ໃນຕອນບ່າຍຂອງວັນທີ 04 ເມສາ 2016, ທີ່ ກະຊວງການຕ່າງປະເທດ, ໄດ້ຈັດພິທີມອບ-ຮັບ ໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ ສຳລັບສົກປີ 2014-2015 ໃຫ້ແກ່ໜ່ວຍພັກຫ້ອງການກະຊວງການຕ່າງປະເທດ ໂດຍການເປັນກຽດເຂົ້າຮ່ວມຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງການຕ່າງປະເທດ, ລັດຖະມົນຕີຊ່ວຍວ່າການກະຊວງການຕ່າງປະເທດ; ມີບັນດາສະຫາຍເລຂາ, ຮອງເລຂາຂອງບັນດາໜ່ວຍພັກອອ້ມຂ້າງຄະນະພັກກະຊວງການຕ່າງປະເທດ, ພະນັກງານສະມາຊິກພັກສົມບູນ ແລະ ສຳຮອງຂອງໜ່ວຍພັກຫ້ອງການ ພ້ອມດ້ວຍຜູ້ຕາງໜ້າ 3 ອົງການຈັດຕັ້ງມະຫາຊົນ ຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນໂອກາດນີ້, ສະຫາຍ ເຮືອງແສງ ຄຳດາລາວົງ, ເລຂາໜ່ວຍພັກຫ້ອງການ ໄດ້ຂຶ້ນສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ຕາມ 4 ຄາດໝາຍ ແລະ 5 ເນື້ອໃນ ສຳລັບສົກປີ 2014-2015 ແລະ ທິດທາງແຜນການ ສໍາລັບສົກປີ 2016-2017.
ໃນພິທີອັນເຕັມໄປດ້ວຍຄວາມໝາຍ ແລະ ຄວາມສຳຄັນດັ່ງກ່າວ, ສະຫາຍ ສະເຫຼີມໄຊ ກົມມະສິດ ໄດ້ໃຫ້ກຽດໂອ້ລົມ ໂດຍສະແດງຄວາມຊົມເຊີຍຕໍ່ຜົນສຳເລັດຂອງໜ່ວຍພັກຫ້ອງການ ກະຊວງການຕ່າງປະເທດໃນການຊີ້ນຳ-ນຳພາ ການປະຕິບັດໜ້າທີ່ວຽກງານຂອງຫ້ອງການ ຈົນກາຍເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ໄດ້ໃຫ້ທິດຊີ້ນຳແກ່ໜ່ວຍພັກ ໃນການສືບຕໍ່ເອົາໃຈໃສ່ຊີ້ນຳ-ນຳພາວຽກງານການເມືອງ-ແນວຄິດ ໄປພ້ອມໆກັບວຽກວິຊາສະເພາະ ເພື່ອໃຫ້ສະມາຊິກພັກ-ພະນັກງານມີຄວາມເຂັ້ມແຂງຮອບດ້ານ, ເຮັດສຳເລັດທຸກໜ້າທີ່ການ ເມືອງທີ່ພັກ-ລັດ ມອບໝາຍໃຫ້, ຖືສຳຄັນດ້ານຄຸນນະພາບໃນການກໍ່ສ້າງພັກ-ພະນັກງານ, ເດັດດ່ຽວປັບປຸງແກ້ໄຂຈຸດອອ່ນ ແລະ ຂໍ້ຄົງຄ້າງ, ສືບຕໍ່ຮັກສານາມມະຍົດໜ່ວຍພັກເຂັ້ມແຂງ-ຮູ້ນຳພາ ຮອບດ້ານຕໍ່ໄປ, ເຊິ່ງຈະເປັນການປະກອບສ່ວນເຂົ້າໃນການເຄື່ອນ ໄຫວລວມຂອງຂະແໜງການຕ່າງປະເທດ ໃຫ້ນັບມື້ນັບໄດ້ຮັບຜົນສຳເລັດ, ຮຽກຮ້ອງໃຫ້ພະນັກງານສະມາຊິກທຸກສະຫາຍ ຈົ່ງສືບຕໍ່ເພີ່ມທະວີຄວາມເປັນແບບຢ່າງໃຫ້ມະຫາຊົນ, ມີສະຕິຕໍ່ການຈັດຕັ້ງ, ກຳແໜ້ນແນວທາງນະໂຍບາຍຂອງພັກ-ລັດ ແລະ ຍາມໃດກໍ່ຕ້ອງຢືນຢູ່ແຖວໜ້າຂອງທຸກຂະບວນການ ເພື່ອເຮັດສຳເລັດຕາມຄາດໝາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ຕາມຄາດໝາຍຂອງມະຕິກອງປະຊຸມອົງຄະນະພັກກະຊວງການຕ່າງປະເທດ ຄັ້ງທີ III ໄດ້ວາງໄວ້ ແລະ ເຮັດແນວໃດ ເພື່ອສ້າງໄດ້ສະມາຊິກພັກຫຼັກແຫຼ່ງ ແລະ ສະມາຊິກພັກໜຸ່ມນ້ອຍທີ່ເຕັມໄປດ້ວຍຄວາມຮູ້ຄວາມສາມາດໃຫ້ຫຼາຍຂຶ້ນໃນອະນາຄົດ.