ໃນວັນທີ 03 ກັນຍາ 2020, ທີ່ ສະຖານເອກອັກຄະລັດຖະທູດ ແຫ່ງ ສາທາລະນະລັດ ອິນເດຍ ປະຈຳ ສປປ ລາວ, ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ແຫ່ງສປປ ລາວ  ພ້ອມດ້ວຍຄະນະ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວເຂົ້າຮ່ວມເຊັນປຶ້ມໄຫວ້ອາໄລແກ່ດວງວິນຍານ ຂອງ ທ່ານ ປຣານາບ ມູເຄີຈີ, ອະດີດປະທານາທິບໍດີ ຄົນທີ 13 ຂອງ ສ.ອິນເດຍ.

ໂດຍມີເນື້ອໃນຂຽນວ່າ:  ໃນນາມລັດຖະບານ ແຫ່ງ ສປປ ລາວ ກໍຄືໃນນາມສ່ວນຕົວ, ພວກຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ຕໍ່ການຈາກໄປຂອງ ທ່ານ ປຣານາບ ມູເຄີຈີ, ອະດີດປະທານາທິບໍດີ ຄົນທີ 13 ຂອງ ສ.ອິນເດຍ.

ພວກຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ແລະ ຂໍແບ່ງເບົາຄວາມທຸກໂສກມາຍັງລັດຖະບານ ແລະ ປະຊາຊົນ ສ.ອິນເດຍ, ໂດຍສະເພາະຄອບຄົວຂອງ ທ່ານ ປຣານາບ ມູເຄີຈີ, ມານະໂອກາດນີ້ດ້ວຍ.