ​ສະມາຊິກ​ພັກ,​ ພະນັກງານ​ຫລັກ​ແຫ​ລ່ງ ພາຍ​ໃນ​ກະຊວງ ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ ​ສູນ​ກາງ​ພັກ ຈຳນວນ 50 ຄົນ ​ໄດ້​​ເຂົ້າຮ່ວມ​ການ​ຝຶກ​ອົບຮົມ​ ທິດ​ສະ​ດີກາ​ນ​ເມືອງ-ການ​ປົກຄອງ ​ໄລຍະ​ສັ້ນ 45 ວັນຊຸດ​ທີ I (24/4/2017-28/6/2017) ​ເພື່ອ​ຍົກ​ລະດັບ ​ຄວາມ​ຮູ້​ພື້ນຖານ ​ທາງ​ດ້ານ​ທິດ​ສະ​ດີ ກາ​ນ​ເມື​ອງ-ການ​ປົກຄອງ, ຄົ້ນຄວ້າຮ່ຳຮຽນທິດ​ສະ​ດີ​ ມາກ-​ເລ​ນິນ, ​ແນວທາງ​ການ​ປ່ຽນ​ແປງ​ໃໝ່ຂອງ​ພັກ​ ໃນ​ແຕ່ລະ​ໄລຍະ ​ແນ່​ໃສ່​ເຮັດ​ໃຫ້​ ພະນັກງານ​ນຳພາ-ຄຸ້ມ​ຄອງ, ພະນັກງານ​ສືບ​ທອດ ກໍ​ຄື ສະມາຊິກ​ພັກ,​ ພະນັກງານ​ຫລັກ​ແຫ​ລ່ງ ​ມີ​ວິທີ​ການ​ເຮັດ​ວຽກ​ທີ່​ຖືກ​ຕ້ອງ ​ແລະ ຮູ້​ໝູນ​ໃຊ້ບັນດາ​ບົດຮຽນ​ດັ່ງກ່າວ​ ເຂົ້າ​ໃນ​ໜ້າ​ທີ່​ວຽກ​ງານ ​ຂອງ​ຕົນ​ຢ່າງ​ມີ​ປະສິດທິ​ຜົນ.

​​ໃນຕອນ​ຄ່ຳ​ຂອງ​ວັນທີ 20 ​ເມສາ 2017, ກະຊວງ​ການ​ຕ່າງປະ​ເທດ ຮ່ວມ​ກັບ ທະນາຄານ​ພັດທະນາ​ອາຊີ ໄດ້​ຈັດ​​ພິທີ​ສະເຫຼີ​ມສະຫຼອງການ​ຮ່ວມ​ມືຄົບຮອບ 50 ປີ ລະຫວ່າງ ສປປ ລາວ ​ແລະ ທະນາຄານ​ພັດທະນາ​ອາຊີ ທີ່ ໂຮງ​ແຮ​ມ Crown Plaza, ​ພາຍ​ໃຕ້​ການ​ເປັນ​ປະທານ​​ຮ່ວມຂອງ ທ່ານ ທອງ​ຜ່ານ ສະຫວັນ​ເພັດ, ຮອງ​ລັດຖະມົນ​ຕີ​ກະຊວງ​ການ​ຕ່າງປະ​ເທດ ​ແລະ ທ່ານ ​ເຈ​ມ ນິວ​ເຈິ​ນ, ຫົວໜ້າກົມອາຊີຕາເວັນອອກສ່ຽງໃຕ້, ທະນາຄານພັດທະນາອາຊີ.

ໃນວັນທີ 21 ເມສາ 2017, ກະຊວງການຕ່າງປະເທດ, ໄດ້ຈັດກອງປະຊຸມປຶກສາຫາລື ແລະ ຜັນຂະຫຍາຍຜົນຂອງ 3 ກອງປະຊຸມສຸດຍອດຂອບການຮ່ວມມືອະນຸພາກພື້ນ​ (CLV, CLMV ແລະ ACMECS) ທີ່ ຫ້ອງປະຊຸມ ຂອງ ກະຊວງການຕ່າງປະເທດ ພາຍໃຕ້ການເປັນປະທານຂອງ ທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ໂດຍການໃຫ້ກຽດຂື້ນກ່າວເປີດກອງປະຊຸມຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຊຶ່ງມີຜູ້ເຂົ້າຮ່ວມຈາກ ບັນດາກະຊວງຂະແໜງການທີ່ກ່ຽວຂ້ອງອ້ອມຂ້າງສູນກາງ ຈໍານວນກວ່າ 40 ທ່ານ.