ໃນຕອນບ່າຍຂອງວັນທີ 10 ມິຖຸນາ 2022, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນ ລາວ ເຂົ້າຮ່ວມກອງປະຊຸຸມປຶກສາຫາລື ອາຊຽນ-ຈີນ ຄັ້ງທີ 28 ແບບທາງໄກ ພາຍໃຕ້ການເປັນປະທານຮ່ວມຂອງມຽນມາ ແລະ ສປ.ຈີນ.
ກອງປະຊຸມຄັ້ງນີ້ ໄດ້ຕີລາສູງຕໍ່ຜົນການຈັດຕັ້ງປະຕິບັດການຮ່ວມມືອາຊຽນ-ຈີນ ໂດຍສະເພາະການຜັນຂະຫຍາຍຜົນຂອງກອງປະຊຸມສຸດຍອດສະໄໝພິເສດ ອາຊຽນ-ຈີນ ເພື່ອສະເຫຼີມສະຫຼອງການພົວພັນ ຄົບຮອບ 30 ປີ, ແລະໄດ້ທົບທວນການຈັດຕັ້ງປະຕິບັດແຜນປະຕິບັດງານການຮ່ວມມື ອາຊຽນ-ຈີນ (2021-2025) ແລະ ກໍານົດທິດທາງການຮ່ວມມືໃນຕໍ່ໜ້າ ໂດຍສະເພາະການເສີມຂະຫຍາຍການພົວພັນອາຊຽນ-ຈີນ ທີ່ຖືກຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານ ໃນທ້າຍປີ 2021. ກອງປະຊຸມ ເຫັນດີສືບຕໍ່ການຮ່ວມມືດ້ານການກຽມຄວາມພ້ອມ ແລະ ການຮັບມືກັບໄພສຸກເສີນທາງດ້ານສາທາລະນະສຸກ ແລະ ການຟື້ນຟູເສດຖະກິດຮອບດ້ານພາຍຫຼັງໂຄວິດ-19; ການຈັດຕັ້ງປະຕິບັດແຜນແມ່ບົດການເຊື່ອມຈອດອາຊຽນ 2025; ການຈັດຕັ້ງປະຕິບັດແຜນປະຕິບັດງານການເຊື່ອມໂຍງອາຊຽນ (2021-2025); ການຫັນເປັນເສດຖະກິດດີຈີຕອນ ແລະ ສະໜັບສະໜູນຈຸລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ; ການຫລຸດຜ່ອນຄວາມທຸກຍາກ ແລະ ຮັດແຄບຄວາມແຕກໂຕນດ້ານການພັດທະນາ; ການຈັດຕັ້ງປະຕິບັດສັນຍາເຂດການຄ້າເສລີ ອາຊຽນ-ສປ.ຈີນ ແລະ ສັນຍາການຮ່ວມມືເສດຖະກິດຮອບດ້ານລະດັບພາກພື້ນ (RCEP); ການຮ່ວມມືດ້ານການສຶກສາ, ວັດທະນະທໍາ, ທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນກັບປະຊາຊົນ; ລວມທັງ ການຮ່ວມມືອະນຸພາກພື້ນ ໂດຍສະເພາະ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ.
--------------------------------