ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນບວກສາມ ແລະ ກອງປະຊຸມເຈົ້າໜ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ ຊຶ່ງໄດ້ຈັດຂຶ້ນໃນວັນທີ 8 ມິຖຸນາ 2022 ໃນຮູບແບບທາງໄກ ໂດຍການເປັນປະທານຂອງກໍາປູເຈຍ.
ກອງປະຊຸມເຈົ້າໜ້າທີ່ອາວຸໂສອາຊຽນບວກສາມ ( ອາຊຽນ+ສປ.ຈີນ, ຍີ່ປຸ່ນ ແລະ ສ.ເກົາຫຼີ) ໄດ້ສະແດງຄວາມຍິນດີຕໍ່ໂອກາດຄົບຮອບ 25 ປີແຫ່ງການຮ່ວມມືໃນຂອບອາຊຽນບວກສາມ ແລະ ໄດ້ຕີລາຄາສູງຕໍ່ຄວາມຄືບໜ້າການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນບວກສາມ ໄລຍະ 2018-2022 ພ້ອມທັງຊຸກຍູ້ໃຫ້ສໍາເລັດການຮ່າງເອກະສານແຜນປະຕິບັດງານສະບັບໃໝ່ ສໍາລັບໄລຍະ 2023-2027 ເພື່ຶອໃຫ້ກອງປະຊຸມສຸດຍອດອາຊຽນບວກສາມ ໃນເດືອນພະຈິກ 2022 ຮັບຮອງເອົາ ເພື່ອເປັນແນວທາງໃນການຮ່ວມມືໃນຂອບອາຊຽນບວກສາມໃນຊຸມປີຕໍ່ໜ້າ. ນອກນັ້ນ, ກອງປະຊຸມຍັງໄດ້ປຶກສາຫາລື ເພື່ອກະກຽມໃຫ້ແກ່ການຈັດກອງປະຊຸມລັດຖະມົນຕີຕ່າງປະເທດອາຊຽນບວກສາມ ໃນເດືອນສິງຫາ 2022 ແລະ ກອງປະຊຸມສຸດຍອດອາຊຽນບວກສາມ ທີ່ຈະຈັດຂຶ້ນໃນເດືອນພະຈິກ 2022 ທີ່ ພະນົມເປັນ, ກໍາປູເຈຍ.
ກອງປະຊຸມເຈົ້າໜ້າທີ່ອາວຸໂສ ຂອງກອງປະຊຸມສຸດຍອດອາຊີຕາເວັນອອກ ໄດ້ຕີລາຄາສູງຕໍ່ຄວາມຄືບໜ້າການຈັດຕັ້ງປະຕິບັດແຜນປະຕິບັດງານ ໄລຍະ 2018-2022 ແລະ ຊຸກຍູ້ໃຫ້ສໍາເລັດການຮ່າງເອກະສານແຜນປະຕິບັດງານຂອງກອງປະຊຸມສຸດຍອດອາຊີຕາເວັນອອກ ສະບັບໃໝ່ ໄລຍະ 2023-2027. ກອງປະຊຸມໄດ້ປຶກສາຫາລືບັນດາເອກສານຜົນຂອງກອງປະຊຸມທີ່ຈະໃຫ້ຜູ້ນຳພິຈາລະນາຮັບຮອງຢູ່ກອງປະຊຸມສຸດຍອດອາຊີຕາເວັນອອກ ຄັ້ງທີ 17 ໃນເດືອນພະຈິກ 2022 ນີ້ ແນໃສ່ເສີມຂະຫຍາຍການຮ່ວມມືໃນຂົງເຂດຕ່າງໆເຊັ່ນ: ການສ້າງຄວາມອາດສາມາດດ້ານເສດຖະກິດ ແລະ ການປະກອບການທຸລະກິດຂອງແມ່ຍິງ, ການຮັດແໜ້ນການຮ່ວມມືດ້ານພະລັງງານ ພາຍຫຼັງການແຜ່ລະບາດຂອງພະຍາດໂຄວິດ-19 ແລະ ອື່ນໆ. ກອງປະຊຸມຄັ້ງນີ້ ຍັງໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ພ້ອມກັນນັ້ນ, ກອງປະຊຸມຍັງໄດ້ປຶກສາຫາລືເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ໃນເດືອນສິງຫາ 2022 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 17 ໃນເດືອນພະຈິກ 2022 ທີ່ ພະນົມເປັນ, ກໍາປູເຈຍ.