ໃນວັນທີ 10 ກຸມພາ 2020, ທີ່ ສູນການຮ່ວມມືືສາກົນ ແລະ ຝຶກອົບຮົມ ICTC, ກະຊວງການຕ່າງປະເທດ ໄດ້ຈັດຕັ້ງກອງປະຊຸມທາບທາມຄຳເຫັນຂັ້ນສູນກາງຕໍ່ຮ່າງກົດໝາຍ ວ່າດ້ວຍ ຊັ້ນການທູດ ແຫ່ງ ສປປ ລາວ ພາຍໃຕ້ການເປັນປະທານຂອງ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ໂດຍມີບັນດາ ທ່ານຮອງລັດຖະມົນຕີ ແລະ ຮອງຫົວໜ້າອົງການຂັ້ນສູນກາງ, ບັນດາທ່ານຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ ແລະ ຜູ້ຕາງໜ້າຈາກອົງການຈັດຕັ້ງສູນກາງ ລວມທັງບັນດາທ່ານໃນຄະນະຮັບຜິດຊອບສ້າງຮ່າງກົດໝາຍດັ່ງກ່າວ ເຂົ້າຮ່ວມ.

ໃນວັນທີ 16 ມັງກອນ 2020 ທີ່ ຍ່າ​ຈ່າງ, ສ​ສ ຫວຽດ​ນາມ, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ທັງ​ເປັນ​ຫົວ​ໜ້າ​ເຈົ້າ​ໜ້າ​ທີ່ອາວຸໂສອາຊຽນ ຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ເພື່ອກະກຽມດ້ານ​ເນື້ອ​ໃນ ແລະ ພາ​ລະ​ທິ​ການ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນແບບວົງແຄບ ທີ່​ຈະ​ຈັດ​ຂຶ້ນໃນວັນທີ 17 ມັງກອນ 2020 ໂດຍການເປັນປະທານ ຂອງ ສ​ສ ຫວຽດ​ນາມ ພາຍໃຕ້ຄໍາຂວັນ:“ອາຊຽນ ທີ່ໜຽວແໜ້ນ ​ແລະ ຕອບ​ສະໜອງຕໍ່​ສະພາບ​ການ (Cohesive and Responsive ASEAN)”.

     ໃນວັນທີ 09 ມັງກອນ 2020, ທີ່ ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ, ຮອງລັດຖະມົນຕີ ກະຊວງການຕ່າງປະເທດ, ໄດ້ໃຫ້ກຽດຕ້ອນຮັບ ແລະ ມອບຫນັງສືຮັບຮອງກົງສຸນ ໃຫ້ແກ່ ທ່ານ ແກ້ວວີສຸກ ດາລາສານ, ເປັນກົງສຸນກິດຕິມະສັກ ແຫ່ງ ແຟັງລັງ ປະຈຳ ສປປ ລາວ, ເຊິ່ງມີສຳນັກງານຕັ້ງຢູ່ ນະຄອນຫລວງວຽງຈັນ. ໃນໂອກາດນີ້, ທ່ານ ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ອວຍພອນໃຫ້ແກ່ຜູ້ກ່ຽວທີ່ໄດ້ຮັບຫນ້າທີ່ເປັນກົງສຸນກິດຕິມະສັກຂອງຕ່າງປະເທດ ປະຈຳ ສປປ ລາວ ນັ້ນ ປະສົບແຕ່ຜົນສຳເລັດໃນການປະຕິບັດຫນ້າທີ່ອັນມີກຽດດັ່ງກ່າວ, ໃນຂະນະດຽວກັນ, ທ່ານ ຮອງລັດຖະມົນຕີ ຍັງໄດ້ຢ້ຳຕື່ມວ່າ ຕະຫລອດໄລຍະການປະຕິບັດຫນ້າທີ່ດັ່ງກ່າວ, ທ່ານ ກົງສຸນກິດຕິມະສັກ ຈະມີບົດບາດໃນການເປັນຂົວຕໍ່ອັນສຳຄັນໃນການສົ່ງເສີມ, ຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ລາວ-ແຟັງລັງ ໃຫ້ມີບາດກ້າວຂະຫຍາຍ ຕົວຂຶ້ນໄປເລື້ອຍໆ ເພື່ອແນໃສ່ນຳຜົນປະໂຫຍດມາສູ່ປະຊາຊົນສອງຊາດ ພ້ອມນີ້ກໍເປັນການປະກອບ ສ່ວນເຂົ້າໃນພາລະ ກິດ ສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.