ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າ  ໜ້າທີ່ອາວຸໂສອາຊຽນຂອງ ສປປ ລາວ ໄດ້ເຂົ້າຮ່ວມກອງປະຊຸມ ເຈົ້າໜ້າທີ່ອາວຸໂສອາຊຽນ-ອັງກິດ ຄັ້ງທີ 2 ພາຍໃຕ້ການເປັນປະທານຮ່ວມຂອງ ບຣູໄນ ດາລູຊາລາມ ແລະ ອັງກິດ, ຊຶ່ງໄດ້ຈັດຂຶ້ນໃນວັນທີ 8 ມິຖຸນາ 2023 ທີ່ ບັນດາ ເສຣິ ເບກາວັນ, ບຣູໄນ ດາລູຊາລາມ.

ກອງປະຊຸມຄັ້ງນີ້ ໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດ ບັນດາກິດຈະກໍາພາຍໃຕ້ແຜນປະຕິບັດງານອາຊຽນອັງກິດ (2022-2026) ແລະ ໄດ້ຊຸກຍູ້ໃຫ້ທັງສອງຝ່າຍຂະຫຍາຍບັນດາຂົງເຂດການຮ່ວມມືທີ່ສອງຝ່າຍມີທ່າແຮງ ແນໃສ່ຮັດແໜ້ນການຮ່ວມມືອາຊຽນ-ອັງກິດ ໃຫ້ກ້າວເຂົ້າສູ່ລ່ວງເລິກ. ໃນໂອກາດນີ້, ກອງປະຊຸມ ໄດ້ແລກປ່ຽນຄວາມຄິດເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ນອກນີ້, ກອງປະຊຸມຍັງໄດ້ປຶກສາຫາລືການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ (PMC) ທີ່ຈະຈັດຂຶ້ນໃນເດືອນ ກໍລະກົດ 2023 ທີ່    ຈາກາກຕາ, ອິນໂດເນເຊຍ.