ກະຊວງການຕ່າງປະເທດ ກໍ່ຄື ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ບາງເອກະສານສຳຄັນ ເພື່ອລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ຂຶ້ນ ໃນວັນທີ 25 ມັງກອນ 2023 ທີ່ ຫ້ອງປະຊຸມໃຫຍ່ກະຊວງການຕ່າງປະເທດ, ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ, ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ, ໂດຍມີພະນັກງານ-ລັດຖະກອນພາຍໃນກະຊວງການຕ່າງປະເທດ ພ້ອມດ້ວຍແຂກຖືກເຊີນຈຳນວນໜຶ່ງ ເຂົ້າຮ່ວມທັງໝົດ 226 ທ່ານ, ໃນທ່າມກາງບັນຍາກາດ ທີ່ທົ່ວອົງຄະນະພັກກະຊວງການຕ່າງປະເທດພວກເຮົາ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກກະຊວງການຕ່າງປະເທດຄັ້ງທີ IV ແລະ ແຜນດຳເນີນງານແຫ່ງຊາດ ເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງທຸກຮູບແບບ ກໍ່ຄື ການຈັດຕັ້ງປະຕິບັດແຜນການເຄື່ອນໄຫວວຽກງານເພື່ອຄວາມສະເໝີພາບຍິງ-ຊາຍ ແລະ ແມ່-ເດັກ ຂອງກະຊວງການຕ່າງປະເທດ ໄປພ້ອມກັບການປະຕິບັດໜ້າທີ່ການ ເມືອງ-ການຕ່າງປະເທດຂອງຕົນ ຢ່າງຕັ້ງໜ້າ.
ຈຸດປະສົງຕົ້ນຕໍ ຂອງການຈັດກອງປະຊຸມຄັ້ງນີ້ ກໍ່ເພື່ອເປັນການສ້າງຂະບວນການລະນຶກວັນສາກົນເພື່ອຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ພ້ອມທັງເປັນການໂຄສະນາເຜີຍແຜ່ບາງເອກະສານສຳຄັນ ເປັນຕົ້ນແມ່ນ ປະຫວັດຄວາມເປັນມາກ່ຽວກັບວັນສາກົນຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ແລະ ການຈັດຕັ້ງປະຕິບັດວຽກງານເພື່ອຄວາມສະເໝີພາບຍິງ-ຊາຍ ແລະ ແມ່-ເດັກ ຂອງກະຊວງການຕ່າງປະເທດ ໃນໄລຍະ 1 ປີຜ່ານມາ; ເອກະສານກ່ຽວກັບການຈັດຕັ້ງປະຕິບັດວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ຢູ່ ສປປ ລາວ; ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ ໃຫ້ແກ່ ພະນັກງານ-ລັດຖະກອນ ພາຍໃນກະຊວງການຕ່າງປະເທດ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕື່ມອີກ ໂດຍມີ ນັກວິທະຍາກອນທີ່ມາຈາກຫ້ອງການກອງເລຂາຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ແລະ ຈາກກົມສົນທິສັນຍາ ແລະ ກົດໝາຍ ຜູ້ທີ່ຮັບຜິດຊອບ ແລະ ລົງເລິກວຽກງານນີ້ໂດຍກົງ ໃຫ້ກຽດຂຶ້ນບັນຍາຍ, ຊຶ່ງເນື້ອໃນເອກກະສານເຜີຍແຜ່ດັ່ງກ່າວ ລ້ວນແລ້ວແຕ່ເປັນການສະແດງໃຫ້ເຫັນໄດ້ເຖິງຄວາມໝາຍສຳຄັນ ທັງເປັນການຮັບຮູ້, ເຂົ້າໃຈ ແລະ ປູກຈິດສຳນຶກ ກ່ຽວກັບການໃຊ້ຄວາມຮຸນແຮງບົນພື້ນຖານທາງເພດ ໃນທົ່ວສັງຄົມເພື່ອໃຫ້ປັບປ່ຽນທັດສະນະຄະຕິທີ່ວ່າ ການໃຊ້ຄວາມຮຸນແຮງຕໍ່ແມ່ຍິງໃນທຸກປະເພດ ຖືວ່າເປັນການລະເມີດ ການບັນທອນສິດເສລີພາບຂັ້ນພື້ນຖານຂອງແມ່ຍິງ ທັງເປັນການກະທຳຜິດຕໍ່ກົດໝາຍ ແລະ ໃຫ້ຖືວຽກງານຕ້ານ ແລະ ສະກັດກັ້ນຄວາມຮຸນແຮງຕໍ່ແມ່ຍິງ ເປັນວຽກໜຶ່ງທີ່ສຳຄັນຂອງລັດ, ຂອງບຸກຄົນ, ນິຕິບຸກຄົນ ແລະ ທຸກພາກສ່ວນໃນສັງຄົມ.