ໃນລະຫວ່າງ ວັນທີ 15-16 ທັນວາ 2022, ທີ່ ແຂວງອຸດົມໄຊ, ກົມອົງການຈັດຕັ້ງສາກົນ, ກະຊວງການຕ່າງປະເທດ ໃນນາມ ກອງເລຂາຄະນະຊີ້ນຳລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຢູ່ ສປປ ລາວ ແລະ ກອງເລຂາຄະນະຊີ້ນຳລະດັບຊາດ ເພື່ອຈັດຕັ້ງປະຕິບັດແຜນດຳເນີນງານ ສປຊ ສຳລັບປະເທດດ້ອຍພັດທະນາ ໄດ້ຈັດ ກອງປະຊຸມທົບທວນປະຈຳປີ 2022 ຂອງ ຈຸດປະສານງານແຫ່ງຊາດ ເພື່ອຈັດຕັ້ງ ປພຍ ຢູ່ ສປປ ລາວ ພາຍໃຕ້ການເປັນປະທານຂອງ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ, ໂດຍມີຜູ້ຕາງໜ້າຈາກບັນດາຈຸດປະສານງານປະຈຳແຕ່ລະກະຊວງ, ອົງການລັດທຽບເທົ່າກະຊວງ ແລະ ຂະແໜງການກ່ຽວຂ້ອງຈາກສູນກາງ ແລະ ແຂວງອຸດົມໄຊ ເຂົ້າຮ່ວມຈຳນວນ 90 ທ່ານ.

ຈຸດປະສົງຫຼັກແມ່ນເພື່ອສະຫຼຸບຕີລາຄາຄືນຜົນສຳເລັດ ແລະ ສິ່ງທ້າທາຍໃນການຈັດຕັ້ງປະຕິບັດ ປພຍ ໃນສົກປີ 2022 ຜ່ານມາ, ໂດຍສະເພາະແມ່ນການຖອດຖອນບົດຮຽນ, ແລກປ່ຽນປະສົບການຂອງແຕ່ລະຂະແໜງການ ຄຽງຄູ່ກັບການວາງແຜນງານ, ທິດທາງ ແລະ ຄາດໝາຍວຽກງານ ປພຍ ສຳລັບ ປີ 2023, ໃນສະພາບເງື່ອນໄຂການຟື້ນຟູປະເທດພາຍຫຼັງການລະບາດຂອງພະຍາດ ໂຄວິດ-19. ພ້ອມກັນນັ້ນ, ກອງປະຊຸມໄດ້ປຶກສາຫາລື ແລະ ແລກປ່ຽນຄຳຄິດເຫັນກ່ຽວກັບການຮ່າງແຜນຍຸດທະສາດຂ້າມຜ່ານແບບໂລ່ງລ່ຽງ (STS) ເພື່ອກະກຽມໃຫ້ແກ່ການຫຼຸດພົ້ນອອກຈາກສະຖານະພາບດ້ອຍພັດທະນາຂອງ ສປປ ລາວ ພາຍໃນປີ 2026.

ໂອກາດນີ້ທ່ານຮອງລັດຖະມົນຕີຍັງໄດ້ຢ້ຳຄືນຄວາມສຳຄັນຂອງການສືບຕໍ່ຈັດຕັ້ງປະຕິບັດ ປພຍ ຄຽງຄູ່ກັບແນວທາງ, ນະໂຍບາຍ ແລະ ບູລິມະສິດການພັດທະນາ ກໍ່ຄື ການເຊື່ອມສານ ປພຍ ໃຫ້ສອດຄ່ອງກັບ ແຜນພັດທະນາເສດຖະກິດ-ສັງຄົມ ແຫ່ງຊາດ 05 ປີ ຄັ້ງທີ IX, ວິໄສທັດຮອດປີ 2030 ແລະ ຍຸດທະສາດການເຕີບໂຕສີຂຽວ, ແຜນ ແລະ ບູລິມະສິດສະເພາະຂອງແຕ່ລະຂະແໜງການ. ພ້ອມທັງໄດ້ເນັ້ນໜັກຕື່ມວ່າ: ປະຈຸບັນ ສປປ ລາວ ກໍ່ຄືໃນທົ່ວໂລກ ໄດ້ປະເຊີນໜ້າກັບສິ່ງທ້າທາຍຫຼາຍຢ່າງ ໂດຍສະເພາະການຟື້ນຟູສະພາບເສດຖະກິດ-ສັງຄົມ ພາຍຫຼັງການແຜ່ລະບາດຂອງພະຍາດ ໂຄວິດ-19 ເຊິ່ງ ໄລຍະຜ່ານມາ ລັດຖະບານ ໄດ້ສຸມໃສຈັດຕັ້ງປະຕິບັດ ປພຍ ແລະ ສາມາດບັນລຸໄດ້ຄວາມຄືບໜ້າໃນຫຼາຍດ້ານ ແຕ່ເພື່ອຜ່ານຜ່າຂໍ້ຫຍຸ້ງຍາກດັ່ງກ່າວ ທ່ານຮອງລັດຖະມົນຕິີໄດ້ເນັ້ນໃຫ້ບັນດາຂະແໜງການສືບຕໍ່ສຸມໃສ່ຈັດຕັ້ງປະຕິບັດວຽກງານບູລິມະສິດຂອງຕົນ ເພື່ອແນໃສ່ເຮັດໃຫ້ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ IX ໃຫ້ໄດ້ຮັບຜົນສຳເລັດ ແລະ ສ້າງເງື່ອນໄຂພື້ນຖານຕ່າງໆໃຫ້ແກ່ການກະກຽມ ເພື່ອຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ ໃນປີ 2026.

ກອງປະຊຸມໃນຄັ້ງນີ້ໄດ້ຮັບຟັງການສະເໜີ ແລະ ປຶກສາຫາລືຫົວຂໍ້ສຳຄັນຕ່າງໆເຊັ່ນ: ການຈັດຕັ້ງປະຕິບັດ ປພຍ ໃນປີ 2022 ແລະ ແຜນງານປະຈຳປີ 2023, ວຽກງານສະຖິຕິ ແລະ ຖານຂໍ້ມູນ SDG Open Platform, ວຽກແຜນການ ກໍ່ຄື ຍຸທະສາດດ້ານການເງິນ ແລະ ຂອບການຕິດຕາມ-ປະເມີນຜົນ ຂອງແຜນພັດທະນາເສດຖະກິດສັງຄົມແຫ່ງຊາດ 05 ປີ ຄັ້ງທີ IX ແລະ ຂະບວນການຮ່າງແຜນຍຸດທະສາດຂ້າມຜ່ານແບບໂລ່ງລ່ຽງ (STS) ໃຫ້ແກ່ການຫຼຸດພົ້ນອອກຈາກສະຖານະພາບດ້ອຍພັດທະນາຂອງ ສປປ ລາວ. ກອງປະຊຸມດັ່ງກ່າວແມ່ນໄດ້ຮັບຜົນສຳເລັດຕາມລະດັບຄາດໝາຍ ແລະ ໄດ້ດຳເນີນໄປດ້ວຍບັນຍາກາດອັນດີ ໂດຍໄດ້ຮັບຄວາມສົນໃຈ ແລະ ການປະກອບສ່ວນຢ່າງຫຼວງຫຼາຍຈາກຜູ້ເຂົ້າຮ່ວມຊຶ່ງໄດ້ມີການແລກປ່ຽນຢ່າງກົງໄປກົງມາ ໂດຍສະເພາະບັນດາສິ່ງທ້າທາຍໃນການປະສານງານ, ການຈັດຕັ້ງປະຕິບັດວຽກຕົວຈິງ ແລະ ບັນຫາອື່ນໆ ເຊິ່ງຈະເປັນພື້ນຖານອັນດີໃນການຮ່ວມກັນຈັດຕັ້ງປະຕິບັດວຽກງານ ປພຍ ແລະ LDC ໃນປີ 2023.