ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ກົດໝາຍ ວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ ສະບັບເລກທີ 30/ສພຊ ແລະ ເອກະສານຄໍາແນະນໍາໃນການຈັດຕັ້ງປະຕິບັດກົດໝາຍດັ່ງກ່າວ ໃຫ້ແກ່ພະນັກງານກະຊວງການຕ່າງປະເທດ ໂດຍການເປັນປະທານ ຂອງທ່ານ ບຸນເຫລືອ ພັນດານຸວົງ, ຄະນະປະຈໍາພັກ, ຮອງລັດຖະມົນຕີກະຊວງການຕ່າງປະເທດ  ເຊິ່ງມີບັນດາຫົວໜ້າກົມ, ຮອງຫົວໜ້າກົມ, ຄະນະພະແນກ  ແລະ ລັດຖະກອນພາຍໃນກະຊວງການຕ່າງປະເທດ ເຂົ້າຮ່ວມຈຳນວນ 100 ກວ່າທ່ານ ໃນ ວັນທີ 02 ກຸມພາ 2023 ທີ່ ກະຊວງການຕ່າງປະເທດ.

ກອງ​ປະ​ຊຸມ​ເຜີຍ​ແຜ່​ໃນ​ຄັ້ງ​ນີ້ ແມ່ນເພື່ອປະ​ຕິ​ບັດ​ຕາມມະ​ຕິ​ ຂອງ ຄະ​ນະ​ບໍ​ລິ​ຫານ​ງານ​ພັກກະ​ຊວງ​ການ​ຕ່າງ​ປະ​ເທດ ໃນ​ການຜັນ​ຂະ​ຫຍາຍຜົນກອງ​ປະ​ຊຸມ​​ວຽກ​ງານການຕ່າງ​ປະ​ເທດຄັ້ງ 14 ແລະ ເພື່ອຈັດຕັ້ງປະຕິບັດ​ ໃຫ້ເປັນເອກະພາບກັນໃນທົ່ວປະເທດ ແນໃສ່ເຮັດ​ໃຫ້ພະນັກງານກະຊວງການຕ່າງປະເທດ ມີຄວາມເຂົ້າໃຈເລິກ​ເຊິ່ງ ກ່ຽວ​ກັບ ກົດໝາຍວ່າ ດ້ວຍການຈັດຊື້-ຈັດຈ້າງ ດ້ວຍທຶນຂອງລັດ ແລະ ເອກະສານຄໍາແນະນໍາ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ.

ໃນ​ໄລຍະ​ຜ່ານ​ມາ, ພັກ ແລະ ລັດຖະບານ ໄດ້ເຫັນຄວາມສຳຄັນກ່ຽວກັບວຽກງານ ຈັດຊື້-ຈັດຈ້າງ ແລະ ເອົາໃຈໃສ່ຊີ້ນຳໃນການຈັດຕັ້ງປະຕິບັດ ໂດຍໄດ້ແນະນໍາເຜີຍແຜ່ກົດໝາຍດັ່ງກ່າວ ໃຫ້ເຂົ້າໃຈທົ່ວເຖິງ, ໄດ້​ອອກ​ກົດ ໝາຍ ​ເລີ້ມ​ແຕ່​ປີ 2017 ​ເປັນຕົ້ນມາ, ມີຄໍາແນະນໍາກ່ຽວກັບການຈັດຕັ້ງປະຕິບັດ​ ສະບັບ ເລກທີ 0477/ກງ, ລົງວັນທີ 13 ກຸມພາ 2019 ​ຈຳ​ນວນ 01 ສະບັບ.

ຜ່ານ​ການຈັດ​ຕັ້ງ​ປະຕິບັດ​ບັນດາຄໍາແນະນໍາດັ່ງກ່າວ ເຫັນ​ວ່າ ໂດຍລວມວຽກງານການຈັດຊື້-ຈັດຈ້າງດ້ວຍທຶນຂອງລັດ ໄດ້ຮັບການປັບປຸງໃຫ້ເຂົ້າສູ່ລະບຽບຫຼັກການເທື່ອລະກ້າວ ແລະ ມີຜົນສໍາເລັດໂດຍພື້ນຖານ. ດັ່ງນັ້ນ, ເພື່ອໃຫ້ສອດຄ່ອງກັບສະພາບຕົວຈິງຍີ່ງຂຶ້ນ ຖືເປັນບາດກ້າວອັນສໍາຄັນ ເພື່ອໃຫ້ມີຄວາມເປັນ​ເອກະ​ພາບ ແລະ ເປັນບ່ອນອີງ​ໃນ​ການຈັດ​ຕັ້ງປະຕິບັດ. ພ້ອມກັນນັ້ນ, ເພື່ອໃຫ້ເຂົາໃຈກົດໝາຍດັ່ງກ່າວ ໃຫ້ເປັນອັນລະອຽດ ແລະ ຈະແຈ້ງໃນການຈັດຕັ້ງປະຕິບັດ ສະພາແຫ່ງຊາດຈຶ່ງໄດ້ອອກກົດໝາຍ ວ່າດ້ວຍການຈັດຊື້-ຈັດຈ້າງ ດ້ວຍທຶນຂອງລັດ ສະບັບເລກທີ 30/ສພຊ, ລົງວັນທີ 02 ພະຈິກ 2017.