ວັນທີ 7 ພຶດສະພາ 2016, ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳສຳນັກງານນາຍົກ ລັດຖະມົນຕີ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ສືບຕໍ່ເປັນປະທານກອງປະຊຸມເຈົ້າໜ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ (ອີເອເອສ), ຊຶ່ງໄດ້ຈັດຂຶ້ນ ຢູ່ ໂຮງແຮມ ຫຼວງພະບາງວິວ, ແຂວງ ຫຼວງພະບາງ.

ກອງປະຊຸມເຈົ້າໜ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ (ອີເອເອສ) ໄດ້ທົບທວນຄືນຄວາມຄືບໜ້າຂອງການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 10 ໃນເດືອນພະຈິກ 2015 ທີ່ຜ່ານມາ ໂດຍສະເພາະແມ່ນຖະແຫຼງການ ກົວລາລຳເປີ ວ່າດ້ວຍການສ້າງຕັ້ງ  ອີເອເອສ ຄົບຮອບ 10 ປີ ແລະ ການຈັດຕັ້ງປະຕິບັດກິດຈະກຳຕ່າງໆພາຍໃຕ້ 6 ຂົງເຂດບູລິມະສິດຄື: ການເງິນ, ພະລັງງານ ແລະ ສິ່ງແວດລ້ອມ, ການສຶກສາ,  ບັນຫາສຸຂະພາບ ແລະ ພະຍາດລະບາດ, ການຄຸ້ມຄອງໄພພິບັດ, ແລະ ການເຊື່ອມ ຈອດອາຊຽນ. ກອງປະຊຸມເຫັນດີສືບຕໍ່ເຮັດວຽກຮ່ວມກັນ ແລະ ປະສານງານຢ່າງໃກ້ຊິດ ເພື່ອຮັບປະກັນໃນການຈັດຕັ້ງປະຕິບັດກິດຈະກຳຮ່ວມມືຕ່າງໆ ແລະ ບັນດາຄຳຕົກລົງຂອງຜູ້ນຳຢ່າງມີປະສິດທິຜົນ ແນໃສ່ເສີມຂະຫຍາຍ ອີເອເອສ ໃຫ້ນັບມື້ນັບເຂັ້ມແຂງຂຶ້ນເລື້ອຍໆ. ນອກນັ້ນ, ກອງປະຊຸມ ຍັງໄດ້ປຶກສາຫາລື ກ່ຽວກັບການກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດ ອີເອເອສ ແລະ ກອງປະຊຸມສຸດຍອດ ອີເອເອສ ທີ່ ຈະຈັດຂຶ້ນໃນເດືອນ ກໍລະກົດ ແລະ ເດືອນກັນຍາ 2016 ຕາມລຳດັບ ຢູ່ ສປປ ລາວ ພາຍໃຕ້ການເປັນເຈົ້າພາບ ແລະ ເປັນປະທານຂອງ ສປປ ລາວ. ກອງປະຊຸມຍັງໄດ້ແລກປຽ່ນທັດສະນະ ກ່ຽວກັບ ບັນຫາທີ່ພົ້ນເດັ່ນຂອງພາກພື້ນ ແລະ ສາກົນ.

ອີເອເອສ ເປັນເວທີລະດັບຜູ້ນຳ ເພື່ອປຶກສາຫາລື ກ່ຽວກັບບັນຫາຍຸດທະສາດ, ການເມືອງ ແລະ ເສດຖະກິດ ທີ່ມີທຸກຝ່າຍມີຜົນປະໂຫຍດ ແລະ ມີຄວາມເປັນຫ່ວງຮ່ວມກັນ ແນໃສ່ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກ ຢູ່ພາກພື້ນອາຊີຕາເວັນອອກ. ອີເອເອສ ປະກອບດ້ວຍ 10 ປະເທດສະມາຊິກອາຊຽນ ແລະ 8 ປະເທດຄູ່ເຈລະຈາອາຊຽນ (ອົດສະຕຣາລີ, ຈີນ, ຍີ່ປຸ່ນ, ອິນເດຍ, ນິວຊີແລນ,​ ສ. ເກົາຫຼີ, ລັດເຊຍ ແລະ ສະຫະລັດ ອາເມລິກາ).