ໃນຕອນບ່າຍວັນທີ 06 ທັນວາ 2022, ກົມກົງສຸນ ກະຊວງການຕ່າງປະເທດໄດ້ຈັດພິທີເປີດຕົວຜົນງານການຈັດຕັ້ງປະຕິບັດໂຄງການ “ຫັນການເຊື່ອມໂຍງວຽກງານກົງສຸນໃນບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງໄປສູ່ທັນສະໄໝດ້ານເຕັກໂນໂລຊີ” ຂຶ້ນ ທີ່ ໂຮງແຮມເມືອງແທງ, ນະຄອນຫລວງວຽງຈັນ, ໂດຍໄດ້ຮັບກຽດຈາກ ທ່ານ ບຸນເຫລືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ, ຕາງໜ້າຈາກບັນດາສະຖານທູດໃນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ປະຈຳ ສປປ ລາວ, ບັນດາຄະນະກົມ, ຄະນະພະແນກ ແລະ ວິຊາການ ຂອງກະຊວງ ການຕ່າງປະເທດ ເຂົ້າຮ່ວມຢ່າງພ້ອມພຽງ. ໃນໂອກາດນີ້, ທ່ານ ພອນສີ ບຸນມີໄຊ, ຮອງຫົວໜ້າກົມກົງສຸນ ໄດ້ນຳສະເໜີບົດຄວາມເປັນມາ ແລະ ຜົນງານການຈັດຕັ້ງປະຕິບັດໂຄງການ ໂດຍມີເນື້ອໃນຫຍໍ້ດັ່ງນີ້:
ໂຄງການ “ຫັນການເຊື່ອມໂຍງວຽກງານກົງສຸນໃນບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງໄປສູ່ທັນສະໄໝດ້ານເຕັກໂນໂລຊີ” ແມ່ນໂຄງການທຳອິດທີ່ກົມກົງສຸນໄດ້ຮັບທຶນສະໜັບສະໜູນຈາກກອງທຶນພິເສດແມ່ນ້ຳ ຂອງ-ແມ່ນ້ຳລ້ານຊ້າງ. ຈຸດປະສົງຫລັກຂອງການຂໍອະນຸມັດໂຄງການ ແມ່ນເພື່ອຍົກລະດັບວຽກງານກົງສຸນໃຫ້ຫັນເຂົ້າສູ່ລະບົບໂດຍນຳໃຊ້ເຕັກໂນໂລຊີໃຫ້ຫລາຍຂຶ້ນ ເພື່ອກຽມພ້ອມສົ່ງເສີມການເຊື່ອມໂຍງເຊື່ອມຈອດກັບບັນດາປະເທດ ໃນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ກໍ່ຄື ອາຊຽນ. ຜ່ານການຈັດຕັ້ງປະຕິບັດໂຄງການໄລຍະ 16 ເດືອນ, ສາມາດສ້າງ ແລະ ພັດທະນາລະບົບໄດ້ຄື: 1. ລະບົບຖານຂໍ້ມູນວີຊາກັບດ່ານ; 2. Website ຂອງກົມກົງສຸນ; 3. ລະບົບຈອງມື້ນັດຍື່ນເອກະສານຄຳຮ້ອງຂໍໜັງສືຜ່ານແດນແບບອອນລາຍ; 4. ລະບົບເອກະສານຂອງພະແນກຄຸ້ມຄອງການເຂົ້າ-ອອກ ສປປ ລາວ ຂອງກົມກົງສຸນ ແລະ 5. ເອກະສານແນະນຳການອອກວີຊາ ແລະ ການບໍລິການທາງກົງສຸນ, ບົດຮຽນການຈັດຕັ້ງປະຕິບັດ ແລະ ຂໍ້ສະເໜີແນະຕ່າງໆສຳລັບບັນດາປະເທດໃນຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ. ທັງໝົດ 5 ຜົນງານດັ່ງກ່າວ ຈະຊ່ວຍຍົກລະດັບວຽກງານກົງສຸນໃຫ້ມີປະສິດທິພາບ ແລະ ປະສິດທິຜົນຫລາຍຂຶ້ນ, ສາມາດຮັບໃຊ້ ແລະ ອຳນວຍຄວາມສະດວກ ໃຫ້ແກ່ພໍ່ແມ່ປະຊາຊົນທີ່ມາໃຊ້ບໍລິການເຮັດໜັງສືຜ່ານແດນ ແລະ ບັນດານັກທ່ອງທ່ຽວທີ່ຈະເດີນທາງເຂົ້າມາ ສປປ ລາວ ກໍ່ຄືພາກພື້ນແມ່ນ້ຳຂອງ-ແມ່ນ້ຳລ້ານຊ້າງຂອງພວກເຮົາ ມີຄວາມສະດວກສະບາຍຍິ່ງຂຶ້ນ, ຊຶ່ງສອດຄ່ອງກັບແນວທາງນະໂຍບາຍຂອງພັກ ແລະ ການຄຸ້ມຄອງຂອງລັດ ໃນການຫັນການບໍລິຫານລັດໄປຕາມທິດທັນສະໄໝ, ວ່ອງໄວ, ທັນການ, ໂປ່ງໃສ ແລະ ສາມາດກວດສອບໄດ້ເທື່ອລະກ້າວ. ສຳລັບການນຳໃຊ້ລະບົບດັ່ງກ່າວ ຄາດຄະເນວ່າຈະໄດ້ເລີ້ມທົດລອງນຳໃຊ້ພາຍໃນ ຕົ້ນປີ 2023 ນີ້.