ໃນວັນທີ 24 ກຸມພາ 2023, ກະຊວງການຕ່າງປະເທດ (ກົມສົນທິສັນຍາ ແລະ ກົດໝາຍ ໃນນາມສະມາຊິກກອງເລຂາຄະນະກຳມະການຕ້ານການຄ້າມະນຸດລະດັບຊາດ) ໄດ້ຈັດກອງປະຊຸມສຳມະນາ ກ່ຽວກັບ ວຽກງານສະກັດກັ້ນ ແລະ ຕ້ານການຄ້າມະນຸດ ໃຫ້ແກ່ສະມາຊິກຊາວໜຸ່ມກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບາງກະຊວງຂະແໜງການອ້ອມຂ້າງ ທີ່ ກະຊວງການຕ່າງປະເທດ ພາຍໃຕ້ການເປັນປະທານກ່າວເປີດກອງປະຊຸມຂອງ ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ຮອງປະທານຄະນະກໍາມະການຕ້ານການຄ້າມະນຸດລະດັບຊາດ.
ຈຸດປະສົງຂອງກອງປະຊຸມສຳມະນາເຜີຍແຜ່ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈເພີ່ມຕື່ມ ກ່ຽວກັບ ນະໂຍບາຍ, ນິຕິກໍາທີ່ກ່ຽວຂ້ອງ ແລະ ກົນໄກພາຍໃນຂອງ ສປປ ລາວ, ລວມທັງການຮ່ວມມືສາກົນຂອງ ສປປ ລາວ ກໍຄືກົນໄກການປະສານງານລະຫວ່າງພາກສ່ວນທີ່ກ່ຽວຂ້ອງຕ່າງໆ ກ່ຽວກັບ ວຽກງານດັ່ງກ່າວ ແນໃສ່ເຮັດໃຫ້ສະມາຊິກຊາວໜຸ່ມ ໃຫ້ສາມາດນໍາໄປປະກອບສ່ວນຈັດຕັ້ງປະຕິບັດໃນວຽກງານທີ່ຕົນເອງຮັບຜິດຊອບໄດ້ຢ່າງມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ກອງປະຊຸມສຳມະນາເຜີຍແຜ່ດັ່ງກ່າວ ມີນັກວິທະຍາກອນມາຈາກພາກສ່ວນທີ່ກ່ຽວຂ້ອງ ເຊັ່ນ: ກະຊວງປ້ອງກັນຄວາມສະຫງົບ, ກະຊວງແຮງງານ ແລະ ສະຫວັດດີການສັງຄົມ, ກະຊວງການຕ່າງປະເທດ, ສູນກາງສະຫະພັນແມ່ຍິງລາວ ແລະ ສູນກາງຊາວໜຸ່ມປະຊາຊົນປະຕິວັດລາວ ເຂົ້າຮ່ວມນຳສະເໜີບົດໃນຫົວຂໍ້ທີ່ພົວພັນກັບພາລະບົດບາດ, ສິດ ແລະ ໜ້າທີ່ ທີ່ກ່ຽວຂ້ອງກັບຂະແໜງການຂອງຕົນໃນວຽກງານການສະກັດກັ້ນ ແລະ ຕ້ານການຄ້າມະນຸດ ລວມທັງການຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດ ຊຶ່ງໃນກອງປະຊຸມມີຜູ້ເຂົ້າຮ່ວມທັງໝົດ 120 ທ່ານ (ຍິງ 63 ທ່ານ).