ໃນວັນທີ 20 ມັງກອນ 2023, ທີ່ ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ, ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ, ໄດ້ຕາງໜ້າໃຫ້ຄະນະພັກ, ຄະນະນຳກະຊວງ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ນໍາເອົາກະຕ່າດອກໄມ້ເຂົ້າອວຍພອນ ສະຫາຍ ຫງວຽນ ບ໋າ ຮຸ່ງ, ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ເນື່ອງໃນໂອກາດປີໃໝ່ ຫວຽດນາມ ປີ 2023 ທີ່ຈະໝູນວຽນ ມາເຖິງອີກວາລະໜຶ່ງ.

ໃນໂອດກາດດັ່ງກ່າວ, ສະຫາຍ ຮອງລັດຖະມົນຕີ ໂພໄຊ ໄຂຄໍາພິທູນ ກໍໄດ້ອວຍພອນໄຊອັນປະເສີດແກ່ ສະຫາຍ ເອກອັກຄະລັດຖະທູດ ພ້ອມດ້ວຍພະນັກງານ ສະຖານທູດທຸກຄົນ ແລະ ຜ່ານສະຫາຍ ໄປຍັງ ການນໍາພັກ, ລັດ ແລະ ປະຊາຊົນ ຫວຽດນາມອ້າຍນ້ອງ ຈົ່ງມີສຸຂະພາບແຂງແຮງ ແລະ ປະສົບຜົນສໍາເລັດໃນໜ້າທີ່ວຽກງານຂອງຕົນ. ໃນຂະນະດຽວກັນ, ສະຫາຍ ເອກອັກຄະລັດຖະທູດ ຫງວຽນ ບ໋າ ຮຸ່ງ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ ສະຫາຍ ຮອງລັດຖະມົນຕີ ໂພໄຊ ໄຂຄໍາພິທູນ ແລະ ຄະນະ ທີ່ໄດ້ມາອວຍພອນປີໃໝ່ໃນຄັ້ງນີ້.

ໃນໂອກາດດຽວກັນນີ້, ສອງຝ່າຍ ກໍໄດ້ສະແດງຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ນັບມື້ນັບມີການພັດທະນາເຂົ້າສູ່ລວງເລິກ ແລະ ນໍາຜົນປະໂຫຍດຢ່າງແທ້ຈິງ ມາສູ່ປະຊາຊົນສອງຊາດ ລາວ - ຫວຽດນາມ, ພ້ອມທັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດຂອງການພົວພັນຮ່ວມມືໃນໄລຍະຜ່ານມາ, ໂດຍສະເພາະ ຜົນສໍາເລັດຂອງການສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຜ່ານມາ, ເຊິ່ງສອງຝ່າຍໄດ້ຮ່ວມກັນຈັດບັນດາກິດຈະກໍາການເຄື່ອນໄຫວຕ່າງໆ ຢ່າງເປັນຂະບວນຟົດຟື້ນ ແລະ ມີຄວາມໝາຍເລິກເຊິ່ງ, ໂຄສະນາເຜີຍແຜ່ຢ່າງກວ້າງຂວາງ ກ່ຽວກັບປະຫວັດສາດ, ມູນເຊື້ອການພົວພັນສາມັກຄີພິ ເສດສອງປະເທດ ປະກອບສ່ວນຍົກສູງຄວາມຮັບຮູ້ ແລະ ສະຕິຕໍ່ການປົກປັກຮັກສາ ແລະ ເພີ່ມພູນຄູນສ້າງສາຍພົວພັນພິເສດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ໄດ້ຮັບເສີມຂະຫຍາຍຍິ່ງໆຂື້ນ. ພ້ອມນີ້, ສອງຝ່າຍ ຍັງສະແດງຄວາມພ້ອມທີ່ຈະໄດ້ຮ່ວມກັນຢ່າງໃກ້ຊິດ ເພື່ອສຶບຕໍ່ຈັດຕັ້ງຜັນຂະຫຍາຍ ຜົນການຢ້ຽມຢາມ ຂອງ ການນຳຂັ້ນສູງ ຂອງ ສອງປະເທດ, ຜົນກອງປະຊຸມ ຄັ້ງທີ 45 ຂອງ ຄະ​ນະ​ກຳ​ມະ​ການ​ຮ່ວມ​ມືລະ​ຫວ່າງ ລັດ​ຖະ​ບານ ລາວ ແລະ ຫວຽດ​ນາມ ໃຫ້ປາກົດຜົນເປັນຈິງ ແລະ ນໍາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບຫຼາຍຂຶ້ນ ແລະ ຍັງໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຍດນາມ ຈົ່ງໝັ້ນຄົງທະນົງແກ່ນ ຕະຫຼອດກາລະນານ.