ໃນວັນທີ 06 ມັງກອນ 2023, ສະຖາບັນການຕ່າງປະເທດ ໄດ້ຈັດກອງປະຊຸມສໍາມະນາວິຊາການ ໃນຫົວຂໍ້ “ວິທີວິທະຍາ ໃນການຂຽນບົດຄວາມ ແລະ ບົດຄົ້ນຄວ້າ ແລະ ການຮ່າງເອກະສານທາງການ” ພາຍໃຕ້ການເປັນປະທານໃນພິທີເປີດໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ໃຫ້ກຽດຂຶ້ນບັນຍາຍແລກປ່ຽນບົດຮຽນ ແລະ ປະສົບການ ໂດຍ ທ່ານທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ເຊິ່ງມີຄະນະສະຖາບັນ, ຄະນະພະແນກ ພ້ອມດ້ວຍວິຊາການສະຖາບັນການຕ່າງປະເທດ ທັງໝົດ ຈຳນວນ 30 ທ່ານເຂົ້າຮ່ວມຮັບຟັງ ແລະ ແລກປ່ຽນບົດຮຽນທີ່ມີເນື້ອໃນເລິກເຊິ່ງ ດ້ວຍບັນຍາການທີ່ຟົດຟື້ນ. ກອງປະຊຸມຄັ້ງນີ້ ແມ່ນນອນຢູ່ໃນຂອບໂຄງການຄົ້ນຄວ້າຮ່ວມ ລາວ-ຈີນ, ເຊິ່ງສະຖາບັນການຕ່າງປະເທດຮັບຜິດຊອບ.  

          ​

ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນເພື່ອເປັນການ​ແລກປ່ຽນຂໍ້ມູນ ແລະ ຖອດຖອນບົດຮຽນຈາກປະສົບການຕົວຈິງ ໃນການຈັດຕັ້ງປະຕິບັດວຽກງານການຄົ້ນຄວ້າຂອງສະຖາບັນການຕ່າງປະເທດ ແນໃສ່ສ້າງຂີດຄວາມສາມາດໃຫ້ແກ່ພະນັກງານໜຸ່ມນ້ອຍສະຖາບັນການຕ່າງປະເທດ. ການຈັດກອງປະຊຸມສໍາມະນາຄັ້ງນີ້ ຍັງເປັນການສືບຕໍ່ຜັນຂະຫຍາຍ ຜົນກອງປະຊຸມສຳມະນາກ່ຽວກັບວຽກງານຄົ້ນຄວ້າ ທີ່ສະຖາບັນການຕ່າງປະເທດ ໄດ້ຈັດຂຶ້ນເປັນປົກກະຕິໃນໄລຍະຜ່ານມາ ເພື່ອໃຫ້ມີລັກສະນະຕໍ່ເນື່ອງ.

ໃນພິທີເປີດກອງປະຊຸມ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ຕີລາຄາສູງຕໍ່ຜົນສຳເລັດໃນການຄົ້ນຄວ້າຂອງສະຖາບັນການຕ່າງປະເທດ, ເຊິ່ງສະແດງອອກໃນການຮຽບຮຽງປຶ້ມປະຫວັດສາດການພົວພັນການທູດ ລະຫວ່າງ ສປປ ລາວ ແລະ ປະເທດເພື່ອນມິດຈຳນວນຫລາຍຫົວ, ຂຽນບົດຄວາມລົງໜັງສືພິມເປັນປະຈຳ ແລະ ເປັນຈໍານວນຫລາຍສະບັບໃນແຕ່ລະປີ, ຄົ້ນຄວ້າລາຍງານສະພາບການພົ້ນເດັ່ນພາກພື້ນ ແລະ ສາກົນເປັນປົກກະຕິ ເຊິ່ງໄດ້ປະກອບສ່ວນອັນສໍາຄັນເຮັດໃຫ້ວຽກງານຄົ້ນຄວ້າ ຂອງກະຊວງການຕ່າງປະເທດພວກເຮົາມີບັນຍາກາດຟົດຟື້ນ. ນອກນັ້ນ, ທ່ານ ຍັງໄດ້ສະແດງຄວາມຊົມເຊີຍໃນການຈັດກອງປະຊຸມສໍາມະນາຄັ້ງນີ້ ເຊິ່ງເປັນການປະກອບສ່ວນອັນສຳຄັນໃນການແລກປ່ຽນບົດຮຽນ ແລະ ຄໍາຄິດຄໍາເຫັນຕໍ່ບັນຫາຕ່າງໆທີ່ປິ່ນອ້ອມວຽກງານຄົ້ນຄວ້າ ແລະ ການຮ່າງເອກະສານທາງການ. ພ້ອມດຽວກັນ, ກໍເປັນການເປີດໂອກາດໃຫ້ພະນັກງານໜຸ່ມນ້ອຍ ໄດ້ຮັບຟັງຈາກປະສົບການຕົວຈິງ ແລະ ລົງເລິກແລກປ່ຽນບົດຮຽນ ແລະ ປະສົບການນໍາກັນ, ຮ່ວມກັນຄົ້ນຄວ້າຫາວິທີ ເພື່ອຍົກສູງປະລິມານ ແລະ ຄຸນນະພາບຂອງວຽກງານຄົ້ນຄວ້າຂອງສະຖາບັນການຕ່າງປະເທດ. ໃນການດໍາເນີນກອງປະຊຸມໃນຄັ້ງນີ້, ຄະນະສະຖາບັນ ແລະ ຄະນະພະແນກ ໄດ້ຜັດປ່ຽນກັນຂຶ້ນບັນຍາຍ, ແລກປ່ຽນບົດຮຽນ, ປະສົບການ ແລະ ວິທີການໃນການຈັດຕັ້ງປະຕິບັດວຽກງານຄົ້ນຄວ້າ, ການຂຽນບົດຄວາມລົງໜັງສືພິມ, ການຮ່າງເອກະສານທາງການທີ່ເປັນພາສາລາວ ແລະ ເອກະສານການທູດທີ່ເປັນພາສາອັງກິດ ທີ່ມີເນື້ອໃນສໍາຄັນ ແລະ ເປັນປະໂຫຍດທີ່ສຸດ ໃນການນໍາໃຊ້ເຂົ້າໃນວຽກງານຕົວຈິງ.  

ກອງປະຊຸມສໍາມະນາໃນຄັ້ງນີ້ໄດ້ດຳເນີນໄປຢ່າງໄດ້ຮັບໝາກຜົນ ແລະ ປິດລົງຢ່າງຈົບງາມ, ເຊິ່ງໃນພາກສະຫຼຸບກອງປະຊຸມ, ທ່ານທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ໄດ້ສະແດງຄວາມຮູ້ບຸນຄຸນມາຕໍ່ຄະນະນຳກະຊວງການຕ່າງປະເທດທີ່ໄດ້ສະຫລະເວລາອັນມີຄ່າ ເຂົ້າຮ່ວມໃນພິທີເປີດ ແລະ ມີຄໍາເຫັນຊີ້ນໍາທີ່ສຳຄັນຕໍ່ກອງປະຊຸມ. ນອກນັ້ນ, ທ່ານທູດ ໄມ ໄຊຍະວົງສ໌ ຍັງໄດ້ສະແດງຄວາມຊົມເຊີຍ ບັນດານັກວິທະຍາກອນ ແລະ ຜູ້ເຂົ້າຮ່ວມທຸກທ່ານທີ່ໄດ້ແລກປ່ຽນຄວາມຮູ້ ແລະ ປະສົບການຢ່າງກົງໄປກົງມາເຮັດໃຫ້ກອງປະຊຸມມີເນື້ອໃນຄົບຖ້ວນສົມບູນ ບັນລຸຕາມເປົ້າຫມາຍ ແລະ ຈຸດປະສົງ.