ໃນວັນທີ 9 ມັງກອນ 2023 ຜ່ານມາ ໄດ້ມີກອງປະຊຸມຄະນະກໍາມະການຊາຍແດນ ລາວ-ກໍາປູເຈຍ; ກໍາປູເຈຍ-ລາວ ໃນຮູບແບບທາງໄກ ໂດຍຜ່ານ Video Conference  ໂດຍການເປັນປະທານຮ່ວມຂອງທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ປະທານເຈົ້າໜ້າທີ່ອາວຸໂສຊາຍແດນ ລາວ-ກໍາປູເຈຍ (ຝ່າຍລາວ) ແລະ ທ່ານ ນາງ ໂກຍ ປີໄຊ, ຮອງປະທານຄະນະກຳມະການຊາຍແດນ, ສໍານັກງານນາຍົກລັດຖະມົນຕີ, ຮັບຜິດຊອບວຽກງານຊາຍ ແດນ, ຮອງລັດຖະມົນຕີກະຊວງທ່ອງທ່ຽວ (ຝ່າຍກໍາປູເຈຍ). ນອກຈາກນີ້, ກໍຍັງມີຜູ້ຕາງໜ້າຈາກກະຊວງກ່ຽວຂ້ອງຂອງທັງ ສອງຝ່າຍເຂົ້າຮ່ວມ.

ກອງປະຊຸມໄດ້ປຶກສາຫາລືກ່ຽວກັບວຽກງານຊາຍແດນ ລາວ-ກໍາປູເຈຍ ແລະ ໄດ້ທົບທວນຄືນໃນການຈັດຕັ້ງ ປະຕິບັດການຕົກລົງ ລະຫວ່າງ ນາຍົກລັດຖະມົນຕີຂອງສອງປະເທດ ຄັ້ງວັນທີ 12 ກັນຍາ 2019  ແລະ ປຶກສາຫາລືຄວາມ ເປັນເອກະພາບໃນການຮ່າງສົນທິສັນຍາຊາຍແດນ ລະຫວ່າງ ສອງປະເທດ ເພື່ອຮັບຮອງເອົາຜົນສໍາເລັດໃນການສໍາຫຼວດ ແລະ ປັກຫຼັກໝາຍຊາຍແດນ ໃນຈໍານວນ 86%. ໃນກອງປະຊຸມ ສອງຝ່າຍໄດ້ປຶກສາຫາລືແລກປ່ຽນຄວາມຄິດເຫັນຢ່າງ ສ້າງສັນ, ກົງໄປກົງມາ ແລະ ໄດ້ເອກະພາບໃນຫຼາຍບັນຫາສໍາຄັນທີ່ເປັນພຶ້ນຖານບ່ອນອີງໃຫ້ແກ່ການຮ່າງເນື້ອໃນສົນທິສັນຍາ ກໍຄືການແກ້ໄຂບັນຫາຊາຍແດນ ລະຫວ່າງ ສອງປະເທດໃຫ້ມີຄວາມຄືບໜ້າ ເພື່ອທີ່ຈະສາມາດລົງນາມຮ່ວມກັນໃນໂອກາດ ການພົບປະຂອງການນໍາຂັ້ນສູງສອງປະເທດໃນເວລາອັນໃກ້ນີ້. ພ້ອມດຽວກັນນັ້ນ, ສອງຝ່າຍຍັງໄດ້ປຶກສາຫາລືກ່ຽວກັບ ຮູບແບບຫຼັກໝາຍຊາຍແດນໃຫ້ມີຄວາມສວຍງາມ ແລະ ແໜ້ນໜາກວ່າເກົ່າ ເພື່ອປ່ຽນແທນຫຼັກໝາຍຊົ່ວຄາວທີ່ມີຂະໜາດ ນ້ອຍ ແລະ ຈະພ້ອມກັນວາງແຜນການປັກຫຼັກໝາຍຖີ່ຢູ່ຕອນຊາຍແດນທີ່ສອງຝ່າຍເຫັນວ່າມີຄວາມຈໍາເປັນ.

ກອງປະຊຸມຄັ້ງນີ້​ໄດ້​ຈັດ​ຂື້ນ​ໃນທ່າມກາງບັນຍາກາດອັນດີແຫ່ງການພົວພັນຮ່ວມມືລະຫວ່າງສອງປະເທດ ທີ່ນັບມື້ນັບຮັດແໜ້ນ ແລະ ​ໄດ້​ຮັບ​ການ​ເສີມ​ຂະ​ຫ​ຍາຍ​ຢ່າງ​ຕໍ່​ເນື່ອງ ແລະ ເປັນຄັ້ງທໍາອິດທີ່ສອງຝ່າຍໄດ້ຈັດກອງປະຊຸມ ປຶກສາຫາລືວຽກງານຊາຍແດນໃນຮູບແບບ Video Conference, ຊຶ່ງ​ຖືເປັນ​ອີກບາດກ້າວ​ໜຶ່ງທີ່ປະກອບສ່ວນເຂົ້າໃນການສ້າງຊາຍແດນລະຫວ່າງສອງປະເທດໃຫ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື ຢ່າງເປັນຮູບປະທໍາເທື່ອລະກ້າວ.