ໃນວັນທີ 8 ພຶດສະພາ 2016, ສປປ ລາວ ໃນນາມປະທານອາຊຽນ ໄດ້ເປັນເຈົ້າພາບ ແລະ ເປັນປະທານ ກອງປະຊຸມເຈົ້າໜ້າທີ່ອາວຸໂສເວທີພາກພື້ນອາຊຽນ, ທີ່ ໂຮງແຮມ ວິນລາ ສັນຕິ ຣີສອດ, ແຂວງ ຫຼວງພະບາງ ພາຍໃຕ້ການເປັນປະທານຂອງ ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳ ສໍານັກງານນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໂດຍການເຂົ້າຮ່ວມຂອງບັນດາຄະນະຜູ້ແທນຂອງຜູ້ເຂົ້າຮ່ວມເວທີພາກພື້ນອາຊຽນ ແລະ ຕາງໜ້າຈາກ ກອງເລຂາອາຊຽນ.
ກອງປະຊຸມຄັ້ງນີ້ ໄດ້ທົບທວນຄືນຜົນຂອງບັນດາກອງປະຊຸມ ແລະ ກິດຈະກໍາເວທີພາກພື້ນອາຊຽນ ທີ່ໄດ້ຈັດຕັ້ງປະຕິບັດ ໃນສົກປີ 2015-2016, ໄດ້ຮັບຮອງເອົາບັນດາກິດຈະກຳ ແລະ ກອງປະຊຸມ ເພື່ອຈັດຕັ້ງປະຕິບັດ ໃນສົກປີ 2016-2017 ແລະ ໄດ້ທົບທວນການຈັດຕັ້ງບັນດາແຜນວຽກຕ່າງໆ ຄື: ແຜນວຽກການທູດປ້ອງກັນເຫດ, ແຜນວຽກການຕ້ານການກໍ່ການຮ້າຍ ແລະ ອາດຊະຍາກໍາຂ້າມຊາດ, ແຜນວຽກຄວາມຫມັ້ນຄົງ ແລະ ການນໍາໃຊ້ຂໍ້ມູນ ແລະ ເທັກໂນໂລຍີຂໍ້ມູນຂ່າວສານ, ແຜນວຽກການບັນເທົາທຸກໄພພິບັດ, ແຜນວຽກຄວາມຫມັ້ນຄົງທາງທະເລ ແລະ ແຜນວຽກການບໍ່ແຜ່ຜາຍ ແລະ ການຫລຸດຜ່ອນອາວຸດ.
ກອງປະຊຸມຍັງໄດ້ ທົບທວນການຈັດຕັ້ງປະຕິບັດ ແຜນປະຕິບັດງານຮ່າໂນ້ຍ ເພື່ອຈັດຕັ້ງປະຕິບັດ ວິໄສທັດເວທີພາກພື້ນອາຊຽນ ຊຶ່ງມີຄວາມຄືບໜ້າດີ ແລະ ໄດ້ເຫັນດີໃຫ້ຈັດກອງປະຊຸມຫນ່ວຍງານເວທີພາກພື້ນອາຊຽນ ວ່າດ້ວຍ ມາດຕະການສ້າງຄວາມໄວ້ເນື້ອເຊື່ອໃຈ ແລະ ການທູດປ້ອງກັນເຫດ ຄັ້ງດຽວ ຕໍ່ປີ ຈາກໃນເມື່ອກ່ອນທີ່ຈັດ 2 ຄັ້ງຕໍ່ປີ. ພ້ອມນີ້, ກອງປະຊຸມ ກໍໄດ້ປຶກສາຫາລື ກ່ຽວກັບການກະກຽມດ້ານຕ່າງໆ ລວມທັງເອກະສານຜົນຂອງກອງປະຊຸມເວທີພາກພື້ນອາຊຽນ ຄັ້ງທີ 23 ທີ່ຈະຈັດຂຶ້ນ ໃນເດືອນ ກໍລະກົດ 2016 ທີ່ວຽງຈັນ.
ນອກຈາກນີ້, ກອງປະຊຸມກໍໄດ້ແລກປ່ຽນຄວາມຄິດຄວາມເຫັນຢ່າງສ້າງສັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ໂດຍສະເພາະ ສິ່ງທ້າທາຍ ໃນພາກພື້ນອາຊີ-ປາຊີຟິກ ກໍຄື ໃນໂລກ ເຊັ່ນ: ໄພພິບັດທໍາມະຊາດ, ການປ່ຽນແປງຂອງດິນຟ້າອາກາດ, ການກໍ່ການຮ້າຍ, ອາຊະຍາກຳຂ້າມຊາດ, ບັນຫາໂລກລະບາດ, ການຍ້າຍຖິ່ນຖານແບບຜິດປົກກະຕິ, ການຍ້າຍຖິ່ນຖານແບບຜິດປົກກະຕິ, ການຄ້າມະນຸດ ແລະ ສະພາບການຕ່າງໆ ໃນພາກພື້ນຕ່າງໆຂອງໂລກ ເຊັ່ນ: ສະພາບການຢູ່ຕາເວັນອອກກາງ, ສະພາບການຢູ່ປາກິດສະຖານ, ຢູ່ອັບການິດສະຖານ, ແຫລມເກົາຫລີ ແລະ ທະເລຈີນໃຕ້ ແລະ ອື່ນໆ.