ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າ  ໜ້າທີ່ອາວຸໂສອາຊຽນຂອງ ສປປ ລາວ ໄດ້ເຂົ້າຮ່ວມກອງປະຊຸມປຶກສາຫາລືອາຊຽນ-ນິວຊີແລນ ຄັ້ັງທີ 30 ພາຍໃຕ້ການເປັນປະທານຮ່ວມຂອງບຣູໄນ ດາລູຊາລາມ ແລະ ນິວຊີແລນ, ຊຶ່ງໄດ້ຈັດຂຶ້ນໃນວັນທີ 7 ມິຖຸນາ 2023 ທີ່ ບັນດາ ເສຣິ ເບກາວັນ, ບຣູໄນ ດາລູຊາລາມ.

ກອງປະຊຸມຄັ້ງນີ້ ໄດ້ທົບທວນຄືນການພົວພັນຮ່ວມມື ໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດແຜນປະຕິບັດງານອາຊຽນ-ນິວຊີແລນ (2021-2025) ແລະ ໄດ້ຕົກລົງເຫັນດີຮັດ    ແໜ້ນການຮ່ວມມືໃນຂົງເຂດທີ່ມີຄວາມສົນໃຈຮ່ວມກັນ ເປັນຕົ້ນແມ່ນ: ການເພີ່ມທະວີການຮ່ວມມືດ້ານເສດຖະກິດ ແລະ ການຟື້ນຟູຮອບດ້ານຫຼັງໂຄວິດ-19, ການສົ່ງເສີມໄປມາຫາສູ່ກັນລະຫວ່າງປະຊາຊົນ, ການພັດທະນາຕົວເມືອງອັດສະລິຍະ, ການປ່ຽນແປງດິນຟ້າອາກາດ ແລະ ອື່ນໆ.

ໃນໂອກາດນີ້, ກອງປະຊຸມ ຍັງໄດ້ແລກປ່ຽນຄວາມຄິດເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ແລະ ໄດ້ປຶກສາຫາລື ການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ (PMC) ທີ່ຈະຈັດຂຶ້ນໃນເດືອນ ກໍລະກົດ 2023 ທີ່ ຈາກາກຕາ, ອິນໂດເນເຊຍ.